كيف تنقل الستيك إلى مستويات غير مسبوقة؟
اليوم سويت أفضل ستيك سويته على الإطلاق، واللي رفع مستواه فوق انه واقيو إني سويت معه زبدة مطعّمة بنخاع العظم. من كثر ما هي رهيبة حتى البطاطس دخلت في تحضيره.
التفاصيل تحت
👇

اول شي القطعة عبارة عن ستريب لوين واقيو استرالي بسمك ٢ إنش (٥ سم). وطبختها ريڤيرس سير: في الفرن لين توصل لدرجة الحرارة المطلوبة وبعدها على الشواية حتى تكتسب لون.
اللي يميز السيزننق هنا هو استعمالي للملح البركاني اللي كان منظره على اللحم أشبه بالفحم.

للزبدة اخذت عظم فخذ كامل وطلبت من اللّحام يقطعه لي على شكل أسطوانات وبأطوال متقاربة. ريشته بزيت زيتون وملح وفلفل اسود وأعشاب إيطالية. حطيت بجنبه راس ثوم وعاملته نفس المعاملة ولفيته بقصدير حتى يدخل الفرن مع العظم.
لما طلع العظم وتأكدت ان النخاع مستوي استخرجته بالكامل وأضفت عليه: مقدار مساوي من الزبدة + بصل مقلي + الثوم المشوي + بهارات.
لفيتها الزبدة بعد ما بردت داخل ورق بلاستيك ودخلتها الثلاجة حتى تجمد وأقدر اقص منها أقراص تضاف على الستيك.