رتبها

تذكرون لما كلمتكم على طائفة المورمونية ؟ 👀
ترى حتى "هانا"وزوجها "دانيال" اللي سالفتهم سايرة ترند هاليومين وكل احد يتكلم عنهم وعن نمط حياتهم
اثنينهم يتبعون هذه الطائفة الدينية اللي قلتلكم عنها !
تعالوا اقولكم سالفتهم 👇🏻

ومو بس كذا هم اعضاء في كنيسة لهذه الطائفة ومتشددين مره بإتباع طائفتهم واتوقع هذا سبب من الاسباب اللي خلت الناس تستغرب من نمط حياتهم هم بعد وتسير سالفتهم ترند بكل مكان

في البداية "هانا نيلمان" هي راقصة باليه و ولدت في عام 1990 في ولاية يوتا الأمريكية
وظهر حبها لرقص الباليه من عمر 14 سنة وكانت تحضر برامج باليه صيفية في مدرستها ومهتمة في كل شيء يخص الباليه 🩰

ولما سار عمرها 16 سنة جاتها منحة دراسية عشان تشارك في برنامج الباليه المسرحي بجامعة بريغهام يونغ وتدرس الجامعة هناك لانها متميزة ✨

وفي ذاك الوقت قابلت دانيال اللي هو زوجها الان واللي كان وقتها يدرس في نفس الجامعة لان اصلاً بينهم سنة هي مواليد 1990 وهو مواليد 1991 ..

ودانيال مييين يكون من الاساس ؟
يكون ولد رجل الأعمال البرازيلي الأمريكي "ديفيد نيلمان" واللي يملك 5 شركات طيران وتبلغ ثروته فوق الـ 400 مليون دولار

وهانا تعرفت على ولده دانيال في اخر ايام الجامعة يعني بعد 4 سنوات من دراستها تقريباً .. وبعد ما تعرفوا على بعض بـ ثلاث اشهر تقريباً تقدم لخطبتها وبعدها تزوجوا في عام 2011

و اول سنوات حياتهم بعد الزواج قضوها في البرازيل بحكم ان "دانيال" وقتها كان يشتغل مدير في وحدة من شركات ابوه

وبعدها رجعوا لامريكا وعاشوا فيها لمدة ثلاث سنوات وفي هذا الوقت كان دانيال يدور كثير عن الأراضي الزراعية ليييه ؟ لان وده يعيش في مزرعة هو وزوجته هانا ويبتعدون عن حياة المدن وهي موافقة

وفي عام 2017 اشترى مزرعة وبعدها بسنة باعها ورجع اشترى مزرعة Ballerina Farm وعايشين فيها هم الان

و"هانا" بعد ما تزوجت "دانيال" انجبت منه 8 اطفال ورا بعض .. مافي اي فرق كبير بينهم بالعمر ورا بعض ما شاء الله 🤣🤣 وترا هذا زي ما قلتلكم اول هذه تعاليم طائفتهم وما ياخدون مانع

وعاشت في المزرعة اللي اشتراها زوجها وكرست كل حياتها ووقتها للطبخ وللشغل في المزرعة والأهتمام باطفالها وبحيوانات المزرعة و نفس سالفة نارا بالضبببط كانت كل شيء تسويه بنفسها من الصفر من اكل ومستلزمات لهم هي تسويها بنفسها

وفتحت حسابات لها على السوشيال ميديا عشان تشارك الناس حياتها

وبعدين لما لقت فرصة ووقت لنفسها قالت انها بتشارك في مسابقة .. و فعلاً شاركت في مسابقة ملكة جمال امريكا وفازت في لقب ملكة جمال ولاية يوتا لـ 2021

وفي فبراير من هالسنة بعد شاركت في مسابقة Mrs. World وطلعت على المسرح بعد اسبوعين من ولادتها بطفلها الثامن والأخير

ماعلينا في هذا كله .. "هانا" بعد ما شاركت في هذه المسابقات وحسابها على التيـ،،ك تـ،،وك وصل لـ 8 مليون قررت مجلة New York Times
انها تزوها في مزرعتها وتسوي معها مقابلة ..

