بمناسبة مسلسل الهرشة السابعة.
لما اتجوزت مراتي اتفقنا إن محدش من اهلنا هيتدخلوا في أي حاجة غير إنهم يوافقوا علي الجوازة. حرفيا أقسم بالله أهلي وأهلها شافوا عفشنا وهو في بيتنا. قابلتنا مشاكل كتير واتضحك علينا من معارض موبيليا ونجارين وخلافه بس في الاخر بنينا بيتنا سوا
لما اتجوزت مراتي اتفقنا إن محدش من اهلنا هيتدخلوا في أي حاجة غير إنهم يوافقوا علي الجوازة. حرفيا أقسم بالله أهلي وأهلها شافوا عفشنا وهو في بيتنا. قابلتنا مشاكل كتير واتضحك علينا من معارض موبيليا ونجارين وخلافه بس في الاخر بنينا بيتنا سوا
ابتدينا بيتنا بسرير وتلاجة وغسالة ومطبخ وترابيزة سفرة. كان ناقصنا حاجات كتير جدا بس قررنا نتجوز ونكمل بناء بيتنا واحدة واحدة. وحرفيا عملنا كده. كل شهرين تلاتة كنا بنشتري حاجة لغاية ما اشترينا عربية وربنا كرمنا وسافرنا بره وحاليا كرم ربنا علينا أكتر مما تخيلناه.
فكرة إننا بنينا بيتنا سوا ده فرق معانا في قرارات كتير جدا أهمها لما كنا بنتخانق كانت بتصعب علينا الرحلة والمجهود وكنا دايما بنراجع نفسنا قبل مانقرر أي قرار "أهوج". كتير فكرنا ننفصل في لحظة عصبية، بس كل واحد فينا بينام ويصحي يعيد تفكير بواقعية أكتر ونتأسف لبعض ونعدي لبعض بلاوي.
لما قررنا نسافر اتفقنا إننا نتبرع بكل عفشنا لعرسان يكونوا غلابة. متتخيلوش قمة سعادتنا وسعادتهم لما عملنا كده وبسبب ده ربنا عوضنا هنا لما جينا ألمانيا.
في ألمانيا عملنا نفس الموضوع بالظبط (خلاص بقينا خبرة). ابتدينا بيتنا من الصفر وفضلنا نفرش فيه واحدة واحدة لغاية ما بنينا أحلي بيت. بعدها ربنا رزقنا بـ "تيا" أحلي هدية في حياتي. وبعدها بأربع سنين أخوها "ريان".
هل حياتنا كانت كلها بمبي وورد وفراشات؟ لأ طبعا، بس فكرة الشراكة وإنك تبني بيت كإنك بالظبط بتبني شركة خلت كل حد فينا يحس إنه هيفقد رأس ماله وشقي عمره ولازم يفكر 100 مرة قبل ما يتهور.
سمر مراتي شاطرة جدا واقتصادية. من أول يوم عرفتها فيه وأنا معرفها بقبض كام وبقسم معاها مرتبي بالنص واتفقنا إنها تعتبر النص بتاعها ده مرتبها من شغلها مش جزء من مرتبي. هي بتحوش من نصيبها أكتر بكتير من اللي أنا بحوشه وياما فاجئتني لما كنا محتاجين فلوس كتير علشان نشتري حاجة كبيرة.
وبجملة الإيجابيات، عايز أقول إن سمر مراتي هي سر أماني في الحياة. كذا مرة أكون كاره نفسي في الشغل وابقي خايف اسيبه هلشان المسؤلية وهي تشجعني وتقولي لو مش مرتاح طز فيهم وسيبه وهنتصرف إحنا معانا فلوس علي جنب تكفينا سنة وأكتر ياحبيبي،اعمل اللي يريحك ومتخافش. الإحساس ده أهم احساس عشته
أنا بجد بشكر ربنا علي نعمة نون النسوة في حياتي بداية بجدتي ومرورا بأمي واخواتي ومراتي وأخيرا جنة حياتي بنتي "تيا" وبسببهم بعامل كل البنات في حياتي بنفس سوية وبدون عقد الحمدلله.
@yomna97362670 تنقية العفش فيها تفاصيل كتيرة الشيطان بيستغلها بداية من سعر الحاجة لغاية لخامتها وذوقها. من الأسباب مثلا لو العريس معهوش كتير يقدروا ينزلوا بحرية يشتروا بالفلوس اللي معاهم من غير ماحد يحسسه بـ "إنت بتسترخص!". في الاخر السرير ده احنا اللي هنام عليه انشالله لو جبناه كرتون
جاري تحميل الاقتراحات...