زمان وانا صغيرة كنت فاكره ان القمر بيمشي معايا ولما اركب العربية كان يجري معايا ولما اسافر يسافر معايا ولما ارجع يرجع معايا " ع الرغم من بعده او غيابه ايام ف الشهر" كنت دايما اطل عليه م البلكونه اطمن انه موجود وشايفني وانه دايماً معايا مش مفارقني .. كنت اتكلم معاه واحكيله

رايحة فين وعملت ايه وشوفت مين .. لما كبرت شوية وعرفت ان مافيش حاجة اسمها القمر ماشي معايا زعلت اوي وعيطت وكأن رفيق الطرقات ماسمعش انا بقول ايه ولا الحكاوي اللي كنت افضل احكيها ولا ضحكي وفرحي وزعلي ولا كان داري اساسا بيا .. لما كبرت مبقتش عارفه ازعل من خيالي وحكاياتي ولا ازعل

من حقيقة القمر اللي مكنتش عارفاها وقتها بس بالرغم من كدا عمري ما كرهت القمر ولسه بحبه ولسه بأقف اشرب الشاي معاه كمان .. بس تعرفوا مش دي المشكله .. بيني وبينكم ولا اخفي عليكم سراً ان بعد خذلان القمر ليا وانا خُذلت وبلا استثناء من كل رفقاء الرحلة اللي دايما كنت متطمنه لوجودهم

زي وجود القمر .. فلو عتبت عليهم او زعلت منهم دلوقت يبقى كان من باب اولى ازعل واعتب ع القمر !!