رتبها

(احمد مكه) ‏‎‎‎ⲁϩⲙⲓⲇ 🇪🇬𓅃𓎛𓅓𓇋𓂧

15 تغريدة 21 قراءة Dec 24, 2020

♻️ ✍ منى النعيمى ...
🇪🇬🇪🇬🇪🇬🇪🇬🇪🇬
تعالوا أقولكم عمرهم ما هيقدروا على مصر ليه ..!
وأنا راجعة من ساعتين كدا ، قولت أشتري شوية حاجات قبل ما أروح .. المهم بحب أنا أدور ع الناس اللي محلاتهم مش في شوارع رئيسية أو المحل مش شيك بطريقة مبالغ فيها !
يتبع..

ببص كدا لقيت محل مكتوب عليه بقالة كذا ..
روحت لقيتها ست كبيرة باين أوي علي وشها مشقة السنين وعلامات الزمن .. المهم قولتلها سلام عليكم .. ردت قالتلي وعليكم السلام يا سكر ( خلاص حبيتها 😁 ) .. سألتها عندك كذا ؟ قالتلي موجود وراحت شاده كرسي وقالتلي أقعدي يا عسل..
يتبع..

عقبال ما يجي الواد حسني ينزله من ع الرف علشان عالي ، هو بيصلي العصر وجاي ، قولتلها حسني دا أبنك ؟
قالتلي لأ دا عيل يتيم كدا بشغله معايا هنا وأخر الليل بينام في المحل أهو مني أوياه من الشوارع ومنه بيحرس المحل ...
شوية وقالتلي عارفة اللي أحنا فيه دا من أيه ؟
يتبع..

قولتلها من أيه ! قالتلي علشان ما بنتقيش ربنا ، قولتلها أعوذ بالله ليه كدا بس الدنيا فيها الحلو والوحش ..
قالتلي عارفة يا مدام أنا كنت متجوزة راجل من عيلة كبيرة أوي وغنية جدا جدا ، ولما مات من 40 سنة سابلي 3 بنات أهلهم كلوا حقهم وحقي وسابونا نواجه الدنيا..
يتبع..

وقتها كان في رقبتي3 قطط أكبرهم11سنة أستعنت بالله وبعت شبكتي وخدت المحل دا وأشتغلت وربيتهم منه وجوزت البنت الكبيرة والوسطانية وجيت لحد الأخرانية وكان وسطي أتقطم يابنتي والله ما بين تعليم وجهاز وجواز
الصغيرة دي عريسها قال أنا عندي الشقة وهوضبها وهجيب الأوض وأنتوا الأجهزة .
يتبع..

العريس يا بنتي عارف إن بنتي من عيلة كذا وأنا ما حكيتلوش لا هو ولا أهله عن قلة أصل العيلة اللي بيسموها كبيرة علشان ما أكسرش نفس بنتي .. المهم خلص شقته وهى خلصت كليتها وعايز يتمم الجواز بقى ، وأنا ممعييش فلوس أجيبلها الأجهزة ، فقولت أشتري بالقسط..
يتبع..

طيب أصحاب المحلات عايزين مقدم تقسيط كبير طيب أعمل أيه ؟
( كل دا وأنا مش بقاطعها نهائي ، حساها عايزة تتكلم )
المهم قاعدة في يوم كدا في المحل وبكلم صاحب معرض وعمالة أتحايل عليه يقسطلي بدون مقدم أو بمقدم بسيط والراجل مش راضي أبداً.
يتبع..

لدرجة عيطت وأنا بكلمة وقولتله دي يتيمة أعتبرها زي بنتك وبرضه ما رضيش ، وأنا بتكلم في التليفون واحد كان واقف عايز يشتري حاجة وأول ما خلصت المكالمة قاللي أنتي عايزة أيه ؟!
فرديت عليه قولتله عايزة أيه مش فاهمة أنت اللي بتشتري عايز أيه ؟
يتبع..

فقاللي يا حاجة أنا سامعك من أول المكالمة ، فبسألك محتاجة أيه للبنت وأنا يا ستي بعتبرها زي بنتي ، فسألته أنت عندك معرض ؟
قاللي لأ بس لو سمحتي أكتبيلي عايزة أيه للبنت كل شئ أكتبيه وأكتبيلي عنوانك لو سمحتي !!!
يتبع..

فقولتله أنا بس عايزة أجيب لها الثلاجة والغسالة والبوتجاز وهى من نقطة فرحها تبقى تجيب سخان بقى وتليفزيون ولو أنت صادق هديك ألف جنيه كل شهر ، قالها ماشي أكتبي اللي عايزاه والعنوان ..
كتبتله ال 3 أجهزة والعنوان ، وقاللي أنا أخوكي ( چورچ ) بعد بكرا بأمر الله أنتظريني ...
يتبع..

فعلا بعدها بيومين لقيته بيتصل وبيقوللي يا حاجة فلانة أنا تحت البيت ومعايا الحاجة تحبي نطلعها ولا نوديها أي مكان تقولي عليه . .
ببص م الشباك يا مدام لقيت عربية نص نقل مليانة حاجات ، فقولتله لأ نطلع الأجهزة هنا علشان جهازها ينزل كله مرة واحدة من بيت أبوها زي أخواتها ..
يتبع..

طلع الحاجة ولقيته جايب أغلى أجهزة وجايب لها كل الأجهزة الكهربائية حتى الميكرويف والمكواة وغسالة الأطباق جايبها ، والمفاجأة بقى جايبلها سجاد من أغلى الأنواع ومفارش وملايات أطقم كاملة ..
بقوله أيه دا كله أنا مش معايا أسدد دا كله !!!
يتبع..

قاللي الحاجات البسيطة دي هدية لبنتي يا حاجة أنا بس هاودتك على حكاية القسط دي الاول علشان توافقي لكن دول هدية ، فمش مصدقة نفسي بقوله طيب وعايز أيه مقابل الشئ الكتير دا ، قاللي المقابل بس كل ما أجي علي بالك تقولي الله يكرمك يا چورچ ويرضى عنك بس وألف مبروك ....
يتبع..

حكيت الحكاية كما روتها لي بالضبط الست الجميلة دي علشان تعرفوا إن مصر فعلا ناسها وأرضها غير ، شعبها غير فعلاً ..
أحنا فعلاً أرض التجلي .. أوعوا تخافوا أبداً علي بلد دا شعبها 😍
يتبع..

أنا فعلاً كنت سعيدة جدا وأنا قاعدة مع الست دي ، وفخورة أوي إني بنت البلد دي 😍
وربنا يكرمك يا چورچ ويرضى عنك في كل وقت يا أبن بلدي يا جدع أوي ..

جاري تحميل الاقتراحات...

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد