مساء الخير .. بعد تطور الأوضاع والمعطيات وللأمانة وإن ناس بتثق فيا وتتبع كلامي بتراجع عن بعض اللي قولته في الثريد دا
مبدأيا أحب أوضح حاجة .. ريفا كلبتي لو قالولي إن وجودها معايا هيموتني كمان خمس دقائق ف أنا هحضنها الخمس دقائق دول .. مفيش مبرر واحد يخليك تتخلى عن روح انت مسؤول عنها
انهاردة تقريبا في هونج كونج لقوا حالة اتصابت بسبب نقل الكلب للفيروس والكلب في الحجر .. مفيش أي خطر عليه بس هنتعامل مع حيواناتنا الأليفة نفس معاملة أي حاجة ناقلة للفيروس ولازم نحميهم خوفا من انتقال الفيروس لينا عن طريقهم ، ايوا نعمل ايه؟
١- نزول الشارع نمنعه نهائيا عشان الشوارع مليانة بالفيروس(ولسة الخطورة والانتشار هيزيد) والكلاب هتصاب بيه لإنها بتمشي تشمشم وتدوس فوارد يتنقلهم الفيروس وينقلوه للمخالطين ليهم .. اللي حاببني أساعده بطرق تفريغ طاقة للكلاب وهي في البيت يسألني مش هتأخر
لو خلاص مش عارف تستحمل الكلب بسبب طاقته ومزاجه السيء الناتج عن الحبس وعايز تنزله ف نزله في وقت شمس عشان أول ماترجع البيت ادخل انت وهو الحمام خدوا دش عشان متنقلوش الفيروس للي في البيت ، خلي راسه مرفوعه عن الأرض ومتسمحش لحد يلمسه ولا يختلط بكلاب خصوصا اللي في الشارع
بخصوص الكلاب اللي بتنزل الشارع للتواليت حاول تخلي راسه مرفوعة عن الأرض دايما وعقم ايده ورجله بالكحول أول ماتطلع ويبقى حلو لو حددت مكان نزول معين في الشارع وعقمته أول بأول (كلور ومنظفات وكدا)
٢- لما ترجع البيت غير هدومك وعقم نفسك قبل ماتتعامل مع الكلب والإجراء دا يعمله كل اللي بيتعاملوا معاه لإن الكلاب بتستقبل بالنط والشم واللحس فممكن يتنقله وينقلهولك بعد كدا رغم إنك طهرت نفسك كويس ، وصي حد يحبس الكلب او يمسكه دقيقتين لحد ما تبقى جاهز تتعامل معاه .
٣- اللي بينزل يأكل كلاب بلدي وقطط ويهتم بيهم حاول تقلل اللمس لإنك وارد بعد ماتلمسهم تلمس وشك بالغلط قبل ما تعقم ايدك ، اغسل ايدك كويس بعد التعامل معاهم وغير هدومك .
باختصار .. امنع النزول أو خليه للضرورة القصوى ولما يحصل تاخد كل الإجراءات اللازمة ، امنعه يتعامل مع أي حد غريب بدون ما تتأكد إنه متعقم كويس أو امنع حد يزورك في بيتك خالص أحسن ?، عقم نفسك وغير هدومك قبل ماتتعامل معاه، الكلاب مبتتأثرش بالفيروس لكن ممكن تنقله فخلي بالك وحافظ عليه
أي تطور هبلغكم بيه أول بأول ، بتمنى الأزمة دي تعدي على خير وبسرعة لإن الوضع مقلق وسخيف وكلنا هنخرج منه خسرانين على كل الجهات للأسف ، انتهى .
نقطة منفصلة عن موضوع الثريد .. طب ياعبد الله الكلاب هتقعد في البيت هتقرفنا عضعضة وتقطيع عفش بسبب طاقتهم واحنا مستحملينهم بالعافية أساسا واحنا بننزلهم كل يوم ساعة ، نعمل ايه؟
مبدأيا انت لازم تستحمل وهي فترة وهتعدي لإن كل اللي هقوله ماهو إلا محاولة لتخفيف الوضع مش أكتر ، هتستحمل شوية رزالة ولا تنزل انت وهو وتتعدوا ولا ترميه زي الأوساخ مابيعملوا؟
لعبة شد الحبل جميلة والكلاب بتحبها وبتفرغ طاقتهم بشكل كبير ، كل ماتلاقي كلبك مهيبر العبها معاه ، من خلال تجربتي وتعاملي مع الكلاب شايف إن ٥ دقايق لعب اللعبة دي بيعادلوا نص ساعة تمشية مثلا ، خلي عندك نوعين تلاتة وقضوها لعب
هات كورة ولعب ينفع تحدفها للكلب ويرجعلك بيها وجنبك علبة تريتس تديله منها عشان يحب يروح يجيبها ويرجعلك بيها ، كل ماتلاقيه زهقان وبيعمل سلوكيات تضايقك لازم تفهم إنها طاقة زايدة مش قلة أدب فقوم خرجهاله
هات عظم صناعي وممكن من عند الجزار "هتديهاله نية طبعا اخرك هتغسلها كويس" ، هو عنده طاقة اديله عظمة وشوف التطبيق الحي لمثل: كلب وماصدق لقى عظمة ?
في كورة بتتجاب من المحلات تحط فيها تريتس وفيها فتحة صغيرة الكلب يتسحل فيها ويحركها تنزله تريتس وممكن تستبدلها بازازة بلاستيك سميكة شوية حط فيها تريتس واعمله فتحة هتأدي نفس الغرض ولما يبوظها اعمل غيرها وخد بالك عشان الكلاب بتحب تاكل البلاستيك ?
في ألعاب ذكاء كتير ممكن تجيبها من المحل ، استغل قعدتك في البيت إنك تعلمه حاجات جديدة وتتعلم انت كمان واليوتيوب مليان آلاف الفيديوهات المفيدة ، بلاش عصبية وزعيق دول مش حل لأي حاجة ، أخيرا قلل كمية الأكل شوية لإن أكل يعني طاقة وهو مبينزلش ومش محتاج لكمية الطاقة دي كلها .
جاري تحميل الاقتراحات...