كنت بتفرج علي حلقة بودكاست وليد حسونة ال CEO بتاع Valu مع عباس أبو الحسن، وبدأ يتكلم عن ان مفيش work life balance وانه بيعوض عيلته بكواليتي تايم وسفريات لما يعرف يشوفهم، نفس الموضوع ونفس الفكرة قالها مصطفى أبو سمرة مؤسس كايزو..
وهما شايفين ان لو حد فيهم عايز إسمه يفضل مذكور في التاريخ، هي دي الطريقة اللي التاريخ يفضل فاكرك بيها، يعني مثلا وليد حسونة شايف ان الطريقة دي في إدارة حياته هي اللي هتوصله انه يتذكر في التاريخ انه مع مؤسسين فاليو هيتذكروا انهم مؤسسين الشكل ده من ال consumer finance في مصر.
قعدت فكرت في كلامه وأدركت انه ببساطة عايز حلم الخلود، بس السؤال المهم انت بتضحي بحياتك الحقيقية وعلاقتك باللي بيحبوك وحواليك علشان بعد ٥ سنين من موتك واحد ما في لقاء تلفزيوني ما لمدة ٣٠ ثانية يقول الله يرحمه وليد حسونة هو اللي عمل البزنس ده؟ بس كده؟
حتى لو الاسم بقى موجود في كتب دراسية في الجامعة، اللي هو أكبر تشريف ممكن تاخده، هتاخد أكتر من صفحتين في شابتر واللي ممكن الدكتور يلغيه بسهولة؟ مين النهاردة الناس لسه فاكراه؟ هتفضل ريلفنت كام جيل؟
دي بجد غاية لن تدرك علشان ببساطة دي عكس نواميس الكون، العالم بيجري اسرع من قدرة أي حد على ايقافه عنده ،انه يفضل the talk of the town باقي الحياة، وفي الآخر بتضحي بأكتر حاجة ليها قيمة في الحياة علشان بتحاول توقف العالم قدامك كام ثانية زيادة؟
وهنا مش بتكلم من أرضية واحد ضد الرأسمالية ومش شايف أهمية للكارير، بالعكس، انا لسنين طويلة تعريفي لنفسي هو فلان اللي بيشتغل كذا، ولما جت فترة كاريري عطل فيها حبة كنت محطم نفسيا تماما وكانت بتجيلي أفكار سيئة، علشان ببساطة ايه معنى الحياة لو مش شاطر في شغلي؟ انا مين أصلا من غيره؟
وده فكرني بال Ted Talk الشهيرة بتاعت وائل الفخراني واللي كان بيقول بكل وضوح ان لو هو في شغلانة مش متوتر بشكل مخلي بطنه مموتاه، بيحس ان في حاجة غلط ومش عامل اللي عليه، أو هو في المكان الغلط، ووقتها الجملة دي مفارقتش دماغي، وسببها مع أسباب تانية استنيت سنين على ما أطلب مساعدة طبية،
وكنت شايف ان القلق وصعوبات النوم والاكتئاب دول دليل اني ماشي صح في شغلي، ده العادي يعني، دي ضريبة الناس الناجحة، ولما كنت بلاقي نفسي في مكان شغل مش قلقان ومش بفرك كل يوم وبشتغل بعد مواعيد شغلي ده دليل اني مقصر وماشي وحش
في حين ان الفترة اللي كنت هادي فيها دي كانت واحدة من peaks كاريري عموما، وبسبب الأفكار دي اتحرمت من الاستمتاع باللحظة دي، لغاية لما وصلت للإحتراق الكامل اللي وصلني اني أطلب مساعدة من شخص متخصص.
وليد حسونة نفسه بيقول انه وبنته لغاية دلوقتي بيجيلهم قلق وهما نايمين وطول حياته عايش في قلق شديد، مصطفى أبو سمرة اتكلم كتير عن مروره بفترات اكتئاب شديدة، وائل الفخراني تراجع عن كلامه ده بعد سنين وبقى أهدى بكتير
كلامي عن الناس دي مش هدفه اني أقول انهم المفروض ميتكلموش وانهم غلطانين، بالعكس انا بحبهم جدا، ومش بفوت فرصة اتكلموا فيها غير لما اسمعهم باهتمام، الناس دي وغيرها هما أسيادنا في البزنس وكتر خيرهم انهم بياخدوا من وقتهم وبيفيدوا غيرهم
وبعدين يعني هو عندنا كام شخص عنده ال business acumen ده وكمان بيعرف يتكلم؟ هما دول اللي حليتنا، انا هدفي بس ان لو هناخد بكلام الناس الشاطرة دي يكون في مجال الشغل، لكن التطبيع مع التوتر ومحاولة تسديد احتياجات نفسية عن طريق الانغماس في الشغل، معتقدش ان دي حاجة كويسة..
وعن تجربة، أنضف شغل هتطلعه في حياتك هيكون وانت مستقر نفسيا بنسبة ما، ولما بتعمل شغلك علشان بتستمتع مش علشان بتنغمس فيه علشان تسكت أصوات داخلية خايف تواجهها.
جاري تحميل الاقتراحات...