عارفين يا ولاد؟ انا جربت موضوع اني امشي ورا مشاعري بس و مش مهم الشخص يبادر لي زي ما ببادر و مش مهم يعمل عشاني مجهود زي ما بعمل و مش مهم اي حاجة طالما انا مع الشخص ف اللحظة دي و مبسوطة و خلاص، كنت بقول " اهم حاجة انا اعبر عن محبتي و انبسط بيها، مش مهم الشخص يحبني زي مابحبه" و...
عارفين دة وصلني ل ايه؟ وصلني ل اني بقيت مُستنزفة طول الوقت، مستنزفة بسبب اني مش متحملة ان الشخص اللي قدامي بيقصر ف حقي طول الوقت و بيكرر نفس الاغلاط مهما عاتبته و مستنزفة من المبادرة المستمرة عشان الشخص ما بيعملش عشاني الا " مجهود بسيط اوي" دة لو اتكرم و عمله و الأهم؟
انه خلاني احط الضوء على حاجة مهمة اوي ف نفسيتي انا ماكنتش واخدة بالي منها اساسًا و هي " انا ما استحقش اخد اكتر من اللي باخده ، هو دة اللي استحقه طالما دة اللي بيجيني" ، ماكنتش عارفة قيمة نفسي، ماكانش عندي حدود نهائي، كل حاجة كانت متاحة عشان "الحب و الصداقة" يعيشوا. دة ليه؟
لإني كنت محتاجة حاجة تعيش، انا احتجت الصداقات دي تعيش لإني كنت مخلية قيمتي مرتكزة على وجود الناس دول ، الناس دول لو بعدوا؟ يبقى انا مين ؟ او قيمتي هتبقى عاملة ازاي؟ صحيح انهم ما بيعملوش حاجة تحسسني بقيمتي بس بيقولوا كل " الكلام" اللي بيحسسني اني " مميزة" عندهم.
كنت محتاجة " الإنتماء" و كنت دايمًا بدور على فكرة " الإنتماء" بإستمرارية ، عشان دي كانت اكتر حاجة انا كنت مفتقداها ف كنت دايمًا بدور عليها و ماكنتش بفهم هو انا ليه بدور عليها مع اشخاص بيستنزفوني و بيأذوني؟ لحد ما فهمت ان دة كان المألوف بالنسبة لي، انا ماكنتش متعودة على الراحة.
و لا كنت اعرف يعني ايه علاقات صحية و يعني ايه حدود صحية و يعني ايه ابقى ناضجة عاطفيًا و بحترم نفسي و بقدرها لحد ما اتعلمت و عرفت فعلًا، قعدت فترة طويلة بشتغل على نفسي ، فترة طويلة عشان استوعب اني استاهل الأحسن، عشان استوعب ان انا قيمتي اعلى بكتير من اللي كنت شايفة نفسي عليه.
و بفضل الله عليا ، انا النهاردة مابقيتش اقبل على نفسي اي حاجة اقل من قيمتي زي ماكنت بقبل ف الماضي، ما بقيتش احاول ف الاماكن الغير مناسبة مع الاشخاص الغير مناسبين، بقت معاييري عالية ف الناس" بس مش مثالية" عشان انا وصلت لمعايير عالية ف استاهل اشخاص معاييرهم شبهي ببساطة.
و التغيير دة ماحصلش بسهولة، انا فعلًا اخدت وقت طويل و اجتهدت عشان ابقى كدا بس كل الوقت و كل الجهد اللي عملته؟ يستاهلوا النتيجة اللي وصلت لها، ما تكاسلتش و ما انهزمتش و ما استسلمتش و قلت " خلاص بقى دي طبيعتي و دة اللي هبقى عليه" ، انا آمنت بالتغيير و على قد إيماني؟ كانت النتيجة.
جاري تحميل الاقتراحات...