وسط ما انت بتدور على شخص يتقبل عيوبك قبل مميزاتك، افتكر ان لا العيوب ولا المميزات ثابتين، وانت مش باكيدج مقفولة للأبد، وطبيعى أي مشاكل فالتكيّف والأنجاز والتوازن النفسي أفضل الاختيارات انها تتواجه مش يتم تقبلها، يعنى تتغير، مش تتعامل معاملة اسمك ولا جنسيتك، العيوب مش حقايق مطلقة.

السمات الشخصية ككل مش حقايق مطلقة، وأه الموضوع نسبى، بس اختيار الكبت مش حل وبيعصبني، على اعتبار اني المفروض اشوفك كحبيب او صديق بتعاني من اضطراب نفسى او من تشوه ادراكي او معرفي واتقبّل من غير ما الفت انتباهك، واسيبك تولع، يعني ايه تقبل اساساً ؟! اه صح دي الفكره اللي اتفشخت بالمحن

هو مش المفروض المحبين يتشاركوا ؟ يتفاعلوا ؟ يهتموا ببعض بداية من الماضي لحد المصير
لو وجود شخص بيعرّف عن نفسه انه حبيبك مش قبس من ضياء باهر، يعيد ترتيب الاشياء معاك عن طيب خاطر وخلال رؤى جديدة وتفاعل ديناميكى، لو بيغفل عن شئ لمجرد ان الحياة تعدى واحنا مهرونين، ومتقبلين..

..وسكرانين بكاس التقبل والسكوت، يبقى بلاها.
ومش هحب اتكلم عن وقت الخناق، ووقت ما ماسورة الهرمونات تتسد واللاوعى يطلع كنوزه تعالى ساعتها كلمني عن التقبل اللي على حق بقى