لو بتحب عربيتك
هتوديها الصيانات بانتظام
هتهتم بنظافتها الداخليه
و نظافتها من برا
هتهتم لو طلع منها صوت غريب و تحاول تعرف سببه ايه وتجري عشان تصلحه
بتحاول قد ما تقدر ما تستخدمهاش فوق طاقتها و بتحاول متبهدلهاش
طبيعي الانسان لما بيحب حاجه بيقدرها و بيعتني بيها ، مش كده ؟
طيب ……. ⬇️

طب لو بتحب نفسك
ليه سايب جسمك مش راضي عنه
ليه مبتهتمش بشكلك و لبسك و الاهم نظافتك الداخليه .. قلبك و مشاعرك
ليه لما بتسمع صوت جواك غريب بتتجاهله .. مبتحاولش تفهم اكتر عن نفسك و تسمع لها و تعرف ايه محتاج يتصلح
ليه مبتعملش صيانة لجسمك بالتمرين
و لنفسك بالمتعه و الجمال والراحه
و لروحك بالخلوه و التأمل

ليه بتبهدل نفسك معاك
ليه بتيجي على نفسك كتير !
ليه بتظلم نفسك !
ليه بترضى الهوان والذل !
ليه ترضى بحياه فاتره باهته كئيبه
ليه مفكر ان ده ، نصيبك
ما يمكن انت خايف تخرج من الدور ده
يمكن عيشت الدور ده كتير
لدرجة انك خايف تشوف حياه تانيه مختلفه
عيشت كتير في ضلمه خايف تطلع منها للنور

اعتني بنفسك كأنها شيء تتمنى تملكه
نفسك شيء نفيس .. يعني غالي جداً
بس انت لا تدرك
اتخلص من مشاعر الذنب و العار و الخوف
لان دول ڤيروسات النفس
مجرد ما يتمكنوا منك
اتاكد انك في طريقك الى نار الدنيا
و حاول تتعايش على موجة القبول و الحب و السلام
لو قدرت تعيش دول
ف اتاكد انك في جنة الدنيا