كلمتين علي جربة تونس 🇹🇳 من رحلة راس و رويّس…
هذي كانت أول مرة نمشي فيها لتونس بالسيارة و عامة ليا علي تونس من 2012
درت تشك علي آبليكيشن Booking لكن ماحجزتش و قلت تو نوصل غادي ندف الباب و نخش و تو نلقى غرفة علي أساس مش براني. طلعت من طرابلس يوم الخميس الساعة 17:00 و شديت الطريق..
هذي كانت أول مرة نمشي فيها لتونس بالسيارة و عامة ليا علي تونس من 2012
درت تشك علي آبليكيشن Booking لكن ماحجزتش و قلت تو نوصل غادي ندف الباب و نخش و تو نلقى غرفة علي أساس مش براني. طلعت من طرابلس يوم الخميس الساعة 17:00 و شديت الطريق..
نتكلموا شوية عاللوجستيات و الأمور التقنية …
الرحلة كاملة كلفت 500 دولار منهم 400 للمنتجعات اللي كانت All inclusive. صرّفت 100 دولار لتونسيات من الظهرة جابوا 310 دينار قلت يقعدوا إحتياط. السيارة اللي مشيت فيها كانت دودج تشارجر محركها 3.5 عبيتها فُل و خذيت معاي 60 ليترا بنزينة …
الرحلة كاملة كلفت 500 دولار منهم 400 للمنتجعات اللي كانت All inclusive. صرّفت 100 دولار لتونسيات من الظهرة جابوا 310 دينار قلت يقعدوا إحتياط. السيارة اللي مشيت فيها كانت دودج تشارجر محركها 3.5 عبيتها فُل و خذيت معاي 60 ليترا بنزينة …
… عبيت منهم 20 ليترا في راس إجدير و 20 في ثاني يوم في جربة و الـ20 الأخيرات في جرجيس و أني مروح. وصلت بيها لطرابلس فيها نص تنك … البنزينة تخش لتونس عادي لكن البوابات متاع الشرطة عندهم يقلقوا شوية عليها لما يلقوها في الكوفينو فحتلقى روحك معبيها غر بش تريّح بالك …
طبعا لو سيارة محركها 1.6 أو 2.0 أعتقد فل تنك يرفعها و يجيبها ببيدون 20 ليترا إحتياط و مش حتحتاج أكثر. المهم طلعت من طرابلس الخميس الساعة 17:00 وصلت لراس إجدير الساعة 20:50 و خشيت تونس الساعة 02:00 بتوقيت ليبيا ممكن التأخير لأنه كان يوم خميس لكن كانت تشحيطة وقفة الـ5 ساعات الحق …
ماخذيتش شفرة تونسية لأنها كانت زايدة نزّلت الخريطة من راس إجدير لجربة كاملة من قوقل مابس للأوف لاين مود. تخدم و تعطي روت و ممتازة جدا. وصلت لمنطقة ميدون في جربة الساعة 04:00 و مشيت للـTUI Magic Life بش بندف الباب و نخش … قالولي شن حالك إنت لازم تمشي لأي وكالة أسفار و تحجز قبل …
…طبعا وكالات الأسفار (هلبا هما) يفتحوا الصبح فمشيت لأول منتجع جي قدامي (جربة ريزورت) كان إسمه و خشيتلهم حصلت عندهم حجرة نفوت فيها الليلة. الحجرة عندهم كانت بـ202 دينار تونسي … هو حتى هو كان كويّس نوعا ما غر ديكوره قديم و ماعنداش شط خاص بيه و أني من الأول مسكر راسي عالماجك لايف
فقت الصبح فطرت و عبيت ثاني 20 ليترا و طلعت مشيت للماجك لايف بندف الباب و نخش ثاني قلت بالك تشد. عاودولي نفس الدوة دوّرت و ولّيت أول ماطلعت من زنقته لقيت وكالة أسفار قدامي درست عليها و نزلت أعطيت للموظفة إسم المنتجع اللي نبيه و مدة الإقامة 3 أيام طلع حسابهم 350 دولار شامل كل شيء..
