رتبها

مساء الخير .. 🙂

تحذير ... بوست ملىء بالحشرات الطائره والزاحفه والراكبه ...
🕸️🪳🦟🐛🦋
أصحاب (الانتوموفوبيا) ياخدوا ساتر .. 😌

بما ان الصيف داخل ...
فدا الموسم السنوى للغزو الحشرى المعتاد للمنازل , واللى فيه جزء من الناس بيتعاملوا معاه بلا مبالاه (مالناش دعوه بيهم دول) ..

وجزء تانى بيجيله نوبة هلع وقرف , ويرجع بقا يتحايل على الشركه البتنجانيه , تيجى ترش له البيت بمبيدات أمنه على الصحه بدون مغادرة المكان لدرجة انهم هايرشوا لك شويه فى الطبق اللى بتاكل فيه كدليل على انها مبيدات أمنه ...

(مش عارف انا مبيدات امنه وغير ضاره اللى هو ازاى يعنى؟ فيها فيتامينات مثلا؟!!)
ويجيلك البهوات المناديب يعملوا المقايسه ويقولوا لك لتر المبيد هايتكلف كذا (مبلغ تافه) فانت تفرح وتقول فى بالك الشقه هتاخد لها لترين تلاته بالكتير , وتفاجأ بعد الشغل بفاتوره خارقه حارقه تبيدك شخصيا

فمن باب العلم بالشىء أولا .. ومن باب ماحك جلدك مثل ظفرك ثانيا , ومن باب الاقتصاد ثالثا , هاحكى لكم عن تجربتى الشخصيه مع عالم الحشرات المنزليه اليع ..
انا مش خبير ولا دارس , لكن مجرب , هاحكى عن اللى شفته وجربته , فاعذرونى لو اخطات , ولو فيه متخصص حب يصحح فأهلا بيه

نبدأ بالكابوس الكبير والشر المستطير .. لعنة الصيف .. هادم اللذات ومفسد الأكلات ومقريف الأسر والجماعات ... النمل 😌

بداية أحب أبشركم ان النمل منتشر بشكل (وبائى) فى مصر , يعنى انتشاره فوق الطبيعى بمراحل , لدرجة انى فاكر انى قريت دراسه قديمه زمان فيها جملة ان (مصر تطفو فوق بحيره من النمل !! ) ...
فمع الأسف , مفيش حل جذرى ونهائى للنمل , أنجح الحلول هو حل مؤقت ممكن يستمر معاك لسنتين بالكتير

علشان تتعامل مع أى آفه , لازم الأول تفهمها وتعرف طبيعتها ونمط حياتها , بالتالى هاتقدر تحاربها وتقضى عليها ...
لكن المعامله الجاهله المقتصره على الجرى ورا الحشرات ببخاخ المبيد , مجرد عبث وحرث فى مياه البحر

النمل اكتر حشره اتعاملت معاها , بحكم انى من هواة تربية نباتات الزينه من طفولتى , وكانت مشكلتى الرئيسيه محصوره فى حاجتين , العصافير البلطجيه اللى ادمنوا اكل براعم الاوراق الصغيره (ودول مشكلتهم سهله) والنمل , ودول فضلت سنين عاجز عن ايجاد حل لهم

اختصارا للوقت مش هاحكى عن التفاصيل واهجيب خلاصة التجربه ...
النمل أنواع كتير (اقصد المنتشر عندنا فى المدن) , هبدأ بالنوع الأعند والأصعب فى المكافحه , وهو النمل المنزلى الصغنن خالص دا

دا دايما هتلاقيه جوه البيت نفسه , وعنده قدره هائله على شم الأكل والاجتماع عليه فى لحظات والوصول له لو خبيته فين ... فيه نوع تانى أكبر شويه ممكن تميز براسه اللى بتكون ضخمه بشكل واضح ودا بيكون أشرس وغالبا هتلاقيه فى البلكونه لو عندك زرع او فوق السطوح

النوع التانى دا اشبه بقبائل محاربه كدا , بيستهدف النباتات وبيتغذى على اجزاء منها وبيقطع جذورها علشان بتدمر عليه شبكة الانفاق اللى بيحفرها جوه التربه الزراعيه وبيعمل منها مستعمره ثانويه يعيش فيها

وبيبطن جدران الانفاق دى من جوه بماده عازله للمياه بيخلى التربه اشبه بكتلة اسمنت لا تمتص المياه وبالتالى الزرع بيبدأ يموت ...
مميزات المكان انه قابل للحفر وانه يتعمل فيه مستعمره , والميزه التانيه والاهم هى الدفء والرطوبه الشديده اللازمه لحياة النمل

ومع الاسف الانواع دى تأثرها بالمياه ضعيف جدا وبتطفو فوقها لساعات بسهوله , يعنى حل دلق المياه مالوش لازمه ..

