رتبها

قبل سنة تقريبًا كنت مقررة أتبع روتين العناية بالشعر الكيرلي و طبعًا الفرق قبل و بعد زي ما انتو شايفين .. أنا نفسي ما كنت أعرف إن شعري ممكن يكون بالمظهر دا

الروتين اللي مشيت عليه اسمه curly girl method يعتمد بشكل أساسي على حفظ الترطيب داخل شعرك .. و شعرك كل ما كان مترطب أكثر كل ماكان شكل الكيرلات محدد و النفشة أقل ..
حذكر أهم النقاط عشان تحافظي على الترطيب و هي:
١- أبعدي تمامًا عن أجهزة الحرارة لأنها تنشف الشعر و تضيع الترطيب

٢- استخدمي شامبو خالي من السولفيت: السولفيت مادة منظفة قوية و تعتبر قاسية على الشعر ..لأنها تسحب حتى الزيوت الطبيعية اللي تفرزها الفروة واللي شعرك يحتاجها
٣- استخدمي بلسم خالي من السيليكون: السيليكون مادة تعمل طبقة عازلة على الشعر ماتروح بالموية فما يوصلها الترطيب و ماتخرج..يتبع

من شعرك غير لو استخدمتي شامبو بسولفيت .. فإذا قررتي تتركي الشامبو بسولفيت يسير لازم تتركي معاه البلسم اللي بسيليكون و لا ترا حيتراكم السيليكون في شعرك و تصير كارثة
٤- استخدمي منشفة مايكروفايبر لتنشيف شعرك أو تيشيرت قطن: لأنها ألطف عالشعر و أقل احتكاك بالتالي ماينفش الشعر معاكي

٥- إذا شعرك تالف بسبب المعالجات للأسف حتضطري تستنيه إلين يطول و بعدها تقصيه ..خلال دي الفترة ممكن شكل شعرك بيكون نص كيرلي و نص ستريت (منظر مو حلو) ..الحل تقدري تضفري شعرك و هو مبلول و تفكيه لمن ينشف عشان تحصلي على شعر مجعد بدون استخدام الحرارة
أو إذا قلبك قوي قصي التالف كله 💪🏻

٦- حاولي كل فترة تعملي ماسكات لشعرك .. سواء ماسكات طبيعية تعمليها فالبيت أو أي ماسك جاهز ( اتأكدي إنه يكون خالي من السيليكون)
٧- شعرك ما يحتاج يتغسل يوميًا: الشعر الكيرلي فالغالب بيكون جاف ،، اتركي شعرك يستفيد من الزيوت الطبيعية اللي تفرزها الفروة

٨- نامي على مخدة ساتان أو ألبسي قبعة ساتان: الساتان لطيف على الشعر و البشرة و ما يمتص الترطيب من الشعر و تصحي تاني يوم و شعرك زي اليوم اللي قبله بأقل نسبة نفشة
٩- أهم مفتاح لدا كله الصبر .. الشعر يحتاج وقت عشان يبان فيه مجهودك فلا تتوقعي إنه حتشوفي نتيجة بعد يومين تلاتة

نجي لروتين الاستحمام و تصفيف الشعر
قبل الاستحمام:
ماسك للشعر عالأقل مرة بالاسبوع.. طبيعي تحضريه في البيت أو جاهز تشتريه .. أو تخلطي طبيعي مع جاهز
تخليه ع شعرك من ثلث ساعة إلى ساعة
شخصيًا أفضل الماسكات الجاهزة و هادي اللي أحبها من شيامويستشر (خالية من السيليكون)

خلال الاستحمام:
شامبو خالي من السولفيت + بلسم خالي من السيليكون (كمية محترمة)
شخصيًا جربت أكثر من براند و أكثر براندين أحبهم هما شيامويستشر و جيوفاني .. تلاقوهم في آي هيرب

بعد الاستحمام:
هادي الخطوة مهمة .. شعرك يحتاج برودكت بعد الاستحمام عشان يعطي شكل الكيرلز الحلو .. بدون برودكت صعب إنك تحصلي على كيرلات محددة
وأنا عشاني جربت منتجات كتير ححط فقط اللي عجبتني
مجموعة شيامويستشر: أول شي أبخ من الميست على شعر مبلول جدًا بعدها نقطتين من السموذي والميلك

مجموعة جيوفاني: برضو نفس الطريقة أحط فالبداية من الليف إن كوندشنر على شعر مرة مبلول و أوزعه كويس بعدين أحط من الجل

طبًعا إنتي تختاري واحد من المجموعتين أو حتى تختاري منتج واحد مو شرط مجموعة كاملة 🤗 جربي و حتعرفي إيش يناسب شعرك أكثر
بالنسبة للكمية يعتمد على طول و درجة تجعيد الشعر.. كل ماكان شعرك طول و تجعيدته أصغر كل ما احتجتي برودكت أكثر

طيب في أسئلة اتكررت:
هل قصيتي شعرك؟ أيوة تقريبًا بعد ما بدأت الروتين بـ ٨ أشهر .. عملت big chop يعني قصيت الشعر الستريت اللي كان معالج بالبروتين
من فين اشتريتي منتجاتك؟ آيهرب و من انستقرام ححط الحسابين اللي تعاملت معاهم بنفسي

أحب أضيفلكم مجموعة جديدة خلتني أسحب على جيوفاني و شيامويستشر من كتر ما إنها تعطي نتايج حللللوة 😻
مجموعة As I Am ليف إن و جل .. لو كيرلاتك صغيرة مرة حيعجبك تعطي تحديد بلمعة و بنفس الوقت ماتخليه مخشب

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد