اها وصلنا بيت ناس حبيبة تكنو وتكنو دقا الباب جاتنا واحده كدا عباره عن دقاقة قمح مربعه تربيع ومرصعه ترصيع فور اكس فور خالي رقبه اي والله ماعندها رقبه راسا ياهو يتدردق براهو في اكتافا وشلاليف وتلاليش وحاله بطاله ياذو الجلاله غايتو لو دي حبيبة تكنو الجايب ليها الكريم
يبقي تكنو وقع وماسمي ياخ دي شلاليفا الزي شلاليف الناقه القارشه الحنضل ديل براهن دايرات ليهن جردل كريم وجردل مرطب ليه ياتكنو عملت في نفسك كدا ؟ ح تعمل شنو بالشلاليف دي كلها ؟ لو تفت فيك ساي ح تفقهك المهم مجرد ماشافت تكنو صرخت واااااي قسيم ريدي تعال ليا وخشت في الاخ تكنو بالاحضان
حضنتو لمن ضهرو طقطق براهو زي الفشار هرستو هرس المهم متحاضنين بدون اي اعتبار وتقدير لي انا المنشحط جمبهم دا اها بعد فكوا بعض تكنو قال لي اعرفك ع رفارف قلبي ودركسونو الشمال حبيبتي اخلاص ممكن تقول ليها خلوصه معاي وقال ل حبيبتو اعرفك ع سليمان صاحبي فااا حبيبتو ضحكت ضحكه خليعه كدا
وقالت ليهو سلي ايه؟ مين المان؟ طبعا دي دعايه في ام بي سي مصر سلي ايه؟ مين المان؟ قالت لي اتشرفنا انا اي حاجه من طرف حبيبي تكنو انا بعتبرو حبيبي وفعلا اثبت لي دا بيان بالعمل جبدتني عليها وخشت فيني بالحضن اتخيل يااخ الاسلام والانسانيه انا سلي ايه دا الطول عمري ماحضنت
حتي امي الولدتني لاني متربي تربية جعليين قاسيه وناشفه جدا حتي امي زاتا بتنذني وتقول لي عان القدوم الامو ماسلمت عليهو ك دليل وبرهان ع نشاف هذه التربيه وطول عمري حضني طاهر لا هزيت الكانون ولا شربت الليمون تحضني واحده قذره زي حبيبة تكنو دي؟
ياااه يااااه ياسليمان لو شافتك توته العنكبوته وانت محضون كدا صدقني كانت ح تتكيك وتضبحك شخخخخ وتقطعك وتكومك كيمان زي المراره وكل يوم تاكل منك كوم المهم مجرد مالشيطانه دي حضنت العبد لله وما ادتني فرصه ادافع عن نفسي ماطالبني حليفه بس عليك امان الله شعرة جلدي دي كلها غزت
ووقفت صوفه صوفه وحيلي ماااااات وكرعي بردن كلو كلو وركبي يرجفن زي القصبه انا مامتعود ع الكلام دا مافي زول حضني قبل كدا ولا نفسي سولت لي احضن زول ياخ فنلفترض انا متعود ع الكلام دا يقوموا يحضنوني كدا بدون اي مقدمات وبدون يدوني حق تقرير المصير في اني اقبل او ارفض؟
المهم الزوله دي لمن فكتني جيت منخرت منها عباره عن ضب جا واقع من الحيطه وقعت كنيشه في الواطه دي قلبي يدق برااااحه زي الداير يقيف كدا وعروقي ينتحن تح تح عباره عن هبوط حاد في الدوره الدمويه والدوره المدرسيه زاتا في زمتكم دي اخلاص؟ معقول دا الاخلاص كدا؟
طيب اذا كان دي اخلاص يبقي الغدر والخيانه كيف؟ المهم تكنو قومني ع حيلي وقال لي اتفضل ياسلمونتي ودخل جوه ودخلني معاهو وانا بين الموت والحياه الحاجه الاكتشفتها في شخصيتي الضعيفه دي اني مجرد لسان طويل ليس الا وفصيح وجعجاع وهراط وبتاع خلع وخزعبلات بس وقت الكلام يخش في الغريق