محاربة النمل فى المجمل منهجها هو انك تقرف النمل وتحول حياته جحيم وتطفشه من المكان , مش انك تقضى عليه لان دا مستحيل عمليا ...
بالتالى شغلك انك تحول المكان اللى عاوز يستوطنه لوسط غير صالح للمعيشه أولا , وتقطع عليه طرقه وشبكة امداده ثانيا

فاكرين لما قلت من كام دقيقه (مستعمره ثانويه) ؟؟
أيوه , لان مصدر النمل اصلا مش بيتك .. المصدر الاساسى حضرتك بيكون مستعمرات كبرى تحت المبنى اللى انت عايش فيه وحواليه , وبينتشر منها فى انحاء المبنى عن طريق طرق ثابته بيمشى فيها وبيحددها بمواد كميائيه معينه بيسموها فيرمونات

لما تشوف طابور نمل ماشى على الحيط , التصرف المعتاد انك تجرى تجيب الفليت وترشه ..
لأ , دا غلط .. أولا امشى وراه , شوف أوله فيه وأخره فين , شوف جاى منين ورايح فيه وليه ؟ هل مثلا ملموم على وليمه ؟ (طعام او حشره) ؟ وشايلها ورايح يخبيها فين ؟ شق فى الحائط مثلا او شباك ؟!!

بعد ماتعرف دا هتتعامل بالمبيد مع الطابور بداية من المكان اللى فيه الاكل وتمشى معاه وصولا للشق او الجحر اللى جاى منه اصلا ..
هتلاقيه خرم دقيق فى الاسمنت الفاصل بين ألواح السيراميك مثلا , او فتحة فيشة كهربا او شباك منور او بلكون

نسيت اقول لكم ان النمل من خبثه بيستخدم خراطيم الكهربا اللى جوه الحائط كشبكة نقل سريه (مترو انفاق) يتحرك فيها بحريه من مستعمراته اسفل المبانى والعمارات لداخل كل شقه وغرفه بدون ماتشعر

النمل عنده ذاكره كميائيه , يعنى مثلا لو معشش اسفل عماره فيها 10 شقق , بيميز فى بداية كل موسم الشقق اللى كان فيها خير وفير السنه اللى فاتت ويهاجمها بضراوه اكتر من الشقق النضيفه وفيه شقق بيتجنبها اصلا اما بسبب استخدام المبيدات بشكل سليم او ان الرزق فيها معدوم

فلو انت نفذت خطة مكافحه سليمه ممكن توصل لمرحله انه يعدى عليك موسم صيف او اتنين متحتاجش ترش فيهم نقطه مبيد أصلا ..

طيب الرش يبقا ازاى ؟ يعنى مثلا عندى ترابيزة سفره كل ما احط عليها اكل الاقيه اتملا نمل فى دقايق ؟ أحميها مبيد مثلا ؟!!
لأ .. الاماكن دى عادة بتكون قريبه من مخرج جحر للنمل علشان كدا بيتواجد فيها بكثافه اكتر , وحلها مش انك ترشها مبيد , لكن ترش مدخل الجحر لو اكتشفته ,

وتانى حاجه ترش رجول الترابيزه نفسها والارض تحتها , وتبعدها عن الحيط بحيث يكون فيه فاصل مناسب بينها وبين اى جسم تانى بحيث ميبقاش كوبرى جديد للنمل , وبعدها حط اللى انت عايزه وهتلاقيه سليم باذن الله

