بما انه كورونا بيقرب ولحد دلوقتي مفيش أي دواء او مصل محدد فا مفيش في ايدينا أهم ولا أضمن من المناعة الجيدة لمواجهته، دي شوية نصائح سريعة وخفيفة لتقوية المناعة واللي حابب يضيف أو يعدّل أهلًا وسهلًا:
١- نام كويس. ببساطة سيب التليفون من إيدك وطفي الأنوار وخلي جسمك في السرير بوضع مريح واسمع موسيقى هادية واتنفس بعمق ونام - نوم من ٧ ل ٩ ساعات متواصلة يوميًا في غرفة تهويتها جيدة وحرارتها مناسبة وبدون إضاءة أو أصوات مزعجة يساوي صحة أفضل وجهاز مناعة أفضل.
٢- خليك نضيف. ببساطة برده إغسل إيدك بالطريقة الصحيحة قبل ما تاكل، قبل ما تلمس وشك، وبعد أي نشاط استخدمت فيه ايدك في تلامس مع أي شىء حواليك. أه واستحمى كل يوم وقص ضوافرك باستمرار معلش الحجات دي مهمة وهتجنبك جزء لا بأس به من العدوى بالڤيروسات والبكتيريا.
٣- اتحرك. اعمل أي رياضة ممكنة كل يوم مش لازم جيم. إمشي، إجري، إعمل تمارين بسيطة في البيت (زي اللي في الصور). مهم جدًا من ٣٠ ل ٦٠ دقيقة يوميًا رياضة بسيطة هتحسّن الدورة الدموية في جسمك وبالتالي كل الوظائف الحيوية هتكون أفضل بما فيهم المناعة.
٤- امنع التدخين. امنع السكر الأبيض والحلويات والمشروبات الغازية والعصائر الجاهزة. امنع مخبوزات الدقيق الأبيض. قلل الأكل المصنّع بكل أنواعه. فيه عدد لا يحصى من الدراسات اللي أثبتت قد ايه الحجات دي كلها بتأذي الجسم عمومًا والجهاز المناعي تحديدًا وبتضعف قدرته على مقاومة الأمراض.
٥- تخلص من التوتر والضغط العصبي بأي شكل. الstress قاتل وطول ما انت متوتر مناعتك أضعف بشكل كبير وجسمك مهيىء أكتر للمرض بسبب الهرمونات اللي بيتم إفرازها وانت متوتر واللي بتأثر بشكل سلبي جدًا على العمليات المهمة في الجسم وعلى عمل الجهاز المناعي بشكل خاص.
٦- ريّح جهازك الهضمي. قبل ما تسأل تاكل وتشرب ايه يفيد مناعتك لازم معدتك وأمعائك يبقوا بخير. علشان تستفيد من أكلك بهضم وامتصاص كويس وعلشان مترهقش جسمك ببكتيريا ضارة وسموم في وقت انت محتاج كل الجهود تكون مسخّرة لخدمة الجهاز المناعي. اغسل أكلك كويس ومتاكلش أي فاست زبالة من بره.
٧- أكل طبيعي. فاكهة وخضار وحبوب كاملة غير مطبوخة قدر الامكان زي؟ الحمضيات (برتقال وليمون) والفلفل الألوان والتوت والكريز والكيوي لڤيتامين C. اللوز وبذور عباد الشمس والأفوكادو والسبانخ والبروكلي (الورقيات عمومًا) والجزر والبطاطا الحلوة والثوم لفيتامين E وA وفيتامينات ومعادن كتير.
الدارك شوكليت والموز والأسماك والمحار واللحوم الحمراء والفاصوليا بأنواعها والبازلاء والطماطم والرمان وغيرهم للماغنسيوم والبوتاسيوم والزنك.البيض والزبدة الطبيعية وتعريض الجسم للشمس الخفيفة يوميًا لمدة ١٥-٢٠ دقيقة (مهم جدًا) لفيتامين D اللي بيدخل في عمليات كتير مهمة بتخدم المناعة.
طبعًا معظم الڤيتامينات والمعادن مفيدة للعمليات الحيوية في الجسم بشكل عام أنا ركزت على دول تحديدًا علشان ناس كتير عندها نقص فيهم او بيهملوا العناصر دي في نظامهم الغذائي فا اللي حابب يضيف يتفضل، المهم في النهاية الأكل يكون طبيعي ومتوازن ومن مصادر متنوعة.
٨- ركز ع السوائل. حافظ دايمًا على شرب كمية كافية من المياه يوميًا ١.٥ لـ ٢ لتر أو حسب احتياجات جسمك. المشروبات العشبية ومضادات الأكسدة. الزنجبيل، الكركم، الكاموميل، الشاي الأخضر، وطبعًا عسل النحل الطبيعي (معلقة واحدة يوميًا تكفي) والمعتاد مع أي دور أنفلونزا شوربة الدجاج الصحية.
٩- #خليك_بالبيت. ابعد اليومين دول عن التجمعات المزدحمة الغير ضرورية، مع بدايات أي أعراض أنفلونزا أو برد معتادة (صداع، حرارة، كحة، رشح .. إلخ) ارتاح في البيت يومين الدنيا مش هاتطير. وفّر جهدك وساعد جهازك المناعي يقاوم ماتشتغلش ضده لأن الإجهاد مضرّ جدًا.
soundcloud.com
soundcloud.com
١٠- النظافة الشخصية ثم النظافة الشخصية. استخدم أدواتك الخاصة مش أدوات أي حد وبلاش تلامس غير ضروري، بلاش تلامس أصلًا، فوطك، فرشاة شعرك، فرشاة أسنانك، صابونك وأدوات حلاقتك، مناديلك، كمامتك. بلاش اشتراكية في أدوات النظافة وبلاش تبقى اجتماعي في أي حاجة فيها تلامس.
أنا خلصت وياريت الأطباء والمتخصصين هنا يضيفوا أو يعدّلوا في المكتوب لو فيه حاجة مش مظبوطة، اللي قولته كله هو أشياء بسيطة جدًا وبديهية بس ضروري نركز عليها أكتر ونفكر اللي حوالينا بيها اليومين دول.
جاري تحميل الاقتراحات...