تجربتي الشخصية مع تقليل الوزن : أنا عمري ٥٣ و شهور و طولي ١٨٦ و عندي سكر و ضغط و ارتفاع في الكولسترول و طبيعة عملي stressful جدا، كنت رياضي و وزني معقول لغاية سن ال٣٠ و بعدها بسبب الانشغال و الstress وزني بدأ يزيد وكنت باكل كتير و جالي سكر و مشاكل في ضربات القلب AF و دخلت العناية
،عند سن ال٤٥ وزني وصل ١١٥ و يمكن اكتر و ماكنتش باعرف ألعب رياضة ومش عارف ألبس اللي نفسي فيه و باعرق بغزارة، و حاولت كذا مرة أخفف وزني بس كنت بافشل لأني كنت عايز نتيجة سريعة، من سنة ٢٠١٩ قررت أغير الطريقة ، اتبعت نظام صيام متقطع صارم يبدأ من ١٢ بالليل و يخلص ٤ أو ٦ مساءً حسب قدرتي
خلال الصيام ممكن أشرب قهوة شاي بدون سكر أو لبن و مية كتير طبعا و باتغدى الساعة ٤ أو ٦ غدا عادي بس قللت النشويات شوية لكن باكل حتى الشبع و ممنوع snacks في النص لغاية العشا اللي بيبقى خفيف بدون نشويات و من غير فواكه كتير برضه، ده بالإضافة للحركة الكتير، باعمل مشاويري مشي بمعدل في
الأول ٥ كيلومتر في اليوم و بيوصل ساعات ل١٠ كيلو مع ممارسة رياضتي المفضلة الباسكت مرتين في الأسبوع لمدة ساعتين في المرة و مع نقصان وزني بقيت باقدر ألعب أحسن و أكتر كفاءة، في سنة نزلت ٢٠ ك و السكر اتظبط أكتر و الرياضة بقت أسهل و بقيت أكل عادي مع تقليل النشويات و شبه منع للسكر من
غير تقيد بأي نظام غذائي، كل اللي فات ده صيام متقطع مقلوب و مشي و رياضة، جت كورونا صعبت شوية الموضوع و بطأت نزول الوزن لقلة الحركة، وصلت بعد ٣ سنين لوزن ٨٧ ك، من ٦ شهور جالي بسبب الباسكت قطع في الرباط الصليبي و طبعا توقفت الحركة و الرياضة لغاية من شهرين لما بدأت أعمل تمرينات تقوية
لعضلات الفخذ في الچيم لتأهيل ركبتي المصابة، لعبت حديد (و كنت بالعب قبل كده زمان بس انقطعت) المرة دي لعبت على قد سن عضلاتي و مفاصلي تقريبا ساعتين ٣ مرات في الأسبوع شهرين دلوقتي ، نزل وزني ل٨٢ مع تظبيط لشكل الجسم، بسبب إني بافقد دهون أكتر مع اكتساب العضلات قوة و شكل أحسن، في الساعة
الواحدة في الچيم ممكن تفقد لغاية ٣٠٠ كالوري حسب الأوزان اللي بترفعها، و بقيت باكل بحرية أكبر، الفكرة إن الصيام بس بيحرق جلوكوز الدم و الجلايكوچين اللي متخزن في الكبد و علشان يحرق دهون لازم يبقى طويل قوي و ده صعب، المشي و الرياضة بتعمل كده برضه بس مش بتوصل ل٣٠٠ كالوري في الساعة
لكن التمرين بالحديد (مش لازم أوزان عالية و السيدات ممكن يلعبوا على أجهزة مناسبة) بيحرق في ساعتين مثلا ٥٠٠ كالوري يعني حيحرق لك جلوكوز الدم (الأكل اللي لسه واكله) و جلايكوچين الكبد (مصدر الجلوكوز السريع في حالة الصيام) و يدخل على الدهون المخزنة في جسمك فبتخس فعلا و تظبط شكل جسمك
عذرا للإطالة ، بس الخلاصة الموضوع عايز وقت و صبر و التزام و حرمان خفيف من الحلويات و السكر بالذات ، أنا ماعملتش أي نظام ثابت في الأكل ، النزول في الوزن بيكون سريع في الأول لكن بيبطأ بعد كده و الأهم من الوزن هو شكل الجسم و تناسقه ، و شكرا
جاري تحميل الاقتراحات...