فيه بقا النمل الفارسى الكبير ودا مشكله عند الناس اللى ساكنه فى مناطق قريبه من الصحرا ... لكن رغم انه مؤذى ومرعب , لكن مكافحته أسهل بكتير قوى من النمل الصغنن العنيد دا , وكمان حساسيته للمبيدات اكبر وقتله اسهل

النمل دا عادة بييحى من بره البيت (من المنور غالبا) وبيستهدف بيتك لو مش نضيف كفايه (خصوصا المطبخ) .. يعنى تسيب الاطباق من غير غسيل ساعتين تدخل تلاقيه عامل حفله جوه

ومع الاسف فى بعض الاحيان وفى ظروف معينه بتطلع لبعض انواعه أجنحه مؤقته , فبيطير فى الشقه , وبيعض وعضته مؤلمه على فكره ...
دا حله انك ترش الفتحه اللى بيخرج منها لو عرفتها , او ترش الاوضه بكثافه وتقفلها كذا ساعه ... كل اللى فيها هايموت

نرجع للنوع الصغير تانى ... ايه المبيد المناسب ؟!!
بداية فكك من المبيدات التجاريه بتاعة اعلانات التلفزيون , فاعليتها قصيرة المدى وسعرها غالى وريحتها مقرفه ..
فيه كذا اوبشن تانى , أرخص وفاعليته أطول بكتير

أولا .. فيه مبيدات بتتصنف انها مبيدات زراعيه مش منزليه , ودى اشهرها فعاليه مع النمل , عائله كامله من المبيدات اسمها (مركبات الفسفور العضوى) آلية عملها انها بتقطع نظام الاتصال فى الجهاز العصبى للحشره وتسبب موتها .. وفى نفس الوقت درجة سميتها منخفضه نسبيا

لكن لها عيب واحد كل مبيدات العائله دى مشتركه فيه مع الاسف .. ان ريحتها بشعه , نفاذه وقويه جدا ..
فلو الموضوع دا بيضايقك بلاش منها , ولو انت عندك حساسيه صدريه او ضيق تنفس فتجنبها تماما

المبيدات دى بالمناسبه بيترش بيها اغلب الخضار والفاكهه اللى بتاكلها وبتقضى على اغلب الافات الزراعيه , ومش بتضر النبات لو اترشت بالتركيز المناسب

احد أفضل واقوى المبيدات دى فى قطع رجل النمل من البيت , هو الزغلول دا .. المبيد الأشهر .. الملاسيون

هتلاقيه عند محلات المبيدات الزراعيه فى عبوه زرقا مميزه كدا باحجام توصل لنص كيلو او كيلو على ما أذكر .... شكله زى زيت الطعام كدا وقوامه تقيل زى الزيت شويه , مش بيستخدم بشكل مباشر ولكنه بيتخفف بالمياه

نسبة التخفيف المكتوبه عليه كبيرن نسبيا لانه مفترض انه بيستخدم بكميات كبيره لرش حقول زراعيه ...
ف بحسبة النسبه والتناسب هتلاقى جرعته حوالى 20 ملي (قيسهم بالحقنه) لكل لتر مياه ...
وممكن تقلل النسبه كمان شويه وهيبقا فعال برضه

بمجرد ضخ المبيد فى المياه هتلاحظ ان لون المياه اصبح ابيض زى اللبن ..
لو هاتستخدمها مع نباتات الزينه فالوضع هايختلف شويه ...

لو النمل استوطن فى احواض نباتات الزينه عندك وفشلت تماما فى ابعاده , ف ممكن تسقى الزرع بالملاسيون دا , بنسبة نص ملى على ازازه مياه (نص ميلى متزودش عن كدا) وهتلاقى النمل اختفى من عندك بإذن الله ...

الطريقه دى جربتها كتير وكانت فعاله ومش بتؤذى النباتات , لكن مع العلم انها نباتات قويه نسبيا , فمعرفش الوضع هايكون ايه مع نباتات الزينه الحساسه ... بس حبيت اضيف النقطه دى علشان تكون ف الصوره

والفرق الكبير فى نسبة التركيز دا سببه انك هاتستخدم المبيد بشكل غير استخدامه الاصلى اللى هو الرش على الاوراق والمجموع الخضرى واللى بيكون بالتركيز الاعلى (20ميلى للتر) وبدلا من كده بتسقى التربه بالمبيد بحكم ان النمل عشش جواها , فبتخفف النسبة لنص ميلى على 1 ونص لتر مياه

فيه مبيدات تانيه برضه من نفس عائلة مركبات الفسفور العضوى , ريحتها اخف نسبيا من الملاسيون وتأثيرها مقارب له , لكنها أغلى شويه .. وريحتها فى المجمل وحشه برضه 😂

طيب ... معندكش استعداد لتقبل موضوع الريحه دا او عندك حد عنده مشاكل فى التنفس ...
عايز حل بديل ... بس كدا ؟؟ عنيا 😉

إليكم ... الزغلول البديل ... إكتوميثرين , لعلاج الجرب والقمل والهرش ...
جرب وهرش ايه ياعم باقولك عايزين حاجه للنمل ...
اه مهو نسيت اقول لحضرتك انه ثبت انه فعال جدا فى القضاء على النمل وقطع رجله من المكان لفتره طويله :))

هو موجود فى الصيدليات مش محلات المبيدات , وله صور كتير وتركيزات من 2,5% الى 5% ..
هاتوا منه (لوسيون) بتركيز 5% ...
العبوه صغيره نسبيا حوالى 50 ميلى بس ...
بتخففها بالمياه بنسبة 1 الى 2
يعنى كل ميلى منه تزود عليه 2 ميلى مياه ...
وتحطه فى بخاخه وتتعامل

ملوش ريحه او بمعنى أدق ريحته خفيفه جدا وريحه دوا , مش الريحه المعفنه المعتاده للمبيد .. مكان مش مضر للبشر بحكم انه اصلا دوا وبيتحط عالجلد ...
وعموما الكائنات ذات الدم الحار خلايا دمها بتتعامل معاه وتكسره بسرعه وبالتالى بتقضى على تأثيره السام بعكس ذوات الدم البارد اللى بتعجز عن دا

عيوبه ..
غالى نسبيا ,, العلبه على ما اذكر بتسعه او 15 جنيه مش فاكر , وخمسين ميلى بس , يعنى بعد التخفيف 150 ميلى ... لو هتستخدمه على نطاق واسع هاتحتاج كذا عبوه .. دا اولا ..
ثانيا , خطر على الاسماك او الزواحف باعتبارها من ذوات الدم البارد , فو مربى حاجه منهم , حرص عليها

ثالثا ... يقال (ومعرفش مدى صحة الكلام دا) انه خطر على القطط !!!
معرفش ليه رغم ان القطط ثدييات ودمها حار ... لكن حبيت اذكر برضه الموضوع دا رغم عدم تأكدى منه ..
رابعا ... اياك تفكر ترشه على نبات او جنبه .. هايقضى عليه

فيما عدا ذلك فتأثيره على النمل مبهر وسريع وطويل الامد , بحيث مش هاتضطر ترش المكان الواحد غير مره واحده اول الصيف بس ... الا لو مسحته بالمياه لاحقا او كان مكان مكشوف ومعرض للشمس والرطوبه بشكل كبير

نسيت أقول ان اكتوميثرين دا الاسم التجارى ... الاسم الاصلى والماده الفعاله اسمها (بيرميثرين) ودى ممكن تتواجد فى ادويه بكذا اسم (تجارى) يختلفوا حسب البلد وحسب الشركه المنتجه .. لكن اسم الماده الفعاله ثابت فى العالم كله

بصراحه حوار النمل دا عايز بوستات كامله , فهاكتفى بالقدر دا علشان اتكلم عن باقى البلاوى , واللى عايز حاجه تانى عن النمل يسالنى فى المنشن بقا ...

نسيت اتكلم عن نوع من النمل , أكبر من النمل الصغنن المعروف , وأصغر من النمل الفارسى وحرامى الحله .. حجمه متوسط ومميز برجليه الطويله وجريه السريع قوى بشكل ملحوظ عن باقى الانواع ..

دا مش منزلى , هتلاقيه حوالين الشجر لو عندك جنينه مثلا ... دا غلبان خالص ومش عدوانى , شوية مياه يخلوه يجرى يبرطع ويقول حقى برقبتى ...

