بنات تكرر هذا وعندي سالفة بفلوس:
المصنعية كلمة فضفاضة لها معنى لو صار المحل الي تروحين له مب على طريق الملك فهد، المصنعية تشمل إيجار المحل ورواتب العمال وترخيص البلدية.
لذا بالقطع الي وزنها قليل السؤال عنها ماله سنع مرّة فأحسب كلّش كنسبة من سعر الذهب وأشوف السعر الي أقيّمه عادل.

بالقطع الي وزنها عالي تصير الحسبة مختلفة، كم سعر الذهب يومها بالجرام+ كم مصنعية الذهب بالجرام (ومجددًا فيه اعتبارات تخلي كل محل على كل قطعة يحسب مصنعيّة مختلفة، واحد يعرف الي يصنّع الذهب مب زي غيره، واحد محله بمكان غالي مب زي رخيص فدوروا السوق والقطع كثير تتشابه وتتكرر)+ ربحه.

كنت قبل أحسب بس يعتمد القطعة فيها شغل وشكلها حلو ولا لأ بس الموضوع معقّد جدًا أكثر من كذا؛ عشان كذا كل قطعة بكل محل ممكن لها مصنعية مختلفة (وشكلها وتعقيدها مب العامل الرئيسي).
روحوا للسوق رايقين ومتقهوين وتفرجوا والي يستهبل بالسعر اتركوه، الدنيا مليانة ذهب وناس زي الذهب.

السعر المبدئي عامل كبير فيه شكلك قدّيش هطَف (واضح شكلي من الخمسمية) لذلك محلات الذهب مب مكان تكشخين ولا مكان تعبرين فيه عن ذوقك وحريتك التعبيرية، روحي بأبسط شكل ممكن وسولفي زي خالاتك وأمك، بدايتك بسعر أقل تسهل كسر السعر أكثر، السعر النهائي سماحة وتوفيق ربي وسعر الذهب والمعرفة.