اختي عندها عقدة اسمها النظافة وجت سالفة كورونا ولقتها فرصة تفرغ عقدتها فينا ،، اول الأزمة عطيناها وجه وأمي مبسوطة مرة من النظافة والتعقيم وكلنا ساكتين عشان أمي ،، سوت علينا دورات تعليمية وتوعوية عشان نتثقف وهي جزاها الله خير متابعة أول بأول بس حومت كبودنا ،، ترى مش تعقيم مثلكم
لالا ،، تعقيم وسوسة ،، لين جاء قبل أمس أمي حامت كبدها وفي قرار مفاجىء لنا جميعاً أمرت بسحب كافة صلاحيات التعقيم منها ،، بعدين عرفنا السبب أن أمي استطعمت في المكسرات ريحة معقم عاد كل شي عند الوالدة الا قهوة المغرب والمكسرات ،، يوم سألناها قالت بكل برود ايه راشة عليه معقم ،،
الوالدة في هذي اللحظة حست أن بنتنا فقدت السيطرة على وسوستها وبدل ماتحارب الفيروسات صارت تحاربنا وتبي تقضي علينا ،، فأمرت بقرارها التاريخي والجريء على حد سواء ،، أنا وأبوي وأخواني أظهرنا فرحتنا واحتفلنا قدام اختي وهذا ماسبب لها نوبة غضب عارمة وقرارات انتقامية لم تكن متوقعة ،،
بحكم علاقتها الوثيقة جداً مع الشغالة وسيطرتها الكاملة على وجدانها طلبت منها الاضراب عن العمل،،طبعاً الشغالة كلنا عارفين انها لعبة في يد اختي ومسيطرة على عقلها بشكل يفوق التصورات ،، (أمي قد قالت زمان تأكدوا لايكون عندهم دين يعبدون الأوادم شكلها تعبد أختكم هههه) الشغالة ضفت أغراضها
وطلعت لغرفتها والسبب ان البيت أصبح موبوء وماتقدر تشتغل في بيئة مثل هذي ونظام العمل والعمال بناء على العقد المبرم بينها وبين أبوي يحق لها تشتكي للسفارة وحقوق الإنسان (كل هذي الشروط والأحكام محفظتها إياها أختي والا الشغالة والله ماتدري وين الله حاطها) ،، حاولت أخترق صفوف هذا الحلف
جلست مع الشغالة وريتها صور لي في الفلبين وأمي جلست تمدح في مانيلا يوم سافرت لها وبالفعل استملنا قلبها وبدت ترتخي لكن دخلت اختي عند الباب ونادتها وفي أقل من دقيقة ونص رجعت لنا الشغالة بوجه آخر وفرضت علينا شروط أولها إعادة الصلاحيات لأختي ،، رفض الوالد بشدة العودة لنفس الكابوس
وقالها فارقي انتي وياها كل وحدة لغرفتها ،، العيال فاضين خل يساعدون في التنظيف والطبخ مالحد منه الله اللي عزنا ،، جبنا شغالة ثانية اليوم عشان التنظيف،، والطبخ صار مهمة مشتركة بين كافة الأطراف المشاركة في حلف الوباء ،، حالياً الحلف الآخر اللي هم حلف التعقيم كل وحدة بغرفتها عزل ذاتي
اختي تحاول تخترق حلفنا من خلال محادثاتها المستمرة معي في الواتساب تقول المفروض انت المثقف العاقل تفهمهم سبل الوقاية وخطر الفيروس على كبار السن ،، قلت لها انتي موسوسة وخطر وسوستك أكبر من خطر الفيروس أحد يعقم مكسرات؟؟ ارسلتلي هذا الفديو هههه وللأمانة استمالت قلبي به
رحمتها حسيتها خايفة علينا بس ماتعرف تعبر ،، المهم يوم شافتني بتويتر منزل صورة العشاء ماقدرت تمسك اعصابها وارسلتلي بيان شجب واستنكار وسب وتسفيل ،، فشلت محاولتها لاختراق الحلف ،، في جانب آخر من المشهد ساورتنا شكوك شديدة أن حلفنا مخترق من جهة الوالدة والسبب سكوتها واعجابها بسالفة
الاضراب ،، حسينا انها مبسوطة بشوفتنا نطبخ وننظف انا واخواني الصغار ،، توقعنا منها تمارس ضغوط سيادية على حلف التعقيم بس للاسف مااتخذت أي موقف رفم مرور 48 ساعة ،، أخوي الصغير عمره 15 نبهني على هذا الأمر وهو اللي خلاني أفتح الموضوع مع الوالد لكن للأسف الوالد مشخصنها مع الشغالة ماهمه
الا ليش تهددني بالسفارة؟؟ انا تهددني ذي بالسفارة؟؟ يبن الحلال روق كلنا عارفين ان بنتك هي اللي معبيه راسها،، يرجع يقول انا تهددني بالسفارة؟؟ لحووول ،، الزبدة الشخصنة ذي هي اللي خلته يتخذ قرار استئجار شغالة ثانية من هنا لبعد رمضان من باب اثبات التمسك بالرأي والحفاظ على صلابة الحلف
الشغالة بحكم انها كبيرة بالسن وعندها أحفاد كبري وهي اللي مربية نص العايلة بما فيهم اختي لذلك هي واثقة من مكانتها في البيت ولاهمها هذي التحركات المباغته من حلف الوباء ،، ومن باب النكاية في الوالد مطولة على صوت المكالمات المرئية مع عيالها بالفلبين نسمع ضحكاتها وحنا بالصالة تحت
لنا يومين نعيش أجواء حرب باردة بين حلفين أحدهما مخترق والآخر يملك أوراق ضغط تزداد قوة يوماً بعد يوم ،، لابوادر للصلح ،، أحاول أتغاضى عن السلبيات وأركز في الايجابيات ،، تعلمت أذوب الشيدر ،، سويت بطاطس مهروس مثل ماابغى ،، رممت علاقتي مع اخواني بسبب غياب اختي واحس بدينا نتقارب اكثر
جاري تحميل الاقتراحات...