ثريد الاسبوع دا عن دايت ايتن عامر
بالصدفة من كام يوم لقيت خبر عن دايت ايتن عامر ف جرنال مشهور و انها خست عليه لا و كمان بتحاول تساعد الناس و بقت nutritionist علي صغير كده و بترد علي رسايل الناس و تقولهم ياخدو الدوا دا و مياخدوش دا و يعملو ايه ف الدايت و ياكلو ايه و يمنعو ايه و الحقيقي ان الموضوع مأساه فعلا
تخيل انك جبت شخص ميعرفش حاجة ف القانون و وقفته قدام قاضي ف محكمة ف هل تتوقع انه هيقدر يترافع او يتكلم و يقول اي جملة مفيدة ؟ نفس الموضوع ف التغذية شخض عادي لايفقه اي شيء و يمكن متعرفش سعرات اي صنف بتاكله فجأه بقت تنصح الناس و توجههم و بتشارك الدايت بتاعها و بتقولهم امشو عليه
بالنسبة لمواطن عادي هيشوفها اد ايه هي شخص رائع و انها بتحاول تساعد الناس و توفر عليهم تمن الدكتور لا و بتصورلهم الدايت بتاعها و بتقولهم يعملو ايه كمان و ايه ممنوع و ايه مسموح و ياخدو ايه و الكمية اد ايه و ف الاخر بقي لو ناقصكم حاجة روحو للدكتور بتاعي الي هياخدنا اصلا للموضوع انه
دعاية بحته لشخص او عيادة و إلا مفيش شخص هيسمح ان دايت بلان (دا لو هنسميه دايت بلان) تعبان فيها و مخليها customized ليها انها تطلع للناس ببلاش غير انه اكيد هيعود دا بفايدة عليه ان شخص عنده كام مليون فولورز لو ١٠٠٠ راحو ليه ف هو كده كسبان و مبسوط علي الاخر ، هنبدأ نتكلم علي الدايت
اول حاجة هي ان الدايت مش محسوب الجرامات ف بالتالي مش محسوب السعرات ف دا مش دايت بلان دا مفرقش حاجة من اي دايت علي النت عيل صغير عامله ، اغلب الناس هتنبسط ف الاول انه في عيش و رز و باين انه اكل كتير اوي بس ف الحقيقة دا جر رجل مش اكتر للي بعد كده ، مفيش كميات محددة و واضحه
ثانيا الدايت قليل جدا ف البروتين و شبه مستحيل يكمل احتياج الانسان العادي الي هينتج عنه انه هيخسر عضلات اكيد و هتشوف ملحوظة تحت انه مينفعش تعمل رياضة غير لما ترجع للدكتور و غالبا هيقولك لا عشان ميزانك ينزل و ينبسط بيك ، تاني حاجة مفيش دهون صحية هو مانعها كلها ماعدا صفار البيض
الي مع الوقت هيدمر سيستم هرموناتك و هيمنع جسمك انه يمتص ٤ فيتامينات مهمه مش بتدوب غير ف الدهون و هما فيتامين A D E K و كلهم اهم من بعض ، مفيش حاجة اسمها ب اي كمية حتي ف السلطة و كمان الفاكهة عشان ممكن تاكل ٣ فراولات ب ٢٠ كالوري او ٣ تفاحات ب ١٨٠ كالوري او ٣ موزات ب ٣٠٠ كالوري
و اكيد مش هننسي فقرة الممنوعات هتلاقي حاجات طبيعية جدا ممنوعة زي البطاطس و البطاطا الي كلهم الياف مفيدة و بتشبع جدا عن العيش و الرز و اصناف فاكهة زيها زي اي فاكهة تانية و اصناف زي القلقاس و البسلة كلها خضار مفيد و بتشبع بسعرات شبه معدومة و المكسرات الي هي دهون صحية نمنعها برضو
