لو فيه نصيحة واحدة هاقولها لأي حد بيبتدي في سكة الـpeople management هتبقى انه ينمّي قدرته على التعاطف/empathy .. أسوأ حاجة انك تبقى مدير لشخص وأنت مش عارف تسمع حكاياته من غير اسقاطات على شخصيتك او موهبتك او ظروفك، ولا عارف تتفهم او تحس بمشاكله ومشاعره اللي مانعاه يؤدي كويس مثلاً

مش كل الناس عندها القدرة دي، بس الميزة انها حاجة تقدر تشتغل عليها وتحسنها وتقرا كتير عنها وتبقى واعي لردود فعلك اللي مخك بيقررها بناءً على كلام اللي قدامك، سواء انك من جواك تتفهم ظروفه او العكس انك تقول مثلاً "وفيها ايه؟ ما انا عندي بلاوي في البيت بس باجي اشتغل وبانجز ومش باشتكي"

أسوأ نوع مدير ممكن يقع في طريقك هو المدير اللي مش بيتعاطف مع مشاكلك او ظروفك او بيقارن بينك وبينه في شبابه مثلاً او بينك وبين زميل ليك، دي أسوأ طرق الإدارة عامةً .. طبعًا مفيش تعاطف غير مشروط وفي الآخر فيه حدود لكل حاجة وأكيد أي مدير هو شخص يمتلك ذكاء اجتماعي وعملي يخليه يفرّق ..

لاحظت انه بقالي سنين باشتغل على الموضوع وحاسس انه لسه كتير علشان أبقى مستمع جيد للي حوليا عمومًا مش اللي شغالين معايا بس، وكنت دايمًا عندي المعاناة بتاعت عدم التعاطف مع مشاكل غيري طالما انا ماعشتش شبهها او عشتها بس مأثرتش فيا (علشان انا جامد - وده مش حقيقي ده ego ساذج جدًا)

صباح الخير وأسبوع لطيف ان شاء الله 😀🙏🏻