تجربة شخصية
الثقافة
العائلة
خيانة
مغامرة
السرد الشخصي
نمط الحياة
خداع
ديناميات العائلة
الانعكاس الثقافي
ثريد عن الطلعه اللي طلعناها زمان بدون ما نعلم اهلنا وخلتني اعرف كيف شعور الخيانه والجحده من اقرب الاشخاص
كنا في جده نقضي عيد الاضحى عند عمتي، يوم من الايام كنا كلنا المبزره سهرانين وطفشانين ف قررنا انه نطلع الصباح نروح مطعم نفطر وبعدها نفرفر شوي ونرجع بدري قبل يصحون اهلنا من النوم، جات الساعه ٧ لبسنا وقابلنا العيال بالحوش واتفقنا ان نمشي بالضبط على الخطه ونرجع البيت الساعه ١٠
ركبنا السياره وصلنا المطعم واكلنا وبما انه انا اللي دفعت حتى موية المخلل خليتهم يشربونها عشان احلل الفلوس، فرينا واستانسنا ورجعنا البيت في الوقت المحدد، دخلنا الحوش وقبل ندخل البيت رسلنا اكثر شخص رشيق بيننا يدخل البيت بسرعه ويشوف اذا احد صاحي ولا لا عشان اذا الوضع امان ندخل
دخل ولد عمتي اللي عمره في ذاك الوقت ١١ سنه وطلع بعد ٣ دقايق قال الوضع تمام خلاص ادخلوا، دخلنا واحنا نمشي على اطراف اصابعنا بكل هدوء متوجهين لغرف النوم متحمسين للنومه اللي بتجي وبطريقنا سمعنا صوت شخص معصب قال: وين كنتوا؟!
كلنا بنفس الوقت طالعنا ورانا ولقينا ابوي قاعد على الكنب للحظات سحبنا عليه وطالعنا في ولد عمتي الصغير ولسان حالنا يقول: غدرت فينا يا الوصخ؟! المسكين ارتبك وقال: والله ما شفته!!! والصدق محد شافه لأن ابوي وقتها كان لابس ثوب بيت لونه بيج نفس لون الكنب اللي قاعد عليه
هنا كلنا سكتنا وانتظرنا اكبر وحده فينا تتكلم وتبرر موقفنا او تصرف الموضوع لكن مافيه فايده فجأه صارت ما تعرف تنطق! اشتد غضب ابوي وبدأ يرفع صوته وكان لازم نقول شي فجأه ولد عمتي اللي اصغر مني قال: اما ما كنت تدري يا خالي خالد؟! شهد قالت انها اعطتك خبر اننا طالعين نفطر وانك موافق!
هنا انا شهقت شهقه من قوتها صار فيه نقص في الاكسجين اللي في البيت وقلت: يا كذاب! قال: اصلاً محد هنا معه فلوس غيرك بالله عليك كيف نطلع واحنا ما معنا فلوس؟ ما امداني ارد عليه إلا فجأه البنات قالوا: صحيح كلامه، شهد هي اللي اقنعتنا وهي اللي دفعت حق الفطور والبنزين والايسكريمات
في ذيك اللحظه حسيت انه انهد حيلي ما عرفت وش اقول او كيف ادافع عن نفسي وانا ضدي ٦ جحوش مأكلتهم ومشربتهم على حسابي!
وانا فيني غصه قلت لأبوي: تصدق كلامهم؟ قال: جيبي جوالك سحبه مني وطردني للغرفه وجلس يهزئهم تهزيئ لا صار ولا استوى، في نص التهزيئ بسوي دراما طلعت من الغرفه وانا اصيح من الغبنه جيت حطيت راسي على ركبة ابوي واتبكبك اقول: صدقني كذابين هم اللي استغلوني قال: تستاهلين وطردني مره ثانيه
وكمل تهزيئ فيهم وانحرمنا كلنا من الطلعه يومين، عاد بالليل لما صحيت ناداني وقال لي كم صرفتي وعلمته ورجع لي الفلوس اللي دفعتها كامله وقال: مره ثانيه لا يضحكون عليك يا حاتم الطائي وقتها ما كنت اعرف مين هو حاتم الطائي عبالي مضيع الوالد قلت له: قصدك جحا؟ ضحك وقال: لا قصدي حاتم الطائي.
جاري تحميل الاقتراحات...