باش تأخذ قرارت وأختيارات صحيحة أثناء شرائك لإثاث منزلك ضروري ما تأخذ في عين الأعتبار بعض الخطوات المهمة جداً نحاول في الثريد هذا ننقلها ليكم وفق تجربتي الشخصية باش تساعدكم وماتقعوش في نفس الأخطاء اللي وقعت فيها.
مرفق صور لحوشي قبل وبعد
مرفق صور لحوشي قبل وبعد
1 / أول نقطة مش شرط باش الحوش يكون جميل أنه يكون كل شيء فيه غالي ومكلف تقدر تخلي الحاجات اللي عليهم حمل زي الصالونات والكراسي فيهم كوالتي شوية باش عمرهم يطول والأشياء الثانية زي الاباجورات والتحف واللوحات أهم حاجة فيهم الجمالية أكثر من القيمة المالية كذلك فيه حاجات قديمة تقدر
تستخدمها كتحف وكديكور للمنزل من صحون وطاولات وكراسي ممكن تلقاها مهملة في مخزن الحوش أو في حوشكم اللي خارج طرابلس أو ممكن تلقاها مهملة برضو عند صديق أو قريب تقدر تشريها منها أو تطلبها لو عندك دلالة عليه.
2/ أنك تعرف قياسات الغرفة أو المكان اللي تبي تأتثه مهم جداً وعلى ضوئه تختار شن تبي تشري وحجم كل حاجة ماعمرمك تعتمد على العين وتخمين المساحات لأنه بالطريقة هيا مرات تشري طاولة أو صالون وحجمهم يكون كبير وغير مناسب للمكان متاعك وثانياُ لآنه مرات تواجه مشكلة
حتى في أدخاله للحوش لكبر حجم الصالون والحاجتين هما صاورلي شخصياً الأولى أضطريت أني مانتسفيدش بيها الطاولة لآنه صاحب المحل رفض يرجعها والثاني أضطريت أني نجيب حداد ونحي شباك الحماية الحديدي من الروشن باش قدرت ندخل الصالون.
3/ ضروري ماتكون تعرف شن تبي تشري وكيف بيكون شكل الحوش بصورة عامة وكل غرفة وصالة ويكون فيه ثيم أو ستايل موحد للحوش ولو ماعندكش معرفة مسبقة أو ذاكرة صورية تقدر تتصفح موقع أو تطبيق paintrest يساعدك هلبة هلبة في أختيارك.
4/ حاول أنه تمزج بين العملية والجمالية في الأثاث يعني يكون شكله جميل وليه وظيفة زيادة على الجمال أو وظيفتين مثلاً صالون ويكون فيه مكان للتخزين تحفة وتقدر تستخدمها تحط فيها مفاتيح أكيد في بعض الأشياء وظيفتها جمالية بس لكن في أشياء أخرى مكن تكون ليها وظيفة وتستفيد منها.
5/ لو حالتك المادية كويسه حاول أنك تقتني لوحات أصلية لفنانيين بدل ماتشري حاجات مستوردة أو غير أصلية والي رح تكون بطبيعتها غالية فلو أنك شريت لوحات أصلية أنت هكي أستفدت بأكثر من طريقة الأولى أنك ساهمت في إثراء الحراك الفني وشجعت الفنان على الإنتاج ثانياً أنك زدت قيمة فنية لحوشك
بالإضافة للجمالية وهكي يتربوا صغارك على الذوق الفني وتقدير الفن وممكن تأثر في غيرك يدير نفس الشيء والحاجة الثالثة والمهمة برضوا أنه اللوحة يزيد سعرها مع الوقت وممكن جداُ أنها تكون أستثمار كويس على المدى الطويل.
6/ مشكلة سوق الأثاث في ليبيا أنه متشابه لحد كبير في البضاعة ومختلف لحد كبير في الأسعار يعني سعر الصالون في جنزور يختلف على سعره في حي الأندلس أو تاجوراء أو زناتة أو بن عاشور ولو تبي حاجة فريدة ضروري ماتزورهم كلهم باش تحصل قطعة مميزة وتكون تناسب ذوق وأختيارك.
7/ صعب أنك تأثث حوشك كله في مرة وحدة بكل التفاصيل من صالونات وديار نوم وطاولات وتحف ولوحات وغيره أهم حاجة تركز على الأساسيات ف البداية من ديار نوم وصالون معيشة والحاجات الثانية كل مرة تضيف حاجة هكي تتخلص من الضغط الناتج عن ضيق الوقت ورح يكون أختيارك للقطع فيه قناعة وجمالية أكثر.
8/ حاول يكون أختيارك للأثاث والديكور خاص بيك يحمل شخصيتك وتفكيرك وذوقك وأبتعد على التقليد الكامل لغيرك بالطريقة هيا رح تستمتع بيه وتكون مقتنع بيه أكثر .
إنتهى الثريد نتمى يكون فيه إستفادة والكلام والتجربة شخصية من الطبيعي أنه فيه من يختلف معاي في بعض أو كل التفاصيل ،،،، شكراً وأسف على الإطالة
جاري تحميل الاقتراحات...