كمية الحيرة اللي ممكن تقع فيها لما تجي تختار مكان للبرنش في لندن ما هي منطقية من كثر الخيارات الرائعة. لكن من طرق تقليل هذي الحيرة بالنسبة لي هي إني أبحث عن مكان يكون متخصص في تصنيف معيّن لأن الخيارات وقتها بتكون مختلفة.
وقع الاختيار على مطعم @FallowLondon اللي يقدم المطبخ الإنجليزي بشكل معاصر ولتميّز الأطباق النباتية خاصّة المبنية على أنواع مختلفة من الفطر، وسبب تميّزهم فيها إنهم يزرعون عشرات الأنواع من الفطر في قبو المطعم :)
في غرفة منزوية في قبو المطعم، قرروا الشيفز اللي يملكون المطعم إنهم يزرعون الفطر بدال ما يبحثون عنه في الغابات ويقطفونه. وطريقتهم في زراعته بساطتها غريبة. كل نوع من أنواع الفطر يستزرع في كيس بلاستيكي مغلق ولكن فيه شقوق من الأعلى. داخل الكيس، بدال التربة أو القش اللي يستعمل بالعادة لاستزراع الفطر، يستعملون خليط من بقايا البن بعد تحضير الاسبريسو مضاف لها خشب البلوط (يجي قطع أعرض من أعواد الكبريت بشوي).
الغرفة نفسها تذكرني بهيوميدور السيجار. لا بد من التحكم بالحرارة داخلها وفيها منظم رطوبة يعمل بالموجات الفوق صوتية، وإضاءة LED خافتة وفوق بنفسجية. أيضاً حتى ينمو الفطر بطريقة ملائمة، لا بد تكون الاضاءة خافتة بحيث بالكاد تقدر تقرأ صفحة كتاب تحتها.
فبعد العناية هذي كلها، كيف تتخيل تكون الأطباق المحتوية على فطر عندهم؟ :)
دخلنا أنا و @Fahad28924 هناك، وبعد ما ساعدونا المطعم بحل خطأ سويته بخصوص الحجز، جلسونا على كاونتر الشيف.
بدأنا بموكتيل اسمه Dragon Punch المكون من شاي أخضر ومشمش ونعناع وفلفل أسود. حالي زيادة عن اللزوم، ولكن بعد ما خففته بمياه غازية صار أفضل بكثير.
وبعدها جت المقبلات، وهنا لازم نتوقف شوي حتى نتكلم عن الـ "پارفيه".
جرت العادة إن الپارفيه يكون حالي، ويقدّم عادة كطبق فطور أو حلى، وهو يشبه الزبادي بشكل كبير. هنا استعملوا نفس تكنيك الپارفيه ولكن باستعمال أنواع الفطر اللي يزرعونها. والنتيجة مزيج قابل للدهن مذاقه إيرثي وأومامي، واتفقنا على إنه ألذ شي مصنوع من الفطر ذقناه على الإطلاق. ويجي المزيج مزين بفطر ينمو في بريطانيا اسمه Lion’s mane (يسمونه كذا لأن شكله يشبه بدّة الأسد)، ويضيفون له فطر شيتاكي مدخن ومنقوع بمزيج صويا وهذا يعزز كثير من مذاق الأومامي.
بالمناسبة، الأومامي هو المذاق الخامس اللي تم إضافته خلال الـ ١٠٠ سنة الماضية لتصنيفات المذاق الأربعة (حالي، حامض، مر، مالح). فكّر في الصويا صوص المنخفضة الملوحة مثلاً، هذا أكثر مذاق أومامي ممكن يمر عليك.
نرجع الحين للپارفيه، يقدمونه مع شرائح خبز ساوردو مخبوزة في المطعم ومدهونة بزبدة وثوم. كل مسحة من مزيج الفطر على الخبز تثبت لك إنك أمام طبق مختلف وصعب تكراره أو تقليده.
التكملة تحت
👇

طلبنا معه جبن بوراتا مع دريسينق مكون من الفلفل الحار وخل البالسميك وفيه نوتة شديدة الحلاوة لكن أعجبتني كثير، ويعلوها بصل مقرمش. فهد ما فضّل الطبق هذا لأنه يشوف إن الإضافات سلبت نجومية البوراتا، ومعه حق. لكن بالنسبة لي، أعجبني لأني أشوف البوراتا هنا ممثل مساعد وموجودة حتى تخفف من حدة الإضافات وتعطيها توازن.
بعدين وصلنا الطبق الرئيسي وهذا أكثر ساندويتش اشتهر فيه المطعم. تخيل معي ساندويتشات الإفطار من دانكن دونات والا من ماكدونالدز، ولكنها محضرة في مطعم قورميه.
يسوون خبز ساندويتش مكون عجينة الكراوسان وبعدين يقصونه بالنص. يمسحون وجه من أوجه الخبز بنفس الپارفيه اللي طلبناه للمقبلات، وبعدين يضيفون عليه فطر البورتبيللو المشوي، وفوقه بيضة مطبوخة sunny side up، وشريحة جبن.
أنا مستعد أفطر بقية حياتي على الساندويتش هذا. أتذكر مرة سمعت تعريف الجمال على إنه: "تكامل الأجزاء في عملها معاً بحيث لا يمكن إضافة أو إزالة أو تغيير أحد الأجزاء بدون أن ينقص تكاملها".
الساندويتش هذا جميل.. جميل جداً بعد :)