رتبها

لو طالع مدينة " دهب - جنوب سيناء " ف خدلك بصة ع الثريد دا من واحد عايش فيها بقاله خمس سنين بتاع سياحة جواها .. هخليك طالع بالسعر الكويس و تتفسح و تظبط دنيتك

اولاً دهب مش زي أي مدينة سياحية تانية في مصر ، دهب ليها طبيعتها لوحدها .. قعدتها مش زي فنادق شرم الشيخ و الغردقة و مرسى علم و الجونة .. الدنيا هنا في البسيطة خالص و موجود كام فندق ع الرايق بردو باسعارها هقولك عليهم في الاخر .

دهب بتجمع ما بين اجمل تلات حاجات ، الحياة البحرية و الشعب و الاسماك و بتجمع الجبال و الصحراء و الحياة البدوية و الاهم منظر السماء و النجوم بليل و كل دا مع الهدوء بيجبلك راحة نفسية و انك بتقدر تعيش كذا مود في كل حاجة من دول

هنبدأهم بالانتقالات .. ازاي انك تروح و تيجي من دهب بكل الطرق
في طبعا العربية امتع حاجة و اسرعهم 😂
الGo bus و شرق الدلتا متوفرين بشكل يومي
او هاي اس زي Bus misr و Swvl و we bus
او الاوفر من كل دول تحجز مع شركة سياحة انتقالات ذهاب و عودة ارخص و اتوبيساتهم حلوة و سهل اظبطهالك

الاقامة في دهب ( كامبات في الممشى - فنادق مالهاش نجوم بس في الممشى - فنادق ب3 و 4 نجوم بعيد عن الممشى و يتقال عليها فنادق- شاليهات - ستوديوهات )
انتو لو جروب صحاب و عايزين في التوفير يبقى عليك و على كامب في الممشى تكون الغرف كويسة و بحمام و قعدته رايقة و عشان اللي توفره تتفسح بيه

مش بعترف بحمامات السباحة في دهب عشان كدا كدا عبارة عن ماية بحر متحلية و عليها كلوز ف مش هتحبها .. ف فكك من الفنادق الصف التاني الا لو انتو عيلة و لو نازل فندق في الممشى يبقى شوف فنادق سي فيو لو هاني مون هيبقى لطيف هسيب الاسامي للاخر

اياً كان الفترة اللي هتقعدها متبقاش ااقل من 4 ايام عشان تاخد وقتك في كل حاجه يعني و متبقاش مستعجل .. اوصل و ربح شوية و انزل اول يوم كدا خد اي عربية و روح شاطئ الاجونة ، احضر الغروب ، قعدة ع الارض ، انزل الماية ، بيبقى في احصنة و اي بدوية قاعدة تعملك زردة و تروق شوية و تروح

او روح ع بليل و معاك خشب و تولع ناز و تشوي اكل لو مبتعرفش اب سواق بدوي توقفه تركب معاه و تتفق معاه يشويلكو و شاي و يظبطلكو القعده و تقعدو تشغلو مزيكا تتفرجو ع النجوم مع النار .. في قصص في الاجونة لازم تكتشفها 😂🔥

في رحلة كدا ممكن تحجزها مع اي مكتب سفاري من الممشى بتبقى ابوجالوم و بلو لاجون و بلو هول .. يوم كامل بتستمتع بيه بالاسنوركلينج و حلاوة كل بحر في دهب غير التاني و بنروح بعربيات جيب و لانشات و نص نقل .. يوم سفاري و بحر بطريقة ممتعه و فرهدة بروقان .. البلولاجون بيقول مالديف مصر 💙

البلوهول دا تاني اجمل مكان للغطس في العالم ، احنا بنعمل سنوركلينج بس عشان عمق 110 م 😂 ، بلايف جاكيت و ماسك بتتفرج ع الجمال اللي في بلدك بجد لمدة ساعة الا ربع بتاخد راوند من شق التعبان لحد البلوهول ❤️ ابو جالوم منطقة سنوركلينج بردو بس على عمق ٤ متر و القعدة بتاعتها رايقة

