رتبها

كنت مشغل أغنية وبغني معاها ومندمج ببص على ريفا لقتها بصالي ومبسوطة كدا .. الكلبة دي جزء كبير من عقلها حاسس بالمسؤولية ناحيتي ومتخيلة إنها عايشة عشان تهتم بيا وتحميني ومودها بيكون متأثر بحالتي ١٠٠٪ .. أنا بعيش قصة حب بين كلب وإنسان فريدة من نوعها حقيقي ?

الجمال دا شوفته مرة واحدة ?

اللي قدامكم دي كلبة كاسرة العشر سنين عايشة معايا من ٣ سنين بالظبط بس والحقيقة إن روحها واللي خلقته فيها وخرجته منها بيقول إنها بسكوتة عندها ٣ سنين بس وساعات كنت بحس إنها ٦ شهور والله .. هي آمنت بيا ووثقت فيا وصدقتني وحبت الحياة معايا ?

امبارح خدت ريفا وضحكت عليها وقولتلها يلا عشان نخرج فرحت جدا ، ركبتها في عربية هي بتحبها وبتتبسط بيها وفضلت تتنطط وتطلع من الشباك على رجلي ونجحت موصلهاش أي قلق مني أو خوف ، ولحد العيادة فضلت تلعب وقلقت أما وصلنا من الريحة بس اقنعتها إنه زي كل مرة كشف وهنمشي فاتطمنت

لدرجة كنا بنلعب كمان وبندور على القطط لحد ما الدكتور جه بالحقنة قلقت بس ادهالها بالراحة ونزلنا نلعب لعبة التدوير على القطط بما إنها عيادة ، سيبتها عشان تهدى وحطيتها على رجلي ونايمة في حضني كدا وكان المهدأ اشتغل

في اللحظة دي كنت بطبطب عليها وأكلمها بحب وأقولها انها حلوة ردت عليا وقالتلي بحب .. طلعت لسانها عشان تلحسني عشان دا تعبيرها اللي بتقول بيه بحبك .. هنا الدكتور طلعني خلاص وهيجهزها ويعملها العملية ، بعد ساعة تقريبا الدكتور فتح الباب عليها وانا دخلت وراه

طبطب عليها كدا ومشي خرج من الاوضة ، انا دخلت بصيت لعينها وفرحت فشخ إنها فاقت اهي وشجعتها يلا ياريفا قومي بقى وسيبتها وخرجت ورا الدكتور أقوله ها يادكتور هنعمل ايه بقى أنا جبتلك المضاد حيوي اهو

دخلت على ريفا صاحبتي كانت ورايا ، وأنا الدكتور شاورلي ولقيته بيقولي أصعب كلمة سمعتها في حياتي لانهاردة .. كانت ملامحه بتقول إن أنا صعبان عليه إني مفهمتش ومخدتش بالي اما شوفتها .. الكلبة ماتت
نفس اللحظة كانت صاحبتي جاية تقولي عبد الله ريفا ماتت

ريفا ماتت وسابتني ومبقتش موجودة تاني
أنا دفنت روحي وأنا بقولها مع السلامة ياريفا وصاحبي بيدفنها معايا ، أنا مش قادر أصدق ولسة بتخيل إني أكيد لو روحت المكان اللي دفنتها فيه وناديت عليها هتفوق زي ماحاولت أعمل في العيادة وفشلت

دايما كان عندي يقين إن ريفا أنا معيشها بروحي أنا ، مفيش حاجة في الدنيا تقدر عليكي ولا تاخدك مني طول ما أنا موجود .. بس دي كانت صعبة عليا ياريفا تسمعي كلامي فيها وتخليكي أنا عاذرك حبيبتي انتي مكنتيش هنا عشان تسمعيلي ، أحلى حاجة في حياتي اتاخدت مني وأنا مقدرتش أعمل أي حاجة

خايف أروح البيت ، ريفا موجودة في كل حتة ، عشان أشيل الحاجات اللي بتفكرني بيها من حياتي هروح انتحر أسهل، ريفا في كل مكان حواليا حتى اللي مجتش فيه ، أنا مش قادر أتكلم ولا أوصف حاجة بس من دقيقة الهوا حرك كيس لقيتني بقولها تعالي ياريفا بس زي كل مرة مطلعتش هيا .. أنا مش قادر ياريفا لا

أنا مش ضعيف خالص لا أنا دفنت ستي اللي مربياني واتنين صحابي عشرة عمر ولو فضلت أعد المواقف اللي انهار فيها كل اللي حواليا وأنا كنت قوي هنتكلم لسنة قدام ، بس المرة دي صعبة وأصعب من ماكنت متخيل بمراحل ، زي ما أكون اتسحبت روحي مني بس أنا لسة حي ومطلوب مني أعيش من غير روح كدا عادي!!

كنت زعلان إنك مش هتعيشي معايا غير كام سنة كمان وكل ما أفكر أترعب ومكنتش مستنيها دلوقتي خالص ، كنت بقول لسة هعملك كتير وأعوضك عن كل حاجة وحشة شوفتيها وتحبي الحياة بسببي أكتر وأكتر ، جت بدري اوي ياريفا أقرب من ماكنت متخيل ياحبيبتي

لأول مرة مابنكون سوا ..