الواحد كل ما بيكبر بيكتشف ان في حاجات غريبة بقت تفرحه وقادرة تخلق جواه سلام نفسي. حاجات لو حد قالك عليها من ٢٠ سنة انها ممكن تكون سبب في ابتسامتك او انها تطمنك ماكنتش هاتصدقه. يعني البيت لما يبقى مترتب، ريحة البخور، شكل الحوض وهو فاضي، ريحة الأكل لما بيكون قرب يستوي،👇
نسمة الهوا بتاعت الصبحية، صوت إذاعة القرأن الكريم في البيت، رجعتك بيتك أخر النهار، تمشية بالعربية أخر الليل، فنجان قهوة، صوت قفلت باب البيت اخر الليل وكل أهله جواه، قاعدتك على الكنبة ويا نور الاباجورة والتلفزيون شغال على المسلسل اللي بتحبه، 👇
نور الشمس وهو متسرسب من شيش البلكونة ساعة العصاري، ريحة الأرض بعد المطر، شكل السما لما تيجي غيمة تخبي الشمس ساعة ضهرية، كوباية ماية ساقعة في أغسطس، ريحة البن، كوباية شاي مع ورقة نعناع وقاعدة في البلكونة ويا صوت الست..... 👇
تفاصيل كتير بتكتشف مع الأيام إنها بقت من أسباب سعادتك، بتفتح باب جوه روحك وتنادي على فرحتك اللي بتاخدها الأيام والمسؤولية وهموم الحياة. العلاقة مابين العُمر واللي بيفرحنا ساعات كتير بتكون مش مفهومة أو غير منطقية، مش قادر العقل يستوعبها لكن كفاية القلب مصدقها، 👇
نكبر أكتر اللي بيفرحنا يلبس توب البساطة. مش طالبين من الأيام كتير بس هي تجود باللي يهون السكة واحنا في الرضا متشعلقين
#منقول
#منقول
جاري تحميل الاقتراحات...