القعدة في البلولاجون بتبقى كدا ، اكواخ على البحر ، هبت معاك تبات ليلة الفرد في رينج ال200 بالعشاء ( غير تمن الرحلة ).. و مفيش شبكة ولا نور .. منك للطبيعه وراك جبل قدامك بحر و نجوم و قصة عايش فيها مع نفسك ، الحمام هناك خارجي كدا مالهوش سقف ، تبقى في الحمام فوقيك نجوم بليل 😂❤️

اليوم دا بليل متضيعهوش ، احجز مع اي مكتب بردو سهرة جبل الطوليات ، بتجيلكو عربيات تاخدكو لحد خيمة بدوي في الجبل ، بيبقى فيها فاير شو و تنورة و قعدة غناء بدوي و بينزلك الزردة و الDJ شغال .. بتخلص ع الساعه 12 انزل لف في الممشى شوية هات هدايا تذكار تفتكرها ❤️

اكتشف مطاعم .. لو فطار يبقى المصريين و يم يم في المشربة بيعملو فطار مصري عادي بسعد حلو .. او german bakery في الايت هاوس او المشربة .. و اغلب الكامبات و الفنادق بتنزل فطار اصلاً .. روح اقعد ع اي كافيه ع البحر و افطر اسعارهم مش غالية اصلاً

لو جاية معاك ب يخت في دهب ف اطلع الفترة المسائية ، تحضر الغروب من البحر و حواليك جبال كدا بيبقى قصة 🔥 .. بتنزل ساعتين الماية و يشغلواك DJ و بيعملو حفلة مسائية ع حسب اليخت طبعاً .. ابقى اسال ايه العروض و شوف اللي يعجبك .. او لو عايز دايفينج و بحر كتير اطلع الصباحية

الثري بولز : منطقة سنوركلينج بتنزل تتفرج ع الشعب و الاسنوركلينج منطقة حلوة .. بتبقى كافيهات ع البحر بتاخد عربية توصلك لهناك و بتقعد من غير مينيمام .. ممكن تطلع سفاري لوادي جني بالبيتش باجي من هناك ، تقدر تنزل دايفينج ، تركب جمال .. الصور هناك تحفة .

دفي يوم اسمه وادي الوشواش و راس شيطان .. دا بتحجزه من اي مكتب سفاري و بيبقى Day use لطيف ❤️ وادي الوشواش دا عبارة عن بحيرة اتكونت وسط الجبال من الشتاء ، بنطلع ع الجبل و ننط عليها من ارتقاع و حلوة 😂 و بنرجع ع راس شيطان نقضي اليوم في الكامب ع البحر و نتغدى بعدها نرجع ع دهب

دا سواق الاندكروزر عشان بنخش وسط جبال و كدا ، كان راجل تمام و شربنا سجارة تمام ☠️

النايت لايف في دهب مش اد كدا ، يعني مفيش نايتات الا بار كدا اسمه blue beach ع الهادي .. عايز نايت ، جمعن انت و اصحابك عربية هاي اس توديك شرم ساعة زمن بقيت في احسن نايت في مصر و ساعة تانية ترجعكو ع الفجرية مثلا و ظبطنا المود و كله حلو 😂

عشان لو اعبت من القراية و بتفكر تطلع بعدين ممكن اظبطلك كل دا بسعر حلو ، انتقالات و اقامة و رحلات بتنظيم شركة Moves Up -aadventure او movesupp على انستا و دا رقمي 01558588664 ابعتلك التفاصيل .. في رحلات بتبدا من 900 ج في الصيف ال٤ ايام ( نقل باقامة برحلات فري جوا )

بص الاكل في دهب مش غالي و كل حاجه هناك بسعر اسكندرية و القاهرة ، هتاكل وجبه فراخ بالرز بالسلطة بكله 50 ج .. كينج تشيكن بقى او الشرقاوي في العسلة عايز قعدة بحر يبقى مطعم علاء الدين .. اسماك يبقى عروس البحر ، عايز قعدة ع البحر يبقى مطعم نيمو للاسماك ..