ويبقي بيان بالعمل اقل حضن بخليني ارقد دلقون وماانفع صرفا ولا عدلا وكمان نفسك فاتحه ياسليمان عايز تعرس وتكورك ومالي الدنيا كواريك وعرسي قريب وشهر العسل وشنو ماعارف وعامل فيها عنتر وانت راقد خيت ح تعرس كيف وانت بتكبكب وترجف كدا زي قالب الكستر زمن كان الكستر برجف
ياخ الكستر قلبو بقي قوي وبقي مابرجف صدقني ياسليمان انت ح تفشل فشل كلوي عديل كدا غايتو ياستار العيوب وغفار الذنوب تستر عيوبي وتغفر ذنوبي المهم قعدنا في سراير متقابلات كدا وحبيبة تكنو مشت جابت عدة الجبنه ومعاها شيشه مولعه جمرها تهبو الريح قالت ل تكنو جر ليك نفسين تلاته
وادي سلي ايه دا معاك يجر معاك عشان ياحيلو شالو حبه يااتوفي لينا عديل كدا واقتنعنا انو خلاص قابل ربو هو مالو عامل كدا ياتكنو ؟ اول مره تصاحب ليك واحد مسهوك كدا وقلبو مقطوع فاا تكنو قال ليها لالا حبيبي انا سلمونتي دا الحبه النضيفه الوحيده في اصحابي كلهم
تقدري تقولي انو جاء بالغلط في الكرتونه من الشركه قالت ليهو مامشكله بنادي ليهو سماهر صاحبتي تونسو وتمرقو من الحاله الهو فيها دي ياكمان دخلتو في حاله تانيه اكعب من حالتو دي وفكت ليها ضحكه اخلع من الخلاعه زاتا وقامت جاريه لجوه وهي تضحك عشان تنادي لي سماهر
بقيت اكورك ليها تعالي ماتناديها ماداير اي زول ماتنادي لي اي زول ياخ اتلفتا ع تكنو عشان اقول ليهو اتكلم مع زولتك دي ماتجيب لي صاحبتا لقيتو شغال شفط في الشيشه ودخاخينو رابطه في السما الاحمر كلمتو يتكلم معاها قال لي بصوت تخين كدا خليها تنادي ليك سماهر ياسلمونتي ماتبقي زول كئيب كدا
خليك ريلاكس ياسلمونتي وارخي جسمك للحقنه اها خمسه دقايق مافي خلوصه حبيبة تكنو جات جاريه ومعاها واحده منحفشه زي ضكر البط كرش وضرعات ورقبه محززه السيف مايقطعا عباره عن مصارع وشايله ليها شافع راسو مطاول زي الزير وفرحانه تكورك وينو هو وينو هو لموني فيهو بس اعوذ بالله من دي حاله ياربي
اها قالوا ليها ياهو دا فااا عاينت لي كدا وقالت ليهم هو مضمضم ومصمصم كدا؟ ياود فر نفسك شويه واطرح جسمك حبه بس لكن خدرتو واااااي ياخلوصه انا نوع الخدره دي ياهو الببوظ اعصابي يلا اترزعت مقابلاني وبقت ماشه منعصره علي قالت لي اسمع هنا قبل اعرف اسمك قالوا البخجل من بت عمو مابحملها
اها اجيبا ليك ع بلاطه انا مطلقه بالمحكمه بعني عذبا راجلي ابو هيثومي دا كاتل ليهو زول ومسجون وانا اطلقت منو وهو مسجون اسمعني انا مستعده اسكن معاك في اي حته ان شاءالله راكوبه ماعندي اي قشه مره بس انت قول خير وتعال نتلم وسلمني نفسك تسليم اهالي بدون مقاومه وشوف انا ح اعمل فيك شنو
اها قلت شنو حبيبي انا؟ قلت ليها انا يومي اسود زي السجم والفحم راجلك كاتل ليهو روح ومسجون وانتي اتطلقتي منو بالمحكمه وعايزاني انا اعرسك عشان اول مايطلع من السجن يكتلني انا ويرجع تاني؟ وشنو انا مستعده اسكن معاك في اي حته دي كمان؟
هو انا لو لاقي لي حته اسكن فيها كنت جيت للكلب الاسمو تكنو دا ابيت معاهو في ورشتو ويقوم هو يجيبني ليك هنا؟ يابت انا مشرد ومطرود وماعارف اطير ع وين قالت لي ولا يهمك تعال اسكن معاي في بيت عمتي نعمات راجلها مقبوض بشحنة بنقو ومحكوم مؤبد وقاعده براها
