ثريد عن ازاي تتعامل مع الاكل ف العيد
المناسبات ف مجتمعنا مرتبطة دايما بالاكل ك جزء من الاحتفال ف هتلاقي ان في تجهيزات مسبقة للاكل زي الوجبات الرئيسية الدسمة و الحلويات زي الكحك و البسكوت و البتيفور و الانواع التانية الي متفرقش عنهم كتير ، و كل دا ما هو الا سعرات فاضية مفيش فيها اي قيمة غذائية ليك و لو زودت فيها
هتكون سبب ف زيادة وزنك عشان هي بتتصنف من ال caloric dense food يعني بتاخد اكبر كمية سعرات ب اقل كمية ممكنة ، هل دا معناه انك تبعد عنها و متاكلش منها ؟ اكيد لا، اكبر ضرر من انك تمنع نفسك عنها هو الضرر النفسي انك هتحس انك لوحدك مش عارف تشارك اهلك و صحابك و مهما كنت مؤمن ب هدفك
و مركز انك توصله هتلاقي انك مضايق عشان مش قادر تشاركهم و هيكون تأثيره النفسي سيء عليك و لو فاكر انك قدرت تبعد عنها انهاردة ف انت تراكمات الحرمان دي نفسيا هتخليك تفقد السيطرة و تخرج عن البلان مع انك بتحاول تلتزم بس انت عمرك ما هتبقي اقوي من عقلك و تحكمه ف هرموناتك.
ف تعرضك لكل المؤثرات الاجتماعية دي حتمي و هيحصل ف بدل ما تهرب منها اتعلم ازاي تتعامل معاها عشان تقدر تفضل مسيطر علي عقلك و بتتعامل معاه بذكاء من غير ما تحاول تستريس عليه عشان صدقني انت الوحيد الي هتخسر هنا ف ف الكام تويت الجاية هساعدك ترتب الدنيا و تعرف ازاي تهندل كل حاجة
هتبقي محظوظ لو كنت طبقت التويت الي كتبتها من كام يوم لما قولت وفر ١٠٠٠ ولا ٢٠٠٠ كالوري للعيد من سعرات اخر اسبوع ف رمضان ، دا هيديك حرية اكتر بسبب ان عندك سعرات اكتر لكن لو معملتش دا ف مفيش مشكلة ، اول حاجة هتعملها انك هتاكل سعرات الثبات بتاعتك و هنوقف عجز السعرات ال٣ ايام دول
لو مش عارف سعراتك ف لو فيميل كلي ١٨٠٠ كالوري و لو راجل كل ٢٢٠٠ دول ارقام هتمشي مع اكتر من ٩٠% من البشر ايا كان وزنهم ، نظامك الغذائي زي ما هو بروتين عالي حاول توصل ل جرام لكل سنتي من طولك هيساعدك تبقي شبعان طول اليوم و لما تبقي شبعان هتقدر تحدد انت محتاج تاكل ايه و تحكم صح علي
قرارات شهيتك و بالتالي كل ما كان عندك وعي اكتر ف هتقدر تختار احسن ، تاني حاجة اشرب ميه ٣ لتر ف اليوم و خصوصا بعد الوجبات عشان تزود احساس الشبع عندك ، ف لو عاملين مكرونه بشاميل حط جنبها ٢٠٠ جرام صدور فراخ و كل الاتنين و ابدأ بصدور الفراخ و هتلاقي انك اكلت كمية اقل من البشاميل
من غير ما تحرم نفسك ولا تحس بالذنب ولا تاكل كمية اكبر ، البروتين هيشبعك اجباري و قيس علي كده كل الاصناف و اهم حاجة انك متاكلش من طبق رئيسي ، اكلك ف طبق خاص بيك بكمية ترضي عينك و شهيتك و جنبها البروتين بتاعك ، لما تحس انك شبعت بطل اكل مفيش سبب انك تكمل الا لو دي اخر وجبة ف حياتك
قرر اذا كانت هتاكل حلو او كحك بعد الوجبة دا هيخليك واعي اكتر لشهيتك عشان انت شبعان ف لو حسيت انك محتاج تاكل ابدأ ب قطعة و ابعد عن الطبق الرئيسي و اشرب معاها اي حاجة تساعدك تكون شبعان اسرع و تاني متعرضش نفسك انك تاكل من طبق رئيسي و خصوصا و انت ف تجمع و مشغول بتتكلم مع حد عشان ١٠٠%
