من حدود السنة جالي كلاينت ١٣ سنة كان ١١٥ كيلو ، اتكلمنا شوية و لقيت انه بيشوف فيديوهات كتير تخص التغذية و ان الكارب حاجة وحشة و هو سبب زيادة وزنه و انه لازم يعمل صيام متقطع و غير كده مش هيخس الفكرة انه كان بيكمل و يقول انه مش قادر يعمل دا و تعب من المحاولات و عاوز حل
حاولت افهمه ان الكارب مش سيء و انه مش سبب زيادة وزنه و المشكلة كلها ف نظام اكله و انه لازم ياكل كل العناصر و قولتله نجرب سوا و نشوف و عملته نظام متوازن و بعدها ب اسبوعين اتقابلنا و لقيته قالي انه شال الكارب من كل الوجبات عشان مش هيخس من غير ما يقطعه و ان كل الدكاتره بتقول كده
و قال اسم واحدة مشهورة بالزيرو كارب و الكيتو و الصيام المتقطع و الهرمونات و الانسولين و انه مقتنع جدا بكلامها و انها الصح و انتهينا انه براحتك اكيد مش هجبرك علي نظام و اعمل الي يريحك ، من يومين قابلته تاني كان بيعمل انبدي و المفاجأه ان وزنه بدل ما كان ١١٥ كان ١٣٥ و مبسوط و بيقولي
عملت كيتو مع صيام متقطع و خسيت ٥ كيلو ف اسبوع و اد ايه هو نظام صعب بس هكمل و هستمر ، المشكلة انه مأخدش باله ان كل مره بيحاول بيضيع وقت اطول و كل مره بيحاول بيبدأ من وزن اعلي من الاول و ان كل مره بيحاول بيخسر كتلة عضلية اكبر و كل مره بيحاول بيقلل فرصة انه ينجح او يستمر و كل دا
بسبب السوشيال ميديا و الاشخاص الي بيوجهو الناس لأنظمة تبهرهم بنزول الوزن ف الاول و بعدها يقوله لو عاوز تحافظ علي وزنك ف انت هتعيش طول عمرك كده و ف الحقيقة مفيش شخص سوي هيعيش حياته زيرو كارب مهما كان بياكل بروتين و فاتس ف يومه عمره ما هيكون مبسوط ف النتيجة انه هياكل بشراهه اكتر
و يرجع وزنه يزيد اكتر و الابشع انه عمره ما هياخد باله ان المشكلة ف الدايت مش فيه هو و ان كل محاولاته لإستجماع قوته هتفشل تاني و تالت و الف لحد ما تنتهي و يستسلم لفكرة انه مش محظوظ و ان عمره ما هيخس و انه كده عمل الي عليه و محدش يلومه بس ف الواقع هو ملوش ذنب غير انه وثق ف اشخاص
جايين يصدرو افكار عكس الكون و الطبيعة البشرية و بيقولك انك مش هتخس غير كده و طبعا بما ان معندكش حلول ف هتحاول تلتزم ميت الف مره و يمكن يحصلك مشاكل من الاكل و تخاف تاكل اي كارب طول حياتك او تكره الاصناف الي بتاكلها و الاتنين نتيجتهم واحدة انك هتفشل و مش هتعرف المشكلة ف ايه.
ف للمره الالف مفيش حاجة مسئولة عن زيادة وزنك لا الكارب ولا الفاتس ولا السكر ولا أي حاجة غير انك كل يوم بتاكل اكتر من الي جسمك محتاجه ايا كان مصدره و مفيش حل ابدي غير انك تقرر تغير من لايف ستايل حياتك ف متخليش حد يستغل عدم علمك و يوجهك لنظام عكس الفطره البشرية.
جاري تحميل الاقتراحات...