بنات حابة اتكلم في نقطة حساسة شوية واتمني انها تتاخد بمرونة بحكم طبيعة الصفحة بتعدي رسائل وتغريدات كتير محتواها ان برجي كذا وبرج حبيبي كذا أو ان مريخه وشمسه و زهرته كذا وهو معذبني وانا تعبت؟ او اللي بحبه متجاهل رسايلي او اهتمامي او كان متحمس واتغير و الخ..
بعيداً عن مسألة الفلك بهتم بقراءة القصة او المشكلة وبستغرب ليه بشوف هذا الكم من السيدات والبنات مستحملين "القرف" ده؟ وهنا مش بعمم بالمناسبة كل واحد عارف نفسه وقصته بلاش اي كلمة تثيرك بلا داعي. لكن في ناس بقرأ كلامها وتضحيتها وتعبها وهموت واقولها ليه؟ ليه بتعملي في نفسك كده بجد؟؟
وقبل ما حد يتسرع مدركة ان لكل حالة وضعها وظروفها بس اللي لاحظته بصدق شديد ان في مجموعة من البنات والسيدات بتبذل مجهود كبير قوي وتقدم تنازلات بلا داعي وحتي اللي مش بتضحي وتتنازل بتلاقيها في حالة انتظار وبرضه مقيدة نفسها بعلاقة مع شخص زي الزفت المتزفت.
جماعة انتم متخلين هتعيشوا كام سنة يعني؟ وبتكلم بجد عايزة اجابات في التعليقات! ليه تضيعي وقتك ومجهودك ومشاعرك عشان تحاولي تفهمي واحد بارد او اناني او مراوغ وليه تسيبيه يلعب بمشاعرك ويحركك وقت ما يحب. الحقيقة انك مش محتاجة تفهميه هو في الحالة دي ولكن محتاجة تفهمي نفسك!
في نفس الوقت انا مش بقول بلاش نبذل مجهود ووقت في العلاقات وان الرجالة كلها شياطين والستات ملايكة لأن ده فكر سطحي وغير حقيقي. بس طالما حاولتي اكتر من مرة وطالما بذلتي مجهود ومفيش فايدة يبقي في داهية ويولع والله. ساعات بترفضوا الكويس بارادتكم للأسف لما بتفضلوا معلقين نفسكم بالوحش.
وللتوضيح انا مش ضد السؤال او الاستفسار عن خريطة الشخص او طبيعة علاقتكم من منظور فلكي بالعكس دي خطوة في غاية الأهمية ولكن كلامي فوق 👆 متعلق بنقط لفتت انتباهي فيما يخص "العلاقات" بشكل عام ومش اوضاع فلكية. الكلام النظري دايماً سهل ولذلك التطبيق بيشكل تحدي ف اتمرنوا كويس يا جماعة.
محدش هيخاف عليك اكتر من نفسك، محدش معاك في الرحلة دي غير نفسك لو فهمت نفسك هتفهم كل حاجة حواليك وساعتها مش هيبقي مهم ليك ليه فلان اتغير او بعد او بدأ يتجاهلك لأنك بمنتهي القوة والخفة هتتحرك تجاه طريق افضل. وافتكر ان اختيارك لعلاقاتك بيعكس وعيك ونسبة تقديرك لحالك بشكل كبير 🕊
جاري تحميل الاقتراحات...