هتاكل اكتر من احتياجك و ترجع تستوعب دا بعدين ف و انت واعي قرر الي انت محتاجه و ابعد عن الطبق الرئيسي ، و حدد كمية من اول اليوم مثلا انت بتحب الكحك ف هتاكل ٣ بس و افتكر دايما ان طول ما انت مخطط لوجباتك مسبقا ف انت هتفضل مسيطر لكن لو لسه بتفكر هتعمل ايه ف عمرك ما هتتحكم ف حاجة اصلا
لو مش بتحب صنف متاكلش منه و لو حد عزمك عليه عادي اكسفه و قوله مش محتاجه و مش عاوزه ، و لو حد اتريق و قالك احنا ف عيد و فك من الدايت او علق علي انك بتحاول تلتزم ف لازم ترد رد قاسي يخليه ميكملش و لو خايف علي زعله ف متزعلش انت لما يكون سبب ف احباط ليك بدل ما يكون دعم ليك ولا هو بس
الي عنده مشاعر و هيزعل لما تكسفه و انت تتفلق عادي ؟ لازم تتعلم تحمي حدودك من اي شخص حتي لو كان شريك حياتك و تفهمه انه لازم يكون مصدر دعم و سند ليك مش العكس و دا ابسط حقوقك من دوايرك المقربة انهم يساعدوك توصل لأهدافك الي بتسعي ليها حتي لو دا مش ضمن اهتمامتهم ف خليك عارف حقوقك
نفترض انك اكلت اكتر من سعراتك ؟ اكلت ١٠ الاف كالوري ف ال٣ ايام زيادة عن احتياجك ؟ مش اخر الدنيا و مش هيحصل حاجة و بنسبة كبيره زيادة الدهون مش هتعدي ٢٠٠ ٣٠٠ جرام اصلا لكن هتطلع علي الميزان هتلاقي انك زايد ٣ ٤ كيلو عادي بسبب كمية الكارب و الصوديوم الزيادة الي مجرد ما ترجع لنظامك
هينزل عادي ف هو مجرد وزن وهمي ف متوهمش نفسك انت ، لو انت من محبين الحوادق و الرنجة و المخلل ف نفس الموضوع وزنك هيزيد و شكل جسمك علي الميزان هيتنفخ ٥ ايام و بعد كده هيرجع طبيعي تاني ف لو معندكش ثقافة ان الميزان ملوش لازمه و بيتعبك نفسيا ف ابعد عنه اسبوع، نقطة مهمة لو دكتورك مدربك
بيقولك ممنوع الكحك و امشي علي البلان ف دا ريد فلاج انك تسيبه عشان مش دا الشخص الي هيوصلك لهدفك و قصدي بهدفك هنا مش انك تخس بس عشان اي حد هيقلل اكلك و يعملك تمارين هيخسسك بس الهدف هنا انك تحافظ علي الوزن الي هتوصله بعقليتك الجديدة المتزنه الواعية للاكل ف انت مش ف سباق ولا حاجة
اخر حاجة حاول تحافظ علي نشاط بدني ف لو هتخرج مع صحابك اتمشي اكتر من الطبيعي او خلي الخروج فيه اي حركة حتي لو هتلعبو علي المراجيح او ترمبولين مثلا المهم تبذل مجهود يساعدك يبقي عندك حرية ف الاكل اكتر ، لو انت بتحب تقعد ف البيت خليك عارف ان دا هيكون سبب انك عاوز تاكل اكتر بسبب انك
فاضي و مش لاقي حاجة تتشغل فيها او هتتفرج علي حاجة و عاوز تتسلي احسن اوبشن هنا هو السويت كورن و الفشار ٣٠٠ ل ٤٠٠ كالوري هيكونو كفاية تاكل بيهم كمية كبيرة ترضي شهيتك و مفيش مانع من بيبسي دايت او اي مشروبات بسكر دايت تانية و لو بتحب الفاكهة ركز علي البطيخ و الفراولة سعراتهم لاتذكر
العيد مش كل يوم و لازم تشارك دوايرك الاجتماعية عشان متحسش انك لوحدك ، دا الي هيخليك تكمل و تستمر مش تحرم نفسك و تعمل مش شايف كل دا و انت من جواك هتموت و تشاركهم ، اعرف انك طول ما انت واعي لاكلك هتقدر تنبسط بيه تحت اي ظرف ولو زودت ف الاكل متزعلش مش نهاية الكون العمر كله معاك لسه.
جاري تحميل الاقتراحات...