بعد قرار السماح بالتجمعات نشأت عندنا مشكلة عويصة مالها حل ،، الوالدة سلمها الله قررت هي وخالتي يسوون اجتماع عائلي كبير فبيتنا يوم الاثنين،، احتفال وفعاليات وبوفيه عشاء ارستقراطي وقهوجيات وحلا ،، اختي من الصبح مستنفرة،، اللي مايعرف اختي المصونة هذي سالفتها: rattibha.com
انا صاحي الصبح بدري ابي اسوي فطور اوروبي زعتر وجبنة حلوم مع خبز باغيت في الحوش لحالي ،، اللي صار اني وجدت نفسي منخرط في نقاش محتدم مالي علاقة فيه لامن قريب ولابعيد ،، اختي تقول لازم نستاجر قهوجية عند الباب تطلب ابراز توكلنا ،، وامي تقول ياخزياه اها وان جت وحدة ماطمعت نطردها؟؟
اختي تشرح بحماس وهمة عالية لتثقيفنا انهم يقولون (تخفيف) الاحترازات يعني كورونا يمكن يرجع ،، الوالدة قالت لي شف ذي تفاهم معها فهمها ان كورونا مات ،، اختي خارت قواها يوم سمعت جملة كورونا مات ،، حست ان توعية السنتين اللي راحت هدمت بجملة ،، تبي ترد تبي تتكلم ماقدرت بالاخير صاحت هههه
أنا مااخفيكم انصدمت من الجملة وقلت لامي ترى الفيروس مايموت وانتي متعلمة مايصير ترددين كلام غير دقيق بدون مصادر ،، قالت اسكت لاصيحك انت الثاني ،، اختي حست بالغبنة من شيئين 1.الاصرار على المعلومة 2.الاستهزاء بدموعها ،، قامت ودخلت البيت خلتنا لحالنا ،، فقلت لامي انا متفهم موقفك
صعب تعزمين الناس وبعدين تتراجعين (هنا قالت اها كمل اخلص وش تبي هههه) قلت فكرة ابراز توكلنا فكرة محايدة لا انتي اللي تراجعتي عن عزيمتك ولا انتي اللي زعلتي بنتك وكلنا عارفين القلق اللي بيجي بعد العزيمة ،، قالت القلق والله جلستك بذا الشورت لحالك فالحوش والسماعات فاذنك ماتبينا نسمع
طبعاً تلمح لموضوع الخطبة والزواج وانا بسرعة تداركت مسار النقاش وقلت لها عندي حل لموضوع العزيمة ،، تسوين فعالية فيها جائزة للي اخذ جرعتين وتسمينها جائزة الضيفة المثالية ،، بكذا نخليهم يفتحون توكلنا بدون ماينقدون عليك ومنها يتثقفون ان العزايم لازم تكون محصن جرعتين ،، اعجبت بالفكرة
قالت رح تفاهم مع اختك ورتبوا بينكم اما اني اعتذر عن العزيمة هذي انسوها وشيلوها من روسكم ،، دخلت جوا ورقيت فوق على اساس باجلس اشرح لاختي ومتخيلها جالسة تبكي وشايل هم كيف اراضيها لكن اللي صار العكس تماماً ،،لقيتها نازلة مع الدرج معها الشغالة يضحكون وقلت لها تعالي نجلس بخصوص العزيمة
قالت وش عزيمته؟؟😊🌚
قلت ترى لقيت حل
قالت انسى الموضوع علمت ابوي بكل شي وبعد شوي بينزل والشغالة حجزنالها جرعتها الثانية يوم الاحد يعني الاثنين بتكون تعبانة يدها تعورها ماتقدر تساعد امي
بقدر صدمتي من التخطيط والدهاء بقدر خوفي على امي من هذي الهجمة المرتدة والعنيفة جداً داخل ملعبها
قلت ترى لقيت حل
قالت انسى الموضوع علمت ابوي بكل شي وبعد شوي بينزل والشغالة حجزنالها جرعتها الثانية يوم الاحد يعني الاثنين بتكون تعبانة يدها تعورها ماتقدر تساعد امي
بقدر صدمتي من التخطيط والدهاء بقدر خوفي على امي من هذي الهجمة المرتدة والعنيفة جداً داخل ملعبها
بسرعة رجعت لمكاني على الطاولة في الحوش سألتني امي شرجعك؟؟ قلت بأكل فطوري اول🌚
شوي الا الوالد مشرف طال عمره بثوب النوم وفي يده شابورة بر وكاس شاهي ،، جلس وقال السلام عليكم ،، قلنا وعليكم السلام