سابع يوم الي هو قبل ما توزن بقي و قبل الفري نشيل الكارب خالص و نخلي ٢ شريحة توست بس ف نوقع ميه كتير لا و نشيل بروتين الفطار و العشا و كفاية بروتين الغدا ف هتلاقي اجمالا كمية الاكل اقل ف الميزان تاني يوم هيكون اقل و هتكون مبسوط ف تستاهل وجبة فري بكرة و عاش و اجهز للنظام الي بعده
طيب بقينا ف الاسبوع التالت نعمل ايه عشان الوزن يفضل ينزل و نفضل مبسوطين ؟ نقلل كارب اكتر طبعا و نقلل البروتين و نمنع اي دهون طبعا و نحط التاتش بتاع الصيام عشان تزود الحرق طبعا ف يجبرك انك متاكلش عشان اليوم يعدي و انت بتاكل اقل كمية اكل و تفتكر انه ضروري عشان تخس و اغريك ف الغدا
بجملة اي كمية عشان تتخيل انك هتاكل كتير مع ان البروتين صعب جدا تاكل كميات كبيرة و انت اكيد مش من عشاق السلطة و الخضار ف هتلاقي ان مفيش اكل غيرهم ف اليوم و الباقي فاكهه و شاي بلبن و لازم تضحي عشان تخس طبعا و تصوم و تمنع الاكل
وصلنا الاسبوع الرابع و اكيد لازم الوزن يفضل ينزل ف لازم نقلل الاكل اكتر نعمل ايه ؟ نقطع كارب بقي خالص و دهون كمان و حتي كميات الاكل و متقلقش دول ٣ ايام بس ف هناكل فاكهه و زبادي و سمك و سلطة بس و هنعمل دا تاني ف الاسبوع الخامس عشان كل ما نروح للدكتور الوزن ينزل و كلنا نكون مبسوطين
الغريب ف الموضوع انها كانت بتنصح الناس كمان معرفش علي انهو اساس زي ان واحده بترضع تعمل الدايت دا و معروف ان الحمل و الرضاعه ليهم انظمة مخصصة بالكالوريز و الجرام عشان ميأثرش علي صحتهم هما و البيبي و كمان طفل ١٥ سنه ف مرحله النمو انه يعمل الدايت دا و معروف ان مفيش عجز سعرات لطفل
الدايت دا زيه زي كل الانظمة الي الناس بتمشي عليها و علي فكرة هو مش سر و موجود علي النت و جروبات الفيسبوك بس عمره ما حل مشكلة زيادة الوزن ف مجتمعنا عشان بكل بساطة دي انظمة معتمده علي الحرمان و تقليل الاكل بشكل اكستريم و الموضوع بيزيد سوء لما نعلم الناس ان لازم تلتزم عشان تاخد فري
او بمعني تاني انك تاكل الي نفسك فيه عشان انت ممنوع منه ف يحصل ايه ؟ تاكله بكمية اكبر و تاكل اصناف مكنش نفسك تاكلها اصلا و بعدها تلاقي انك بقي عندك eating disorders و انك دخلت ف لوب من عدم انتظام الشهية و ال binge eating و مشاكل نفسية لسه اصلا الناس معندهاش وعي بيها عشان تحلها
مفيش دايت سحري و مفيش نظام خارق ، لو مش هتقدر تعيش علي البلان الي مكتوبة ليك طول العمر يبقي الدايت دا مش مناسب ليك ، مينفعش تمشي علي دايت مفيهوش كارب ولا دايت مفيهوش فاتس ولا دايت مفيهوش بروتين كفاية ولا دايت مش محسوب الفيتامينات و المعادن ليك ، القرار ف ايدك بس افتكر دايما ان
مفيش اهم من صحتك و انك لو شوفت الدايت انه كورس علاج او فتره عمرك ما هتنجح و هتفضل طول عمرك تعاني مع الوزن الزايد و كل مره هتبدأ هتلاقي ان وزنك اعلي من الاول ، لو الاكل الصح و الرياضة متحولش للايف ستايل انت عمرك ما هتنجح.
جاري تحميل الاقتراحات...