الأشهر الماضية جتني عدة مشاكل صحية متتالية وفي مناطق مختلفة من الجسم وعالجت معظمها ولله الحمد. اغلبها للأسف تشترك بنفس المسببات: الاكل الغير صحي، وعدم ممارسة الرياضة، وقلة النوم، وزيادة الضغط النفسي.
فحبيت اشارك ابرز اللي تعلمته هالفتره، لعلها تساعد في تجنبكم نفس المشاكل..
فحبيت اشارك ابرز اللي تعلمته هالفتره، لعلها تساعد في تجنبكم نفس المشاكل..
طبعا دايم نسمع عن اهمية الأشياء اللي ذكرتها والالتزام فيها، واللي يخلينا عادة نتساهل فيها انه نمط حياتنا مبني على عادات سيئة اساسا سواء في الاكلات اللي نحبها ونفرط فيها، او السهر اللي نمارسه للمتعة، وغيره. ونتهاون من مبدأ "الموت مع الجماعه رحمه"، لين تنقرص وتضطر تصحح وضعك غصب.
1️⃣ زيادة الوزن قد تؤدي الى عواقب مهما كانت زيادتك قليلة في نظرك. ما تحتاج تصير مفرط السمنة عشان تبدا تحس بالمشاكل الصحية، مجرد زيادتك عن وزنك المثالي ١٠ او ٢٠ كيلو ممكن تجيب فيك العيد تدريجياً بالعظام او غيره بدون ما تحس، حتى لو كنت تعتقد انك طبيعي وشكلك لطيف في اللبس.
2️⃣النوم الجيد مهم جداً جداً جداً. وما اتكلم عن ال١٢ ساعه اللي تنامها فجأه في الويكند على اساس تعوض. اذا ما نمت نوم ليل (١٢-١ بالكثير) ولمدة ٧-٨ ساعات فادائك نفسيا وذهنيا وجسديا بيكون اقل في اليوم التالي، ومافيه كمية قهوة وسكر بتقدر توصلك لافضل حاله لك مهما اوهمت نفسك بهالشي.
3️⃣ اهمية الرياضة والحركة لا تعني انك تصير فجأه شخص رياضي يقعد بالنادي ساعتين باليوم. الالتزام بشي خفيف مثل مشي ٣٠ دقيقه يومياً بيكون ممتاز كبداية، والأهم انك ما تتسمر قدام المكتب لساعات طويله بدون اي حركه. تحتاج توقف وتحرك جسمك بانتظام ولا بيضعف جسمك وبتبدا تطلع مشاكل في كل مكان.
4️⃣ مهم جدا تتحكم بالضغط النفسي ومصادره في حياتك، وتتاكد انك تاخذ الراحه الكافيه وترفه عن نفسك بشكل مناسب. لا يغرك الهياط في تويتر ولينكد ان اللي يحسسونك الحياه مجرد شغل وكرف وانجازات. تحتاج تخصص اوقات كافيه للراحه ولكل النقاط السابقه عشان تقدر تصير افضل نسخه منك وتعطي ٢٠٠٪.
النقطة الرابعة تحديداً قد تحتاج مساعدة من طبيب اذا كنت تعاني من توتر وقلق (مثلاً) اكثر من الطبيعي، وتحس ماتعرف شلون تحل الموضوع. لان تدهور الجانب النفسي بيسبب اضرار عضوية. مشكلتنا دائماً نضغط على انفسنا اكثر من اللازم لتحقيق ما نتمناه، وننسى صحتنا اللي هي المحرك الاساسي لنا
🚨 واخيرا (وهذي اهم نقطة لاني ادري ان كثير بيسحبون على النصايح اللي فوق): متى ما حسيت بأي أعراض مستمرة في أي مكان في جسمك مهما كانت سخيفة رح للدكتور مبااااشرة. تنميل؟ الم خفيف؟ صداع؟ غيره؟ اي اعراض مستمره في نفس المنطقه مهما كانت بنظرك سخيفه قد تكون اشارة لشي اكبر لا قدر الله.
شخصياً اكتشفت فيني مشاكل ماكنت ادري انها موجوده اصلاً، وكنت احسب الشعور اللي احس فيه شي طبيعي جداً ولا يعني شيء. لين عالجتها بعدين اكتشفت اني ما كنت ادري وش الشعور الطبيعي اصلاً 😂 فقط لان اعراضها كانت تافهه وغير مؤثرة، ولكنها اشارة مبكره لوجود مشكلة.
لا يعني طبعاً انك توسوس وتصير اذا حكك خشمك ٣ ايام ورا بعض تروح للدكتور، وانما تستشير طبيب في حال حسيت بشعور مستمر غير طبيعي، لو حتى من خلال رقم وزارة الصحة المجاني (٩٣٧) بشكل مبدأي. كفانا الله واياكم شر المشاكل الصحية، ومتعنا ومن تحبون بالصحة والعافية. وسلامتكم ✋🏼
جاري تحميل الاقتراحات...