الناس فاكرة إن الاكتئاب والألم النفسي، هو اللي بيشوفوه في الأفلام بس، تبقى لابس جلابية ودقنك مترين وشعرك منكوش، وتحت عينيك سواد.
مع إن انعزالك في غرفة لوحدك، طول اليوم، بعيدًا عن أسرتك اللي هي المفروض أكتر حد قريب منك، مؤشر خطير على إنك مكتئب.
..

والمؤشر الأخطر إنك ميبانش عليك علامات، بمعنى إنك تقنعهم بإنك طبيعي، وإنت من جواك مش طبيعي، فبيفهموا، إنك طالما بتاكل وتشرب، فإنت بكدة طبيعي جدًا، وميعرفوش إن الموضوع أبعاده أخطر.

تعرف إنك في ألم نفسي لو مبتحكيش لحد حاجة خالص، أو محتفظ بالكلام لإنك مقتنع بإنك لو قلته مش هتلاقي حلول، أو اقتناعك بإنك لما تحكي هتبان ضعيف وإنت رافض حاجة زي دي.

تعرف إنك في ألم نفسي، لما حد يدخل حياتك يدمرها بعد ما وثقت فيه، أو إنك كنت راسم لنفسك أحلام كتير، تكتشف إنك محققتش أي حاجة منها، وتتفاجئ بإنك وصلت لعمر، خلاك تصدق إنك تايه وملكش هدف.
أغلب الشباب، سواء بنات أو ولاد، بيعانوا من اكتئاب للأسباب المذكورة دي، وأسرهم مش مدركين ده.