ثريد : مراحل تطور علاقتك مع ستات الشاي من الى ، كاتب هذا الثريد عنده خبرة ١٣ سنة بالتمام والكمال مع ستات الشاي ما انقطع عنهم أبداً وعشان زكاة العلم نشره قررت أكتب الثريد دا للفايدة العامة ، فضل التغريدة وامشي لاقرب ست شاي واستمتع بالسرد ، بسم الله نبدأ :
أول حاجة لازم نعرف إنه ست الشاي هي الإحتواء الكامل للشباب ، هي الأسرة للغريب والحبيبة للسنقل والأم لليتيم والأخت للوحيد هي باختصار الكل في الكل، المرحلة الأولى من علاقتك مع ست الشاي لما تجيها اول اربعة مرات هي مرحلة الزبون : وفي المرحلة دي بيكون التعامل رسمي بتجي تقعد في الكرسي+
بتجيك ست الشاي بعد تخلص الشغل في يدها عشان كدا ممكن تتاخر عادي ، بتجيب ليك الموية وتسالك تشرب شنو ، بتعمل ليك الحاجة الانت عايزها حسب ترتيبك في قائمة الطلبات العندها ، والمرحلة دي طبعا بتحدد حاجات كتيرة في علاقتكم لقدام يعني اذا كنت من النوع المستعجل او بتاع النظريات +
انه القهوة خفيفة او السكر كتير وغيره غالباً حتتحبس في المرحلة دي وحتكون مجرد زبون للأبد ، اما لو كنت زبون فالح فمن الزيارة الخامسة حتترقى من زبون لضيف ، ودي ممكن نسميها شهر عسل العلاقة ، هنا بتعامل كم معاملة خاصة شديد ، بتجيب ليك موية باردة في جك نضيف وبتعمل ليك قهوتك سريع جدا +
يعني بتعاملك معاملة الضيف اللي جاييها في البيت ولو استمريت فالح في مرحلة الضيف حنوصل المرحلة البعدها وهي سيد البيت وهنا خلاص حتبقى فرد من أفراد العائلة يعني حتقوليها جيبي لي الموية حتقوليك مالك محنن ؟؟ تعال شيل مويتك براك ، يعني ممكن تجي تعبان ومرهق في عز الشمس داير تقعد ++
تقوم هي تقوليك عليك الله اجري لدكان ادم جيب لي منه رطل سكر وما تتاخر ، وطبعا انت حتمشي وانت ساكت ، في المقابل ما حتركز معاك في موضوع القروش شديد ودي أخر مرحلة في العلاقة الجميلة دي وختاما في ناس ظهرو مؤخرا بيحاولو يقارنو بين ستات الشاي والكافيهات وطبعا دي رعونة شديدة منهم ++
كيف تقارن بين الثرى والثريا ؟ هل البارستا بتاع الكافيه حريص انه يحل مشاكلك ؟ هل الويتر في الكافيه بيديك نصايح عن علاقاتك العاطفية ؟ باختصار ست الشاي هي الثيربست بتاعت طبقتنا الكادحة ، ونختم تاني لكن بجدية وبدون هظار : ستات الشاي أمهاتنا وأخواتنا اللي اختارو طريق الحلال +
فسهلو عليهم الحياة واحترموهم وقدروهم وما تتمسكو معاهم في الباقي ربنا يرزقنا ويرزقهم بالحلال يا رب ..
جاري تحميل الاقتراحات...