وجيهنا حرفياً:
شوي الا الوالد مشرف طال عمره بثوب النوم وفي يده شابورة بر وكاس شاهي ،، جلس وقال السلام عليكم ،، قلنا وعليكم السلام
وجيهنا حرفياً:
مباشرة دخل فالموضوع قال يازين الجلسة برا يوم زان الجو بس يعيب هذي المواسم ان الحشرات تبدأ تطلع وتفقس ،، بس الحمدلله لي شهر ادور موعد مع شركة التنظيف وامس قالوا لي يوم الاثنين موعدهم بيجون الظهر يبخون البيت بالمبيدات ،، عاد جهزوا انفسكم محد يجلس بالبيت كلنا بنروح المزرعة ههههههه
انا والله شرقت باللقمة ،، عطاني الجوال وقال تأكد من رسالتهم هو الاثنين والا الاحد؟؟ طالعت قلت مكتوب الاثنين ،، قال متى راسلينها؟؟ قلت امس الساعة 7 بالليل (قصده يسمع امي)،، هي من الصدمة ماعرفت ترد وبنفس الوقت ماتبي تصعد النقاش لانها ناوية تطلب منه يستاجر زوالي وطاولات بوفيه العشاء
كسرت الصمت وبحنكة معتاده قلت للوالد عندي عشاء زملائي يوم الاثنين نقدر نأجل الشركة؟؟ قال لا اعزمهم برا الشركة مواعيدهم من شهر لشهر (يعني قفل باب الأمل عند امي)
واضح على وجه امي الارتباك والزعل ،، شوي جت اختي وحبت راس امي قالت اسفة قبل شوي قمت وخليتكم واللي سويته غلط سوي اللي تبين
واضح على وجه امي الارتباك والزعل ،، شوي جت اختي وحبت راس امي قالت اسفة قبل شوي قمت وخليتكم واللي سويته غلط سوي اللي تبين
وانا مااطلع من شورك يااغلى ام بالعالم ،، وجلست معنا كأنها جاية من غرفتها ماتدري وشصاير ،، انا من كثر الدهشات ماغير كل شوي اطير عيوني في الجبن الحلوم،،مرت الدقايق بسوالف عادية كلها ماشاركت فيها الوالدة حتى جاءت الطامة ،، شغالتنا جت عند ابوي تقوله ابي اجازة الاحد والاثنين والثلاثاء
باروح عند اختي (اختها بالسعودية) لان موعد الجرعة الثانية يوم الاحد والاثنين والثلاثاء بكون تعبانة ،، قال ابوي ايه فرصة اصلاً الاثنين البيت بيكون مشغول ومليان مبيدات ،، اختي قالت noo pleeease حاولي تأخرين جرعتك عندنا عزيمة الاثنين وماما اكيد تحتاجك ،، الوالدة انهارت من توالي
الاخبار على مسمعها (شكلها هي اللي بتصيح فالنهاية هههه)
حالياً تقوم باتصالات مكثفة مع خالتي ويحاولون يطلعون بحل والظاهر بيستاجرون شاليه في العمارية والا طريق الدمام
عاد الصراحة انا استمتع بذا التفاصيل وانتظر نهاياتها بشوق،، الصدمة صدق لو قالت وزارة الداخلية تراجعنا عن القرار هههه
حالياً تقوم باتصالات مكثفة مع خالتي ويحاولون يطلعون بحل والظاهر بيستاجرون شاليه في العمارية والا طريق الدمام
عاد الصراحة انا استمتع بذا التفاصيل وانتظر نهاياتها بشوق،، الصدمة صدق لو قالت وزارة الداخلية تراجعنا عن القرار هههه
من زمان ماكتبت بتويتر ولالي نفس اغرد بعد الطردة بس والله الموضوع مشوق هههه وبأكتب لكم وش يصير بعد ماتخلص الحرب الباردة وآخر خطط اطراف النزاع
(الجدد اللي مايعرفوني ترى احب افضفض بيومياتي وسوالفي مهي للبيع ،، اذا تبي فوائد وحكم تفضل هذا الموقع بيعجبك:
kfnl.gov.sa
(الجدد اللي مايعرفوني ترى احب افضفض بيومياتي وسوالفي مهي للبيع ،، اذا تبي فوائد وحكم تفضل هذا الموقع بيعجبك:
kfnl.gov.sa
جاري تحميل الاقتراحات...