النضج النسائي في العلاقات بالضرورة معناه ارتباطها بشخص ناضج علشان مش معقول هنعيّل بقى ونضيّع وقت. الأنثى الناضجة الواثقة من نفسها لن تتساءل إذا كان فلان معجب بها. هتكون عارفة أنه معجب بها إما بالتصرفات والسلوك أو بالإفصاح. هي عارفة أنها تستحق التقدير والحب وبتتصرف على الأساس ده.
الأنثى الناضجة برضه عارفة أنها لما تدخل علاقة وتلاقي البوادر مش ولا بُد، تنسحب. لا عندنا وقت نربّي ولا نشرح ولا نعالج ونصلّح. مش هنقعد نحلّل شخصيات ونشوف توافق الأبراج علشان نلاقي قشّة نتعلّق بها. يا أيوة يا لا. انتهى.
الأصول والحدود الصحية هي الأساس اللي بتبني عليه الأنثى الناضجة علاقاتها. موضوع الغيرة له حدود. معرفة الخصوصيات له حدود. المشاركة بتحط لها حدود. ما بتفرحش بالصغائر والshow لكن يهمّها المضمون طويل المدى.
مش بتحتاج تسأل كثير هأعمل إيه؟ يا ترى اللي عملته ده صح؟ لا. القرار بيتاخذ لا رجعة فيه عن دراسة وخبرة ومعرفة. موضوع عيني فيه وأقول إخيه ده كان زمان علشان بيتفهم على أنه دلع. الدلع في النضج مش بالملاوعة. بيبقى طبيعة ثانية تلقائية محببة تميّز ست عن ست.
الأنثى الناضجة ما تتباهاش بالحديث عن نفسها وعرض نفسها كل شوية ولا أنها تخجل من نفسها برضه. هي عارفة هي إيه وقيمتها إيه قدرها إيه ومش محتاجة تؤمّن عواطفها بتلميحات من الآخرين أو مجاملات أو كلام معسول. She knows she has it and she’s comfortable in her own skin.
المسؤولية ثم المسؤولية ثم المسؤولية. أي علاقة بتدخلها هي عارفة أنها مسؤولة عن نفسها وعن راحتها وعن مشاعرها ووقتها واختياراتها ومسؤولة تبذل مجهود لاستمرارها لكن مش مسؤولة عن فرض مشاعرها على الطرف الآخر لأنها عارفة أن يا آه بيحبها يا لا.
شكل العلاقات مش واحد، اللي يريّح فلانة مش ضروري يكون مريح لي وهكذا. علشان كده الأنقى الناضجة ما بتمشيش على كتالوج علاقات وتفرض مسار محدد لعلاقة علشان تشبه حد. هي عارفة أن التصرف ده مريح لها ومناسب لطبعها فبتعمله أو الشريك بيعمله، ومش علشان فلانة بتعمل يبقى أنا أعمل.
في النهاية، النضج سلوك وتجربة مش تراكم سنين.
جاري تحميل الاقتراحات...