ثانيا .. الصراصير
فيه النوع الكبير دا اللى بيطلع من البلاعات وبيطير احيانا ..
دا حله انك تضربه فى معقله بانك تكشف اغطية البلاعات العموميه تحت البيت ,

هتلاقيه متجمع باعداد كبيره فى الفاصل بين قاع البلاعه حيث (البهاريز) وبين الغطا .. وغرق أمه مبيد ,, بس بسرعه لانه بمجرد ما تكشف الغطا ويحسوا بالنور هايجروا يبرطعوا فى كل الاتجاهات بره البلاعه 😱😂😉

الصراصير عموما بتتاثر بالمبيدات بسهوله , تأثر الحشرات مش مرتبط بالحجم ولكن بطبيعة الحشره , اكتر الحشرات مقاومه للمبيدات هى النمل , رغم حجمها الصغير ...
المبيد اللى يقتل النمل قادر يقتل اى حشره تانيه , والعكس غير صحيح

النوع التانى ودا الاعند ... صراصير المطابخ .. الصغننه دى ...
دى بقا ياسيدنا مش بتتعامل بالمبيدات , رش مهما ترش , هايموت منها لكنها هاتستمر فى التواجد والتكاثر فى مطبخك برضه , لانها ببساطه بتخبى بيضها وصغارها فى اعشاش مخفيه جوه اثاث المطبخ مستحيل المبيد يوصل لها

فلما نرش , مهما ترش , مش هايموت الا الصراصير اللى حظها العاثر خلاها بره جحورها وقت الرش وسقط عليها المبيد بشكل مباشر , كام يوم والاجيال الصغيره والبيض هايكبر وهيرجع الانتشار زى الاول واكتر

طب والحل ؟
سهل جدا ...
حاجه اسمها (عجينة الصراصير)
وهى عباره عن خليط دقيق وسكر وحليب فى هيئة عجينه (زى اللبانه كدا) ومسقيه بالماده الفعاله الىل هى حمض البوريك ... بتشتريها من الصيدليه او محلات منظفات تقريبا , بتقطعها لقطع صغيره وبتلزقها زى اللبان فى اثاث المطبخ

المهم انك تلزقها بتوزيع مناسب فى كل مكان , ولاحظ انك لازم تخفيها كويس فى الاركان والزخانيق والزوايا الخفيه لاثاث المطبخ , متسنصحش وتحطها فى مكان ظاهر علشان الصرصار يشوفها , بالعكس , كل ما تكون مخفيه فى الاركان كل ما الصراصير هتوصل لها اسرع

الميزه هنا انك مش مطالب توصل للحشره , الحشره (الصرصار) هى اللى بتروح بنفسها للمبيد وتاكل منه ...
خلال اسبوعين بالكتير هتلاقى الصراصير اختفت من مطبخك .. ماتشيلش العجينه من اماكنها , سيبها , هايفضل تأثيرها ممتد كذا سنه حسب تركيزها ونضافة صنعها

دا انسب وانجع حل لموضوع الصراصير المنزليه , اى حد هايقولك مبيد او رش او شركة بطيخ ... فهو بيشتغلك

فيه ايه تانى زاحف قبل ما نخش عالطاير ؟؟ 🤔
آه .. فيه النمل الأبيض , دا مصيبه وبلوه مسيحه ومخرب بشكل فوق العادى ..
بصراحه انا متعاملتش معاه ولا اتمنى , وهو عموما مش منتشر قوى حاليا , لكن فيه نوع من الخلط بينه وبين حشره تانيه منتشره جدا وقليل اللى بيلاحظها او بيعرفها

الحشره دى اسمها (قمل الورق) وهى منتشره فى منازل كتير فى مصر وغالبا محدش بيحس بيها , بينما منتشره بشكل وبائى فى بيوت اهالى اسكندريه تحديدا وهاقول ليه

الحشره دى حجمها صغنن جدا , أصغر من النمله بكتير وكمان لونها شفاف وبالتالى ملاحظتها شبه مستحيله حتى لحاد النظر , لكن الكبير منها ممكن تشوفه بالصدفه على ورقه بيضا لو نظرك حاد لان لونه بيكون أغمق