وفي المقابلة "هانا" قالت كلام كثير عن حياتها وهذه المقابلة اساساً هي سبب الضجة اللي سايرة عنها بالفترة الأخيرة

في البداية الصحفية اللي راحت تسوي مع "هانا" المقابلة قالت ان طول وقت المقابلة كان زوج "هانا" واقف على راسها ومو مخليها تتكلم براحتها
وانه اول ما يروح لو شوي هانا على طول تتكلم بوضوح وشفافية وتبين انها تعاني عكس وهو واقف فوق راسها

و"هانا" في بداية المقابلة قالت للصحفية ان امنية حياتها كانت انها تسير راقصة باليه عالمية وتكمل في المجال اللي كانت تحبه بس خلاص حلمها هذا تلاشى وانتهى بعد ما تزوجت من "دانيال" وانجبت وعاشت في المزرعة

ولما جابت طاري المزرعة قالت ان كل شيء بالمزرعة كانت هي اللي تسويه بنفسها ومن غير مساعدة اي احد .. وهذا الشيء كان رغبة من زوجها لأنه كان مايبي يجيب احد يساعدها ورافض تماماً

وتخيلوا وش بعد !
قالت ان كل ولادتها الـ 8 كانت بالمزرعة ما راحت اي مستشفى يعني بالضبط نفس نارا بس هذه الضعيفة غصباً عنها لانه هو ما يبيها تولد الا بالمزرعة 🫠
ولما سالتها الصحفية اذا كانت تولد بمسكنات او ابرة الظهر قالت لها "هانا" ان زوجها يرفض انها تاخذها ويرفض انها تاخذ أي مسكن

وقالت بس مره وحدة كان مسافر واخذت ابرة الظهر وهي تولد بالبيت في ولادة بنتها وبدون علمه حتى وترى سؤال الصحفية هذا جاوبت عليه بدون وجود "دانيال" ولا علمه 👀
يعني واضح انه لو كان وقتها جنبها ما جاوبت كذا

وبعدها "هانا" كملت وقالت ان "دانيال" كان يمنعها من انها تاخذ حبوب منـ.ع الحمل وكان يقول لها ان الأطفال هبة من الله وحنا ما راح نمنع او نوقف انجابهم وش مايكون عددهم 🦦

و بعد كلامها هذا وتصريحاتها سار هجوم كبير على زوجها "دانيال" والناس اتهموه بالأنانية والنرجسية ولما نبشوا بحساب هانا لقوا مقطع خلاهم يحزنون عليها اكثر

في هذا المقطع "دانيال" كان جايب لـ"هانا" هدية يوم ميلادها وهي كانت متوقعة انها تذكرة سفر لليونان لان حلمها تسافر هناك بس انصدمت انه جايب لها مريلة لتجميع البيض ! 😵‍💫🥚

وقاموا الناس عليه بكل مكان وانه شخص اناني رغم انه ثري الا انه خلاها تعيش في مزرعة ومنعها تولد في اي مستشفى ومو راضي يجيبلها اي مُساعدة تساعدها وحتى الانجاب خلاها تحمل وتنجب 8 ورا بعض .. وانه قلب حياتها 180 درجة رغم انها كانت شغوفة وعندها اهداف كثيرة

والهجوم على "دانيال" لليوم مستمر وكثير شايفين ان "هانا" ضحية لرجل نرجسي سلب منها موهبتها ..

شرايكم بالموضوع تحسونها صدق ضحية ولا تعمدت تقول هالكلام وهالتصريحات عشان تسير ترند؟ او من الاساس هذا كله يعتبر اختيارها بالحياة وهي راضية بتصرفاته بالتالي تتحمل نتيجة اختيارها رضاها ؟