مطعم اثانور في الايت هاوس بيعملك باستا و بيتزا ايطالي حوار عشان هو مطعم ايطالي و اللي شغالين بردو .. كريبات و مكرونة فرن يبقى اليكس وان في المشربة .. سندوتشات يبقى البورسعيدي بتاعت الكبدة جمب يم يم و كينج تشيكن .. بتخش تقولها يا خالتي هتحبك اوي و تظبطلك السندوتش

كامبات في اسعار المتناول البيشبيشي - بينجوين بالم - دهب مون - اوسكي ، فنادق العالية اللي بعيد عن الممشى في ايكوتيل و سويس ان و تروبيتال و تيرانا و طبعا الميريديان ❤️ ..

لو حد عايز يسال عن اي حاجة او محتاج اي حاجة في دهب ينورني طبعاً .. و في اي وقت تقدر تعدي على كامب البيشبيشي و تسأل عني و عنيا ليك ❤️

نتكلم عن الشاليهات شوية ، و الشاليهات يبقى منطقة العصلة - دهب .. دي المدينة بتاعت الناس اللي عايشين في دهب - مش الممشى السياحي .. الشاليهات اغلبها ع البحر و فيو الشاليهات سواء قمر او الشروق بيبقى كدا ❤️ نفس الفيوهات دي بتبقى الفنادق الصف اول بحر و اسعارها مش غالية كاها

ممكن لو يوم صحتك جايباك فيه تطلع سانت كاترين من هناك بحوالي 350 الرحلة بالجايد البدوي كلها ساعه و نص من دهب لسانت كاترين بتتقل هدومك و اكلك و تتحرك على جبل موسى و تطلع لاجمل فيو شروق في مصر ❤️ و بنزور دير سانت كاترين و الشجرة المعلقة و نرجع دهب بتبقى من ١١ بليل ل ١١ الصبح

اهم حاجه في دهب و دي هتفرق مع ناس كتير ، الامان و الدفا اللي فيها و ان انت حرفيا محدش بيركز معاك في اي حاجه انت بتعملها اياً كانت .. انت حُر ما لم تضُر .. و امان لاي بنت طالعة لوحدها .. الناس كويسين و فريندلي ، امان لاي حاجه تسيبها و تغفل عنها مش هتتشرق منك متقلقش ، اتطمن هنا

اتعود و انت في اي حته هتلاقي حبه من كلاب شارع ع كلاب مالهاش صحاب بقو بتوع شارع .. بس انضف و اجمل و اطيب كلاب و ياااه لو اكلتهم .. يوصلوك بيتك و يتطمنو عليك يوميا لحد ماتروح ❤️😂 ف اتعود ع تكيف معاهم هنا

لا تأخذ شئ الا الصور ، لا تترك شئ الا ايار الاقدام ، لا تقتل شئ الا الوقت .. مدينة دهب جميلة و عايش معاك اجانب كتير بيحافظو على البلد و الشعب المرجانية و السمك من البلاستيك و غيره .. ف انت كمان نضف مكانك و متستخدمش البلاستيك جمب البحر ، اعكسو صورتنا الحلوة للعالم فيها ❤️

عشان ناي كتير بتسألني عن اسعار الرحلات .. التفاصيل و الحجز بتتواصل مع اي رقم من دول ، او بتيجي المكتب تنورنا و لو من محافظة تانية اتصل بينا .. دي اسعار شهر 5 و 6 و كام يوم و هنزل اسعار العيد الكبير و الصيف 💙 البيدج ع الفيس Moves Up - Adventure على الانستا movesupp ..

قعدة كافيهات الممشى انت لازم تلف كدا و تجرب و تشوف ديكور كل مكان و حلاوة البساطة اللي فيهم .. عادي تخش في اي مكان و تتصور و تمشي و هيرحبو بيك عشان تبقى تيجي تقعد عندهم ❤️ .. تقدر تروح اي كافيهفي الايت هاوس ليه نزلة شاطئ و.تقضي يومك هناك، او ممكن في اماكن نزول بحر فري في الممشى