رتبها

يا ترى قبل كده اشتغلت مع مدير Passive Aggressive؟ المدير اللي طريقته معاك بتخليك محتار ومش قادر تحكم اذا كان متضايق او مش مبسوط من شغلك، وعندك احساس عدم راحة وقلق، وحاسس انه عنيف بس من غير دليل او تصرف يثبت ده ..
النوع ده من أصعب المديرين في التعامل، وللأسف بينجحوا .. طيب ليه؟🧵

فيه فترة كان عندي مدير ناجح بسبب الطريقة دي، والحقيقة ان نجاحه كان بسبب ذكاؤه انه يعرف يخلي التيم يطلع كل يوم أحسن حاجة عنده بس مش بشكل صحي .. وللأسف لفترة اتعلمت منه الطريقة دي واحتجت لشوية وقت علشان أوقف الأسلوب ده
في الآخر انت بتشوف مديرك بيشتغل ازاي وبتتعلم منه الحلو والوحش

تعالى نتخيل سيناريو كده، لو حصلت مشكلة في الشغل وانت سهرت طول الليل بتشتغل عليها لحد ما خلصتها .. تاني يوم بيقابلك مديرك وبيقولك قدام زمايلك أو لوحدكم "جامد أوي يا هاني، بس غريبة شوية انك بتشتغل بالحماس ده واحنا عندنا مشاكل بس :)"
جملة ملعوبة كويس، هتخليك مش عارف دلوقتي هل...

هل هو مبسوط منك ولا لأ، وهل انت كده عملت انجاز ولا حاجة عادية .. في نفس الوقت انت ماتقدرش تقول انه اتكلم معاك وحش، ولو انت شخص بتحب المصارحة (نسبة قليلة من الناس كده) روحت قولتله طريقتك ضايقتني غالبًا هيستغرب ويقولك لأ انا مكانش قصدي وازاي فكرت فيها بالشكل ده ..

النوع ده من الأشخاص في كل مكان، وبنخبط فيهم كل يوم وأوقات كتير ممكن احنا نكون كده، المشكلة بتبقى لما يكون حد بتشتغل معاه كل يوم بيتبع الأسلوب ده، ومشكلة أكبر لو كان مديرك اللي هو أهم شخص في الشغل .. وبغض النظر اذا كان هو مُدرك طريقته وتصرفاته أو لأ، فالضرر موجود وبيحصل كل يوم ..

النوع ده بيتجنب المواجهة أو المصارحة، لأسباب كتير منها انه جبان ومش هيقدر يسمع ردود تضايقه أو تكشفه، ومنها انه الطريقة دي مفيدة مع ناس كتير جدًا بتخليه يبقى in control ومسيطر على التيم بتاعه ومحسسهم انهم مش كفاية ولازم يحطوا مجهود أكتر .. أنسب مصطلح هو انه بيخليهم on their toes

ايه الطرق اللي بيستخدموها؟ الهزار والسخرية زي "ايه كل الغلطات اللي في الايميل دي؟ انت محتاج كورس انجلش بقى!"، مع انه ممكن يقول "هاني انا حاسس انه كان ممكن ناخد وقتنا ونكتب الايميل بطريقة أحسن او نراجعه سوا، بصراحة فيه غلطات مش حلوة، تعالى نبعته سوا المرة الجاية"

الجملتين هيوصلوا نفس المعنى بس مش نفس الاحساس خالص ولا نفس الحيرة واللخبطة بتاعت طيب ما يقولي مشاكلي ويساعدني ..
تاني طريقة، الـsilent treatment وهي انه مش بيوجهلك كلام زي انك تسأله رأيك في الايميل فا يعمل حركة معناها عادي او مش بطال .. انت بتكون عامل مجهود ومستني رد فعل تاني ..

تالت طريقة هي انه يحسسك ان فيه حاجة ناقصة علشان متاخدش الاحساس بتاع انك عملت حاجة كويسة أوي وتتبسط، للأسف فيه مديرين بتقلق انها توصل ده للناس اللي معاها فا يريّحوا شوية وشغلهم يهدى، لأ هما عاوزينهم دايمًا محتارين، ولو فيه منهم حد قال انه مش مبسوط، ساعتها هاقوله كلمتين حلوين ..