بس قول لي ليك اللحم ولي العضم ياسماهر تعال جاي انت قاعد بعيد كدا مالك؟ بقيت الملم في هدومي واستر في روحي قلت ليها ماجاي وخليك قبلك اوعك تتحركي قالت لي انت ليه بتعمل كدا؟ انت ماضيك ماكويس ولا شنو؟ قلت ليها انا برضو الماضيني ماكويس ياتافهه ؟ قالت لي شوف حتي هيثومي حباك واعتبرك بابا
قلت ليهو الببو اليشقك انت وهيثومي بتاعك دا هو دا هيثومي هسي؟ في زمتك هيثومي قاعد ليهو وين في راسو دا؟ والله لو ناس هيثم عارفين انو دا اسمو هيثم كانوا انتح.روا نطت خلوصه اللهي وانت جاهي خلوصه تخلص روحا الليله قبل بكره ياربي قالت لي عرسا يا سلي ايه سماهر والده جاهزه
ماح تتعبك بالولاده وبرضو فقعتا ضحكه فا.جره وتشفط في الشيشه مع تكنو ياحليل تكنو ياخ رقد لي رز يلا سماهر بقت تبكي وتعوص قالت شافت فيني ابو اخوان هيثومي وقامت من سريرها وجات قعدت جمبي قمت زي القرصتني عقرب مشيت قعدت جمب تكنو لقيت خلوصه بتطقطق ليهو في اصابعيهو طق طرق
وتفجخ ليها في لبانه في خشما فجخ كأنها بتاكل في خاطرها وتكنو مسخسخ وهابط كأنو طالع من عملية قلب مفتوح قلت ليهو قوم يازول امرقنا من هنا ياخ نطت خلوصه قالت لي تمرق وين؟ هو دخول الحمام زي خروجو؟ اترزع قبلك لحدي تتعشوا معانا تعالي ياسماهر شوفي جوزك دا وبرضو فقعتا ضحكه افظع من الفظاعه
فجأه كدا جا واحد قدر التور قطع شلوت في الباب لمن قلعو من حيطتو ومعاهو واحد تاني سبحان الله عباره عن غوريلا اها خلوصه صرخت واااااي اخوي جا اها عينك ماتشوف الا النور اخوها لقي تكنو شبه غمران في السرير وانا واقف ليهو جمب راسو بدون اي مقدمات صمطتني بقعر يدو في خشمي
وكيلك الله لمن قربت ابلع لساني قولة تاح في خشمي لمن وقعت ع قفاي مستحيل تكون دي يد انسان ومسك تكنو من لياقة الابرول رفعو فوق ونتحو بونيه في نخرتو لمن شخر وجرا شفاطه هيييييغ ووقع جمبي ماسك نخرتو وهو يصرخ في شنو في شنو؟ ليه كدا ليه كدا؟ شكلو البونيه دي عملت ليهو ارتجاج في المخ
يلا اخو اخلاص والمعاهو اللسه مااتشرفنا بمعرفتو دا جونا وراء السراير ولقونا راقدين دكوه والله دقونا دق وبتونا بتن صرخنا ماعرفنا شي وبكينا ماعرفنا شي وغمرنا ماعرفنا شي وصحينا تاني ماعرفنا شي واخر شي قالوا يحرقونا هنا وبس واحد قام جاري يجيب النار
وقال للتاني اجري جيب الجنزير من المخزن بسرعه طبعا لمن سمعت الكلام دا شميت ريحة شية الجمر بنخرتي دي فاااا تكنو صرخ وااااي وقام مفحط بنمره خمسه ويكورك خارج نفسك ياسلمونتي هو مسكين ع فكره لمن قال كلمتو دي انا كنت بره البيت اصلا و كملت الشارع الاول وبديت في التاني فااا لحقني بالموتر
غرفني ليك جابني الورشه انا وهو عباره عن ناس كانوا عاملين حادث قفلنا الورشه علينا وبكينا بكا لمن قربنا نعمي الظريف في الموضوع انو تكنو جاب معاهو الجلخه راجعه في جيب الابرول الحمدلله ع ما اراد الله .
للكاتب (سليمان الجعلي ) ♥️
جاري تحميل الاقتراحات...