انا عايش في نيقوسيا وتحديدا في الشريط الاخضر اللي بيفصل الجريك عن الاتراك جيراني البيوت اللي بيعيش قوات حفظ السلام وبما اني بقيت قبرصي ما قبل التقسيم فأنا اقدر ادخل اي جزء في الجزيرة بما فيهم الأراضي الإنجليزية بما اننا معانا باسبورات انجليزيه كمان
الناس هنا لطيفة وهادية بشكل مبالغ فيه ، حرفيا مفيش حد مبيضحكش و مش بينبسط بيحبوا يستمتعوا بحياتهم و بلادهم الجميله بحر وخضرة وجبال و اثار تاريخيه توصل للحقبه الفرعونية كمان ، ميكس شرقي على غربي معتقدش هيبقي موجود في اي حته غير على الجزيرة دي، اندماج مع الطبيعة اللي حواليها.
الناس متوسط أعمارها كبير ، أن الواحد يوصل ٩٥ سنه دا شئ عادي ، اهتمام الأسرة بأفراد عائلتهم كبار السن مثير دايما لاعجابي وبيكون مش بس اهتمام مادي لا اهتمام بكل تفاصيل الحياه أنه يعيش حياته زي الشاب بالظبط ، رياضة وخروج وفسح و طبعا صحي. الناس هنا ٩٠ سنه وبتسوق عربياتها عادي
اللي بيوصل سن المعاش حياته مش بتنتهي دا بيبدأ مرحلة الدلع حرفيا ، عربيه جديدة ، بيت على البحر ، بعد دوشة وصخب الدنيا بمشاكلها ، كل واحد في حاله بشكل مستفز ، محدش هيتدخل في حياتك أو حتى في موقف بتمر بيه الا لو طلبت انت فجأة بيتحولوا لخدومين جدا
بيحترموا المغترب اللي زي و بيحبوه وبيدعموه كمان لما يلاقوك حابب ومتحمس لبلدهم و بتحبها زيهم ، حاولت الاقي فروق بين الجريك والأتراك ملقتش غير الديانة بس ، الملامح واحده العادات واحدة والاتنين عايشين في ميه البطيخ ، القبارصة الاتراك مبيعتبروش نفسهم اتراك
مختلفين خالص عن الاتراك اللي نعرفهم ، اتاثروا اكتر واندمجوا في الحياة الاوروبيه والثقافة ، طرفي الجزيرة كلهم ناس متعلمه ومثقفين جدا جدا ، اعرف أشخاص بيجمعوا اكتر من دكتوراه في مجالات مختلفه مع بعض يكون دكتور في الطب و درس حقوق واخد فيها دكتوراه كمان مثلا
التعليم عندهم مقدس مهم مرتبة اولى ، الطفل هو أهم واغلى شئ في الجزيرة ، متوفرله كل سبل الراحه والرفاهيه و الدلع ، شعب مسالم جدا و اعتقادي الشخصي أن جمال طبيعتهم هو السبب الرئيسي في جمال تكوينهم الشخصي ، الراحة اولا عندهم لدرجه انك تفكرهم كسولين مش بيحبوا الشغل
بس تكتشف أنه لا مينفعش يبقي عندك مشكله وتروح الشغل ، روح حل مشكلتك والشغل مش هيطير و هنسد مكانك متقلقش المهم تيجي الشغل مبسوط ورايق و بتضحك.
زهقت من الكتابه بس حسيت اني رايق قولت اقول كلمتين احاول اوصف فيهم جزيرة لا كانت علي البال ولا الخاطر عمرها في خططي
زهقت من الكتابه بس حسيت اني رايق قولت اقول كلمتين احاول اوصف فيهم جزيرة لا كانت علي البال ولا الخاطر عمرها في خططي
جاري تحميل الاقتراحات...