رتبها

ثريد مهم جداً🔴
عن الناس الضعيفة الما بتسمن💪🏽
وليه انهم عرضة لي خطر الإصابة بي أمراض كتيرة. و ليه صحتهم ممكن تكون اسوأ من الناس السمينة عديل!

-اول شي، لازم نفهم انه احنا اي حاجة ناكلها، يا حرقناها يا خزَّنّاها. ما في اوبشن تالت.
-اي زول فينا عنده حاجة اسمها basal metabolic rate ودا معدل الحرق الطبيعي بتاعه في حالة السكون. يعني دي طاقة بيحرقها جسمك في القيام بي وظائفه الحيوية. والحاجة دي ممكن تختلف من زول لي زول.

وبتزيد اكتر في الرياضيين والناس العندهم كتلة عضلية كبيرة لانه العضلات بتاعتهم بتستهلك طاقة اكتر.
تاني شي عندنا الحرق بيرتبط ارتباط وثيق بالحركة، كل ما كنت نشيط، حركتك كتيرة، شغلك متعب، بتتريض كتير، كل ما كان معدل حرقك اعلى برضو.
في الجدول ادناه مثال لمعدلات الحرق حسب نشاطكم.

نفرض انت زول ما بتتريض وفي اليوم بتحرق ٢٤٠٠ سعرة حرارية. أي نقصان عن ال٢٤٠٠ معناها انت في حاجة اسمها caloric deficit وحتضعف لانه جسمك حيعوض نقص الطاقة من الدهون (وهنا أصل كل الحميات الغذائية) انه تاكل اقل من احتياجك عشان جسمك يحرق دهون بدل ما يخزن.

وبديهياً أي زيادة عن ٢٤٠٠ معناها انت في caloric surplus وحتسمن لأنه جسمك حيخزن الفائض بتاع الأكل في شكل دهون (الا لو بتتمرن حديد) ممكن وقتها يستغل السعرات الإضافية في بناء العضلات وبرضو بكون معاها حبة دهون.

نرجع للموضوع الأساسي، احنا كأشخاص ممكن نختلف عن بعض في احتياجنا اليومي للسعرات، ولكن اي زيادة عن حاجتنا اليومية معناها حتتخزن دهون.
هنا الفرق بكون انه في ناس بتخزن دهونها دي تحت الجلد وديل البيسمنو وبيظهر عليهم لو اسبوع واحد خربو الدايت بتلقاهم سمنوا.

وفي ناس بتخزن الدهون بين الأعضاء زي القلب والكلى. ودي اسمها الدهون الحشوية او الvisceral fat.
وتعتبر اكثر خطورة من الدهون البتتخزن تحت الجلد لانه الزول ما بيجيب ليها خبر وما بينتبه لحدي ما تكون حالته استاءت.

الدهون الحشوية اثبتت الدراسات انها مرتبطة بي امراض كتيرة اهمها امراض القلب، الزهايمر، السكري، الجلطات والكولسترول بالاضافة لي ضغط الدم.

هنا مقارنة بين شخصين عندهم نفس الوزن ونفس شكل الجسم الخارجي. لكن واحد فيهم بيخزن الدهون جوا بين الاعضاء والتاني ما عنده دهون. لكن الاتنين من برة شكلهم صحيين وامورهم واضحة.

فلو انت من النوع البياكل كتير، واكل ما صحي وما بتنتبه لي اكلك. اذا انت برضو ما بتتريض وما متذكر اخر مرة جريت فيها متين.
ومع ذلك ضعيف فاعرف انه انت ما يقال عنه TOFI يا توفي.
يعني thin on the outside, fat on the inside.
ضعيف من برة وسمين من جوا.
او بقولو عليهو skinny fat.

فما تفرحوا شديد وتفتكروا انكم عندكم قدرات خارقة.. واكل السوسة والعافية المدسوسة.. يحليلهم محتاجين تضعفوا برضو وتعملوا دايت قاسي عشان تشيلوا الدهون الحشوية دي وتنتبهوا اكتر لي نفسكم وأكلكم عشان تحافظوا على صحتكم وتمنعوا الامراض دي من انها تحصل ليكم.