أعطيتها 400 و ردتلي الـ50 دولار بالتونسي جوني 150 دينار تونسي بش يعوضوا 202 دينار اللي خذيت بيهم ليلة جربة ريزورت. خذيت الحجز متاعي مطبوع و ولّيت للماجك لايف ملصقهولهم عالفودرا … خشيت درست السيارة في البريكيدجو و نزلت للريسيبش خلصت عنده الضريبة اللي هي 6 دينار عاليوم (18 دينار)
أعطاني رقم و مفتاح الحجرة و كروت لمناشف الحوض و الشط و لبسونا الناستروات بش مانريحوش منهم. الحجرة شاملة فطور/غذي/عشي بالإضافة للمشروبات و النفاص و الجيلاطي. عندهم نقص في الشامبوات طبعا و لما سألتهم قالولي هو نفسه صابون اليدين السائل يمشي شامبو و شاور جل قلتلهم حتى أني هكي متعود..
الحجرة نظيفة و مريحة و بصفة عامة المنتجع عائلي و هادي، ماشفتش فيه شباب بروحهم كلهم راس و رويّس من عمر الـ18 لعمر الـ300 سنة بالإضافة لصغار مرة مرة تلقاهم يحبشوا تحت الطاولة يجروا في جرة قطوس. الأجانب كانوا أغلبيتهم العظمى ألمان مع شوية فرنسيس و مجر …
و معانا عائلتين تونسيات و 3 عائلات ليبية نديروا في روحنا أجانب قدام بعض و مش زابطين. المطعم متاع المنتجع ممتاز جدا و الأكل كان مستواه عالي و فيه تنوع يغطي كل الأذواق. الفطور يقعد للساعة 10:30، الغذي من الساعة 13:00 للـ15:00 و العشي يبدا الساعة 19:00. و في قهوة رقيلة حتى هي مشمولة
القهوة عندهم قهوة ماكينا و براتشو و الحلو فيه تنوع بين الغربي و الشرقي و المحلي. و عندهم كل أحد عشي علي ثيم معين، اللي أني حضرته كان عالثيم التونسي جايبين فرقة زي المالوف و مدايرين كسكسي و ملوخية و بريك و مكرونة مشخشخة (إيه هكي) و حاجات ثانية ماسألتش علي إسمها بش مانبانش مانزبطش
رابع يوم طلعنا لحومة السوق درنا فيها دورة و خطمنا عالكورنيش بالسيارة. حومة السوق قنينة لكن الفرق الوحيد بينها و بين المدينة القديمة طرابلس هو الزرع و شجر الجهنمية و الياسمين و مسك الليل اللي فيها. الكورنيش من المنتجع لحومة السوق حوالي 12 كيلومتر مريح للأعصاب. هي جربة فاضية عامة
و بعدها مشينا لحي الرياض اللي يبعد حوالي 9 كيلو عن حومة السوق فيه جداريات قنينة لكن مشكلته فاضي من البشر و مقلق ممكن لأنه كان يوم أحد. فيه نفس فكرة المدينة القديمة.و مش بعيدة عليه دار غريبة أقدم معبد يهودي في شمال أفريقيا حسب الزعم غر مامشيتلاش علي خاطر اللي صار فيه من ثلاثة أيام
و في آخر يوم إكتشفت إن المنتجع عندهم فريق إنترتاينمنت كل ليلة يدير في عرض ترفيهي من شكل … لحقت علي يوم الكاريوكي كان فيه جو و ضحك. يوم المرواح درت التشيك آوت و شديت الطريق الساعة 10:30 و عبيت آخر 20 ليترا في جرجيس و منها لراس جدير خذيت ساعة في إجراءات الخروج و وصلت طرابلس 17:00.
جاري تحميل الاقتراحات...