محمد خان كان عنده نظرية في الأكل ليه علاقة شوية بمقولة سقراط"تكلم كي اراك" ..هو بقي كان يقولك هاعرفك من طريقة أكلك علشان كده معظم افلامه ابطاله لازم يأكلوا،،بيكمل تفاصيل الشخصية بطريقة الأكل
في "ضربة شمس" الشاب جرئ و مغامر و كاسر التقاليد حتي في علاقاته بالتالي علاقته بالأكل مش تقليدي ، ساندويتشات بيأكلها و هو ماشي مش مهتم بالكواليتي و لا الكم مهتم بالسرعة و أنها رتم الأكل يبقي زي رتم حياته
موعد علي العشاء ..عزت(حسين فهمي) راجل بارد في مشاعره و بالتالي طريقة الاكل عنده هادية بنفس الايقاع الواقع بنفس التفاصيل راجل روتيني في كل حاجة و كان طبيعي ان مشهد العشاء يبقي اياقاعه بطئ دليل علي ان الروتين بقي في كل حاجة
الحريف ..فارس ابن بلد و راجل شعبي بيحب الاكل زيه زي اي متعة(الجنس مثلا مع جارته) الاتنين في مرتبة واحدة علشان كده لما بيروح للكبابجي بيطلب ميه سلطة و تحابيش و بيأكل مش بسرعة لكن مش هدوء و كأن دي اخر مرة هيشوف فيها الكباب،لكن كرامته تخليه يرمي الاكل لما يتخانق مع طليقته
خرج و لم يعد ..د ه فيلم علي الفطرة .. النهم علي اصوله ..ناس مش بتفكر لا في بكرة و لا في بعده ، مالهمش علاقة باللي بيحصل بره حدود بيتهم و بالتالي ابن المدينة(الفخراني) بيتصدم بايقاعهم المتسارع في الاكل و كأن الاكل هنا دليل علي اللامبالاة و عدم التماس بمشاكل العالم
خرج و لم يعد تاني :-) عايدة عبد العزيز بتطبق نظرية اسهل طريق لقلب الراجل معدته و ليلي علوي واخدة نفس السكة .. و فريد شوقي متعايش مع ان الحياة اقصر من انه يضيعها في هري و مركز في الاكل .. الفيلم ده تحديدا اكبر نموذج علي رؤية خان للأكل و تعريف الشخصية من خلاله
زوجة رجل مهم ...الاكل هنا ماشي مع البدلة الظباطي .. حاجات من الجمعية باسعار رخيصة للبيه الظابط..مطاعم كتير ،بس في مشهد البار هتلاقي احمد زكي/هشام بيتعامل مع الاكل بتعالي و كأن ذاته مش محتاجه تأكل زينا لأنه من جوه حاسس انه مهم و غير باقي الناس
عودة مواطن هو مرثية لتقاليد الاكل المصري..الاخ بيرجع بعد غياب من السفر بيلاقي كل حاجة اتغيرت ..حتي طريقة رص الاطباق علي السفرة و تقديم الاكل عليها ..الغربة هنا مش بس ان اخواته اتغيروا لا حتي الاكل نفسه اتغير ..غربة بنت تيت بتاعت الاكل دي
أحلام هند و كاميليا .. عيد علشان حلنجي متعة الاكل عنده سرقة ...و زي دماغه بلدي جدا لما يشوف بنت حلوة يقول قشطة بالعسل، و اقباله علي الاكل مرتبط بنهمه للحياة اللي عايز يعيشها .. مفيش اكل كتير بس تفاصيل بتقولك عيد ده هيوصل لفين في الاخر
مشوار عمر .. عندنا اتنين عمر واحد غني (الفيشاوي) و التاني فقير(ممدوح عبد العليم) تعبيرا عن حالة فقر عمز التاني لما بيجي الاكل و عمر و نجاح(مديحةكامل) مش بياكلوا بيقعد لوحده يقوم بالليلة لأنه أكل مش هيشوفه تاني ..بيأكل بشغف مش بفجعة..بنهم مش بطفاسة و ده يوضح طيبة قلبه
جاري تحميل الاقتراحات...