الحشره دى (بعكس اسمها) مش بتقرص ولا بتتطفل على البشر , هى باختصار بتتغذى على العفن والفطريات اللى بتشكل طبقه رقيقه جدا على سطح المواد العضويه فى بيتك .. زى الاثاث الخشبى او الكتب او الورق بوجه عام وخصوصا الكارتون وورق الجرايد

العفن دا بيكون طبقه رقيقه جدا انت متشوفهاش اصلا , وسببها بيكون ان مناخ البيت رطب زياده عن اللزوم وضوء الشمس مش بيدخل بشكل كافى , والموضوع دا منتشر قوى فى اسكندريه بحكم الرطوبه وتزاحم العمارات

الحشره دى بقا مش بتمشى فى طوابير ولا بتعشش فى جحور زى النمل , دى بتجرى وتبرطع فى كل حتى بفوضى وعلى غير هدى , لو وصلت لمرحلة الاستيطان فى بيتك هتلاقيها (حرفيا) على كل حاجه وفوق وجوه كل حاجه , العفش - الكتب - السراير - الاجهزه - حتى ساعة الحائط ... اى شىء هاتحركه هتلاقيهم فيه

طب دى ضررها ايه ؟
من حسن الحظ انها بتختلف عن النمل الابيض فى شىء واحد , هو الفك .. النمل الابيض بيكون عنده فك كامل بيخليه قادر على افساد الاخشاب والاثاث , بينما الابله دى فكها غير كامل (تحس انها لابسه كمامه كدا) ودا بيخليها مقتصره على اكل العفن العضوى

فيه ناس كتير لما بتلاحظها وتجيب شركة مكافحه , بيقولوا لها دا نمل ابيض , اللى بيقول كدا اما غالبا مش عارف فبيخلط بين النوعين , او عايز يخوف صاحب المكان علشان يشجعه يكع المبلغ المحترم بتاع المكافحه

طب ايه ضررها ...
من خلال التجربه الشخصيه هى ملهاش اى ضرر مباشر غير حاجتين ..
اولا انتشارها فى كل مكان , ودا مش هيضايقك الا لو اخدت بالك من وجودها اصلا ودا صعب انه يحصل

تانى ضرر ودا الاهم .. ان فضلاتها المنتشره فى كل مكان , رغم صغر حجمها , بتجنن الشعب الهوائيه وتخليك حتى لو مش بتشتكى من اى حساسيه صدريه , عمالت تكح فى نوبات كحه طويله خصوصا اول لما تصحى من النوم وبالذات فى الشتا

فلو كنت بتشتكى من نوبات كحه طويله رغم عدم معاناتك من اى مرض صدرى , والكحه دى بتختفى بمجرد ما تغادر البيت , فاعلم انه محتمل ان الهانم دى تكون فاتحه مزرعة العفن السعيده فى منزلكم العامر

طب الحل ايه ؟
رش ؟
هاتنقع البيت كله فى المبيد بقا بحكم انها ملهاش مكان تواجد محدد ؟!!
طبعا مينفعش ..
الحل انك تهوى البيت كويس وتعرضه للشمس ما امكن , خفض نسبة الرطوبه داخل البيت بيقضى على طبقات العفن اللى بتتغذى عليها الهانم دى

كمان تحريك العفش بشكل مستمر وفتحه ونقل الكتب وتهويتها بشكل دورى , لانها مبتحبش الحركه او التعرض للضوء ...
بالوضع دا شويه وهاتختفى من تلقاء نفسها من غير رش ولا يحزنون

فيه ايه تانى زاحف ؟؟
اه , نسيت اقول ان ورق الجرايد والكارتون تحديدا بيكونوا مصدر جذب لحشرات كتير حجمها صغير ممكن تضايقك وتسبب لك حساسيه فى الصدر , فلو مخزن كارتون او ورق جرايد عندك حاول تتخلص منه او على الاقل تعرضه للشمس بشكل دورى

ندخل على كابوس السيدات الأكبر ...
العنكبوت النونو 😂

العناكب عموما مش آفه , بل غالبا بتتغذى على افات وحشرات ضاره , فنظريا هى (اغلبها) مفيد , لكن بسبب طبيعتها بتسبب حاله من الرعب والقرف للناس , اضافه للكميه معتبره من التخاريف والاساطير انها بتجيب الفقر فى البيت

العناكب فى مصر مش واخده شكل وبائى بعكس النمل ... ودا وضع مقلوب عن اماكن تانيه زى امريكا مثلا اللى العناكب فيها منتشره وبائيا بانواع كتير بعضها خطر جدا وبيسبب مشاكل جامده للبشر وبيتعايش جوه المنازل كمان ...

وبعكس استراليا اللى فيها انواع عملاقه وبتهاجم البيوت , تخيل مثلا نبقا قاعد فى استراليا فى بيتك فى أمان الله تلاقى الشىء دا طالع لك من ورا الستاره ؟؟؟ اه المشهد دا بيتكرر كتير قوى هناك

فالموضوع عندنا فى مصر مش كدا , والعناكب اللى ممكن تشكل خطوره نسبيه موجوده بره المنازل وغالبا فى الاماكن الصحراويه .. مش موضوعنا حاليا ..
خلينا فى المنزلى اللى محصور فى شكلين رئيسيين يندرج تحت كل شكل فيهم كذا نوع

سيبنا من الانواع لاننا مش متخصصين , خلينا فى الشكل العام , اول حاجه الاخ التقليدى اللى جسمه صغنن ورجليه طويله دا , اللى بيعمل شبكه على الحيطه وتيته كانت بتقول لك انه بيجيب الفقر فى البيت

دا مش هايعضك ولا هايطلع عليك وانت نايم , بس مشكلته فى منظره المقرف اول حاجه , وثانيا انك لو سيبته فبعد فتره (هى انثى بالمناسبه) هاتخلف لك عناكيب صغننين هايملوا بيتك شباك زى افلام الرعب كدا

ستات البيوت بيتعاملوا معاهم بالزعافه او المقشه انهم يدمروا الشبكه بشكل تلقائى , ودا غلط , لان ساعتها الام غالبا بتجرى على الأرض وتهرب وتعمل شبكه جديده فى مكان تانى خلال يومين بالكتير ,

ودى حتى لو لاحظتها وقدرت تقتلها وهى بتجرى عالارض , فمستحيل تشوف ولادها الصغننين اللى كل واحد فيهم هايجرى فى اتجاه مختلف ويعمل شبكه جديده (واللى غالبا هايعملها فى مكان غبى بحكم قلة خبرته)

فلو شفت شبكه , قبل ما تدمرها دقق فيها كويس , هل الام لوحدها ؟ ولا فيه ذريه صغننه منتشره فى ارجاء الشبكه ؟ لو لاحظت عنكبوت اصغر ميت فى ركن فدا الذكر والام فى الحاله دى حامل وهتاكله للاولاد لما يفقسوا :)

بعد ما تعمل الدراسه السريعه دى هاترش الشبكه بالمبيد (على كيفك) بحيث تضمن رش كل العناكب اللى موجوده لو كان فيه غير الام , وبعد ما تتأكد من موتهم ساعتها ابقا استخدم الزعافه وشيل الشبكه براحتك

تانى شكل ممكن تلاقيه فى بيتك , هو العنكبوت النطاط , دا مش بيعمل شبكه , وجسمه اصغر ورجليه اقصر , طوله سنتى او اتنين وهتلاقيه بيتمشى عالحيط احيانا فى حركات سريعه كدا , يعنى يجرى بسرعه ويقف ويرجع يجرى بسرعه ويقف , ولو اتعرض لخطر بينط فجأه من مكانه

الكابتن دا مبيعملش شبك نهائى , لانه بيصطاد فريسته بالقنص ...
ذكى جدا وحاد البصر , هايميزك بسهوله ويتجنبك ... مفيش منه اى ضرر نهائى , ومش ممكن يتكاثر لانه ببساطه غير اجتماعى وبيعيش بشكل منفرد , ولو تصادف انه فى غرفتك تواجد 2 منهم فواحد هايقتل التانى لازم

فمفيش منه اى مشكله , عاوز تخبطه شبشب براحتك , عايز تسيبه سيبه وغالبا هايقع تحت جزمتك يوما ما بالصدفه او هايتحول لاستيكر بسبب وقوفه فى برواز الباب او الشباك ساعة فتحه او قفله 😂

حشرات الفراش ... سريرك عباره عن غابه من انواع كتييير من الحشرات متناهية الصغر مرعبة الشكل , بتتغذى على بقايا جلدك وشعرك اللى بتتساقط اثناء نومك , حلها التهويه المستمره للفرش وتشميسه , واظن (مش متأكد) ان الاكتوميثرين ممكن يكون فعال بحكم انه بيقضى على حشرات بتنتمى لنفس العوائل

نختم باكتر شىء مقرف وضار من وجهة نظرى ... القراد , ودا مش هتلاقيه فى بيتك الا فى حالتين , لو بتربى كلاب , او عايش فى فيلا لها جنينه
القراده فى الأصل حشره بتتواجد على النجيله والاعشاب فى الحدائق , مش بتطير ولا بتقفز , لكن عندها رادارات قويه جدا بتستشعر اى كائن ذو دم حار يمر قربها

بمجرد ما تحس بوجود العائل الجديد تتجه نحوه وتطلع على جسمه وتدور على مكان مناسب تستقر فيه , وبعدين؟ تقرصه ؟
لأ ...
بتخترق جلده وتدخل فيه بكامل راسها وصدرها , وتلزق بالوضع دا وتفضل تمتص الدم باستمرار لحد ما حجمها يتضاعف

وتبدأ تتكاثر بسرعه وتنتشر فى كل انحاء الجسم , خصوصا الرأس والأذن والافخاذ من الداخل وحوالين فتحة الشرج ...
وبما ان القطط المنزليه مش بتخرج غالبا فالمعرض اكتر للاصابه هى الكلاب بحكم ان اصحابها بيفسحوها فى الحدائق كل مده ,

ومع الاسف مستحيل تلاحظ الاصابه بدرى لان الحشره بتكون حجمها صغير وسهل تختفى وسك شعر الكلب الكثيف , مش هاتشوفها الا لما تكبر وتتعملق من الدم اللى امتصته من جسم المسكين ووقتها هاتكون تكاثرت وبقا فيه كتير غيرها

وهاتكون انتقلت لباقى حيواناتك الاليفه كمان سواء قطط او كلاب , او انتقلت لك شخصيا , لكن مشكلتك هاتكون اسهل لانك سهل تكتشف وجودها فى جسمه المكشوف نسبيا من الشعر ...
انتزاعها بيتم بالملقاط وبطريقه معينه , لو شديتها غلط بتخرج بصعوبه ونص جسمها بيفضل تحت جلدك , نفس الموضوع فى الكلب

ولو انتشرت ف جسم الحيوان انتزاعها واحده واحده هايكون موضوع مرهق وعبثى وساعتها هاتضطر تاخدها لدكتور يرشها ويديها كورس علاجى وحوارات كدا ..
طب فين المشكله بقا ؟
المشكله فى الآتى ...

المشكله ان القراده دى لما بتنتشر مش بتكتفى بجسم الحيوان , بل بتنتقل لأوكار داخل اثاث بيتك وشقوق الخشب وبتختفى جواها وعندها استعداد تفضل جوا بدون طعام لشهور طويله , وبالتالى حتى لو عالجت نفسك واسرتك وحيواناتك بتكون عرضه للاصابه تانى بكل سهوله

وعند المرحله دى اضطر اقولك اسفا , انك بعد ما تعالج حيواناتك , وبعد ما تعالج نفسك لو كنت مصاب كمان , هاتضطر ... آسفا .. تجيب شركه اباده , وتكون شاطره كمان , لانك اهتحتاج لحد متخصص يقدر يرش بيتك بشكل معين يضمن ابادة كل القرادات اللى استخبت فى اماكن مختلفه فى البيت

ومش بس كدا , هايضطر كمان يعمل متابعه لبيتك بعد مده معينه ويرش تانى علشان يتأكد من زوال الحشره دى تماما من بيتك , فلما تسمع انها بيتضرب بيها المثل فى اللزق والغتاته , فاعرف انها اسم على مسمى فعلا

اظن كدا اتكلمت على اشهر الحشرات الزاحفه تقريبا فى البيوت , بكره ان شاء الله نتكلم عن سلاح الجو بقا ..
لو حد عنده سؤال يتفضل او حشره نسيت اتكلم عنها , بس زاحفه ..

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد