سنة 2021 كانت سنة استثنائية بالنسبة لي من ناحية الحلول اللي اكتشفتها فيها وسهلت حياتي اليومية وزادت انتاجيتي بشكل كبير. بشارككم بقائمة أكثر 10 حلول أثرت على روتيني اليومي وخلته اكثر كفاءة، لعل احد يستفيد من بعض الاشياء اللي استفدت منها:
🔟 قطعة تتبّع اماكن الأشياء: Apple Airtags. استخدمها لتتبع مفاتيحي، وشنطتي. حتى قارورة الموية الكبيره اللي اشيلها معي يومياً ثبتتها فيها من كثر ما اضيعها 😂 ماهو شي استخدمه يومياً، لكن انقذتني اوقات كثير كان ممكن اضيّع فيها وقت طويل (يصل لساعات) ادور عن هالاشياء اللي تضيع بكثرة.
9️⃣ تطبيق مصرف الراجحي. جربت استخدمه لكل احتياجاتي من بداية السنة، وصراحة فرق معي بشكل كبير. تجربة المستخدم عظيمة كل شي تقدر تسويه بالتطبيق بشكل سريع جداً، حتى اضافة المستفيد اللي اكرهها عادة صارت ما تفرق معي 😁 بالاضافة الى تطوره بشكل مستمر وسريع مقارنه مع باقي البنوك.😍
8️⃣ تطبيق Fantastical على الايفون والماك. استخدمته السنة الماضية ولكن بشكل بدائي. هالسنة اكتشفت كمية التخصيص العظيمة اللي اقدر اسويها من خلال الكتابة فقط: اسم الموعد، ووقته، ومدته، وتنبيهاته، وبأي كالندر، كلها توصف وصف وهو يكمل الباقي 😍
7️⃣ شاشة LG 27UN880-B. شاشة تصنف كشاشة 4k (مع ان دقتها اقل شوي) لكنها الشاشة المثالية للاستخدام المكتبي: تجي مع القاعدة حقتها، وتثبتها على طرف الطاولة بحيث تستفيد من المساحة اللي تحتها. وتقدر تستخدمها بالطول او بالعرض، والاهم: كيبل USB-C تشبكه باللابتوب يشحنه لك ويعرض الشاشة 😍
6️⃣ اكسسوار Apple Magic Trackpad 2. بما اني حولت بشكل كامل على ماك في مكتب الدوام ومكتب البيت، قررت اجرب اتوقف عن استخدام الماوس التقليدي واستخدم هذي بدالها، وكان قرار موفق جداً. العمل صار اكثر سلاسة بكثير، واريح لليد، واقدر استفيد من خصائص الماك بشكل سريع وسلس. 👍🏼
5️⃣ اقفال ذكية لمداخل البيت. مع انه كان احد تجارب كثيرة سويتها لاتمتة اجزاء متفرقة من البيت، الا انه هذا تحديداً كان الاكثر تأثيراً. احلى شعور ترجع نهاية اليوم تعبان، وتفتح الباب بالبصمه بدون استخدام مفتاح. تغيير صغير جداً على روتينك اليومي، لكن تكتشف ان تاثيره كبير مع الوقت.
4️⃣ جهاز Apple iMac الجديد. الجهاز المكتبي المثالي، خاصة اذا اشتريته مع الكيبورد اللي تخليك تفتحه وتشتري اونلاين باستخدام Apple Pay بالبصمة. خفف حوسة كبيرة من الاسلاك والاكسسوارات اللي على المكتب، وشاشته ممتازة، وفيه كاميرا ومايك مناسبين للاجتماعات والعمل عن بعد، وقوي وسريع. 😍
3️⃣ تطبيق Notion (كل المنصات). تبي تحس Word او Docs تطبيقات قديمة ومتخلفة؟ جرب تتعود على أوامر نوشن في الكتابة. التطبيق يتيح لك تضبط مستندات جميلة سهل التعامل معها وتحريرها والربط بينها. يوفر خصائص تغنيك عن Trello وغيره من الادوات. نعتمد عليه بالدوام ومريحنا جداً.(ما يدعم عربي)
2️⃣ الأوسمة والفلاتر في تطبيق Todoist.هالتطبيق استخدمه من زمان لادارة مهامي اليومية،لكن بديت هالسنة استخدم الأوسمة والفلاتر ورفعت انتاجيتي بشكل غير طبيعي.الموضوع هذا يبي له ثريد لحاله، لكن انصح كل من يستخدم هالتطبيق او تطبيق مشابه انه يقرا عن فكرة استخدامها لتصنيف المهام بشكل افضل
1️⃣ ايفون ١٣ برو ماكس. شريته فقط لان ايفون ١٢ برو تخلص بطاريته على المغرب تقريبا بسبب استخدامي الثقيل (فيديو، نت، اجتماعات…الخ). اكتشفت ان الماكس يقعد لنهاية اليوم بدون شحن! اروح للسرير وباقي فيه ٢٠٪. حتى ما عاد صارت اشيل بطاريات، واشحن فقط وقت النوم. سهّل حياتي بشكل غير طبيعي 😍
اتمنى اكون ذكرت شي ممكن يستفيد منه احد. وللتذكير هذا ترتيب خاص فيني ومرتبط بروتيني اليومي قبل ما يفكر احد يعترض عليه 😂 لكن اتمنى اذا احد عنده اقتراحات لاشياء اضافية ممكن تسهل حياتنا اليوميه يشاركنا اياها.
جاري تحميل الاقتراحات...