رابع طريقة اسمها backhand compliment زي الجملة بتاعت ليه مش بتشتغل بالحماس ده غير وفيه مشكلة .. هو بيشكرك، بس مش في المطلق!
خامس طريقة وهي تأجيل المساعدة أو النصيحة لآخر وقت وبالتالي انت هتتوتر وهو هيبقى المنقذ، أو مش بعيد يقول حاجة من نوع "انا كنت متوقع انك هتعملها لوحدك يعني"

سادس طريقة وهي guilt spiral او تبقى في دوامة انك حاسس بتأنيب الضمير والتقصير على حاجة انت مش عارف هي ايه .. يعني لو هو ماطلبش منك المساعدة بشكل مباشر وانت معرضتش مساعدتك، ممكن تسمع كلام من نوع "انا كنت متخيل انك هتساعدني فيها يعني بما انك عاوز تبقى سينيور، مش لازم أقولك يعني!"

طيب ازاي اتعامل مع كل الطرق الصعبة والغير مباشرة والسامة دي؟ فيه كذا طريقة ممكن تجربهم ..
- تحافظ على هدوئك في المواقف اللي بتكون فيها محتار ومش عارف هل ترد عليه ولا تتعصب ولا تتضايق، لأنه غالبًا هيعرف يطلع نفسه مايقصدش وانك غلطان

- النوع ده بيعتمد على المنطقة الرمادية اللي بين الكلام، والحل انك لازم تقللها، ده هيحصل عن طريق انك تسأل كتير وأسئلة واضحة اجابتها آه/لأ أو ردود مباشرة .. مثلاً: هل انا اتصرفت كويس في مشكلة امبارح؟ طيب، ازاي اركز اني اعمل ده كل مرة؟ لو معندكش رد دلوقتي تمام بس هاستنى منك افكار

هل كان المفروض اجي اراجع معاك الايميل قبل ما ابعت؟ انا قلقت اني اعطلك، بس تحب نعمل كده المرة الجاية؟
علشان المرة الجاية ابقى اعرفك اني اقدر اساعد، هابعتلك كل يوم الصبح ونص اليوم اقولك لو محتاج ادخل معاك في اي تاسك، قوللي لأ عادي
انا اتلخبطت من الجملة بتاعتك، ممكن توضحلي اكتر؟

- اتعاطف مع مشاكله واعرض المساعدة بسؤال، يعني "انا عارف انه انت شايل كتير أوي .. بس انا مستني برضه اعرف منك ازاي ممكن اتعلم الحتة دي منك من غير ما اضيع وقتك، تحب ابعتلك خطة ونراجعها سوا؟"
لو ماعملش حاجة بعد ما تبعتله فا مش هيقدر يلومك انك ماعرضتش مساعدة بعدها، الكورة في ملعبه

- النوع ده من المديرين بينجح بسبب الناس اللي بتقلق من شكلها لو غلطت أو قصرت أو اللي مش بتحب تزعل حد people pleaser، اتأكد انك مش كده لأنك لو كده فا هو هيفضل دايمًا بيلعب على انه يخليك متضايق لأنه مش مبسوط منك وبدون أسباب واضحة ..

هاقول تاني ان دي مش طرق بيعملها المديرين بس ولكن زمايلك والناس في الشغل وبره الشغل بس انا مركز هنا على جزئية المدير المباشر ليك، الكلام بينطبق على علاقات كتير بشكل أو بآخر .. والأهم من كل ده انك تبقى واعي كفاية وتتأكد انك نفسك مش بتميل للطريقة دي في أوقات معينة ..

نقطة أخيرة، متأسف لو فيه كلام مش مترجم للعربي ومتخيل ان الناس ممكن تستفيد أكتر بالمصطلحات المكتوبة انها تقرا اكتر عن مواضيع مهمة زي people pleaser مثلاً .. ومعنى passive aggressive هو السلوك العدواني الصامت، دي الترجمة اللي لقيتها ..
شكرًا 🙏🏻

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد