رتبها

#ثريد_الحاله_الكيتوزيه ..
#DR_FIT_SUDAN .
بسم الله والصلاه والسلام على رسول الله عليه افضل الصلاه واتم التسليم.
📌 عامل دايت وحسيت بالجوع شديد
📌 حسيت كأنك عيان وعندك صداع خفيف
📌 حاسي بالقرف والاحباط والزهج
📌 احساسك زي الفي الصوره دي؟ تعبت من الدايت من شده التعب؟
ده شنو؟

📌 دي اسمها ( حمى الكيتوزيه ) عباره عن مجموعه اعراض كتيره على جميع مستويات الجسم سواء والنفسيه والصحيه والعقليه والبدنيه الجسم بتعرض لاعراض جانبيه ( مزعجه) انت ببساطه ما بتعرفها ولا بتقدر تحددها ببساطه بتحس انك ما عايش نفسك وحاسي باحاسيس كتيره وملخبطه ..

📌 الاعراض ممكن تشمل.
📍 حمى وصداع خفيف
📍 طشاش عام
📍 كسير وتعب وارهاق
📍 زهج وقرف ونفسيات متزعزه
📍 وشهوانيه للاكل وكسر الدايت
📍 اوجاع في عضلات الجسم بصوره عامه.
📍 مخك كأنو فيه ضبابيه واضطراب في المشاعر .
📍 احساس كأنك وقفت سجائر واعراض انسحاب..

📌 الاليه البتسبب الاعراض الجانبيه والحاجات الانت بتحس بيها دي للان ما معروف المسبب ليها بس كل النظريات اثبتت ورجحت انو هي عباره عن فتره انتقاليه ( زي الجوطه الحاصله في السودان) انو جسمك ببساطه عاوز ينتقل من استهلاك الجلكوز لاستهلاك نوع ثاني من الطاقه وهي الكيتوناات..

📌 جسمك بطبعه اللهو ( الميتوكوندريا) وهو الجسيم والعضي المنظم لاستهلاك الطاقه معتمد اعتماد اساسي على الجلكوز . فنحنا لمن تعمل دايت بنغيير المنظومه بالكااامل والحاجه دي في البدايه بتكون صعبه جدا على الجسم لانو الميتوكوندريا حقتنا في البدايه ما متخصصه في التعامل مع الطاقه الدهنيه.

📌 هنا بتبدا المرحله الانتقاليه وعليه بكون في
📍 تضارب في الطاقه
📍 تضارب في العمليات الحيويه
📍 تضارب في العمليات الفسيولوجيه البتحكم التعامل مع سوائل الجسم والطاقه بصوره عامه علي جميع المستويات سواء عضويه او حيويه او حركيه ( العضليه)
فأنت ببساطه عاوز تعبر للامان عشان ما توقف

📌 انا بتكلم عن اتباع دايت صحي يعني الكيتوزيه ما الا تعمل كيتو دايت عشان تخشها لانو هي حاله مرتبطه بانتاج كيتونات اللهي من دهون محزنه جوه الجسم( المرحله الاوليه)فأنت بائي دايت صحي ممكن تخشها بكل بساطه .
طيب معلومه ( التضاربات البتحصل شنو؟ خلال الفتره الانتقاليه دي؟ 👇
شوف واتمتع

⬇صوديوم
⬇ بوتاسيوم
⬇ مغنيسويوم
⬇ سوائل
📌انتفاخ خلايا الدماغ بالمويه
⬆ الالداستيرون
⬆ الكورتيزول
⬇ الانسولين
⬆ هرمون النمو
⬆ في IGF1
⬆ انتاج الكيتونات
📌ريحه فم سيئه
اضطرابات او ضيق في النفس
📌حكه في الجسم
📌احساس سم روائح الاكل يزيد
دي كلها بتحصل خلال الكيتوزيه

🔴 حقائق عن الكيتوزيه .
📍 بتستمر من بين ٤ اسابيع ل ٦ ل ١١ اسبوع وده الزمن البيتخلق فيهو وحدات عضيات ( مايتوكودرنيا) مستقبله للطاقه الدهنيه سواء من كيتونات او من دهون صحيه بتاكلها وتوصل من مرحله( الكيتوزيه) الى( التكييف الدهني)
📍ماكل الاعراض ثابته بتختلف حدتها من شخص لاخر

معليش نبحت كتير . بس كيف اتعامل معاها؟؟ كيف احل المشاكل دي؟؟!
انا صراحه بتغاظ من الناس البشرعو فيها بدون حكمه وفهم واغلب الناس البتفسرها بتفسرها بصوره عاديه ونظام الشخص البمر فيها شخص ضعيف او منفسن . وبمشوهو بائي كلام. كده غلط ي الاخوه الزملاء الناس تعرف صح وكيف تتعامل شوف👇

نصائح عامه.
📌ما تفرط وتزيد في المويه لانو حتقلل الاملاح المعدنيه.
📌اكل وجبات غنيه بالبوتاسيوم عشان تعادل السوائل
📌اكل وجبات غنيه والمغنيسيوم عشان تعادل استهلاك الطاقه بين الخلايا وتقلل التشنجات العصبيه البتحصل.
📌اكل وجبات غنيه بالزنك والسيلينوم عشان ننظم التوتر والتنشنه

📌 قلل تدريجيا الكربوهيدرات بمنظومه كويسه بمقدار الجرام ونصف الجرام زود البروتين بنفس المنظومه.
📌 زود تدريجيا الدهون الصحيه بس نقطه هامه 👇
( مهم تستهلك دهون دهون ثلاثيه مشتقه زي + زيوت صحيه)
📌 زيت زيتون
📌 زيت جوز هند
📌 زيت البندق
📌 زيت اوفوكادرو

🍏 الدهون الصحيه مخصصه ومهمه جدا وبتسرع الجسم انو يتكيف عليها وينتج الطاقه الكيتوزيه وكل ما اخدت دهون صحيه بكميات اكبر زي ( بيض/ تونه/ ساردين / مكسرات) انت بتوصل اسرع للتكيف الدهني وتطلع من الكيتوزيه بأمان بدون ما تخرب وتخرمج الدايت. 👇

🍏 عشان كذا ما تيأس ولا توقف ولا تخلي الاحباط يجيك اتت في فتره انتقاليه اي انسان بمر بيها وانت الان عارف النقاط الحاصله وكونك اتعلمت وفهمت الحاصل يبق ماف حاجه بتخوف وتقلق ببساطه انت بتغيير من طباغ جينات جسمك عشان يبقي جسمك فيه وحدتين للتعامل مع الطاقه سواء جلوكوز او دهون صحيه.

🍏 ربنا يمتعنا بالصحه والعافيه والسلامه..
اسال اي سؤال يخطر على بالك في الصحه والتغذيه والرياضه. حكون متاح في الثريد ده لمده ٢٤ ساعه.
ريتويت لائي انسان محتاج يستفيد

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد