المهم بقى لما روحت الحسين علشان أدور على اكسسوارات فيها أحجار كريمة زي ما قولتوا لي، أدركت بشكل عملي اللي مفكري العصر الحديث قعدوا يحذروا منه بخصوص انفصالنا عن السلع اللي بنشتريها وتأثير ده علينا وعلى استمتاعنا وتقديرنا للسلعة نفسها..

أينعم أنا مازرعتش ولا طلعت الحجر من الأرض بنفسي بس مجرد المشاركة في عملية اختيار الألوان والأشكال والتصميم ومحاولة تفرقة الخامات الحلوة من الوحشة والتعامل مع أكتر من مُقدم للسلعة للوصول للنتيجة النهائية ممتع جدًا على الرغم من أن العملية بتتطلب وقت أطول ومجهود أكبر..

ممتع علشان الواحد حس أنه اشترك في صنع سلعته بشكل ما وأنه عمل حاجة خاصة بيه بعد ما شاف الخامات بعينه ومسكها بإيده (مش مجرد شكل أو صورة عجبته أونلاين لسلعة مكررة)، ده غير أن التعامل مع مقدم السلعة وجهًا لوجه تجربة إنسانية لطيفة ابتدينا ننساها في عصر الشراء الإلكتروني..

وبعيدًا عن السفسطة الإجتماعية دي، دخلت محل "لضّام" (الشخص اللي بيلضم الأحجار اللي اشتريتها بالشكل والمقاس اللي أنت عايزه) والراجل كان قاعد بيشتغل مع عيلته، تقريبًا مراته وولاده واتنين صنايعية، في مكان صغير بس القعدة كانت في منتهى اللطافة وكنت عايزة أقضي بقية اليوم عندهم والله 😄