راح اكتب ثريد عن فكرة نظام #الصيام_المتقطع وتجربتي معاه ، يمكن احد يستفيد ويحب يشوف تجارب الناس ع هالنظام الجبّار ويتحمس ؟ ?:
بالبدايه أي شخص حاب يبدأ فيه لازم يفهم ويقتنع إن #الصيام_المتقطع مو ريجيم،هو إسلوب حياه اكثر من انه ريجيم،طيب كيف اسلوب حياه؟ يعني ينظم وقت اكلك ووقت توقفك عن الاكل و ع هالاساس انت راح تقدر تحرق دهون وتتخلص من السوائل الزايده بالجسم ..??
الشيء الثاني والجميل ان هالنظام اي شخص يقدر يسويه،سواءً كانت عندك زياده بالوزن او تحب تحافظ ع وزنك او تزيد من صحتك وخفتك وراحتك ولقياتك او ع حسب قدرتك ع ساعات الصيام،وهدفك يحدد إنت مفروض كيف تطبقه وأي طريقه من طرق الصيام ودك تمشي عليها،طيب ايش هي طرق الصيام المتقطع؟
عندنا 3 طرق،الأولى إنك تصوم 16 ساعه وتاكل في 8 ساعات فقط وهالطريقه تنفع كثير للي عندهم زياده بالدهون،الطريقه الثانيه هي إنك تصوم 14 ساعه وتفطر 10 ساعات،والثالثه تصوم 12 ساعه وتفطر 12 ساعه،غالباً الطريقه الاولى هي اللي معظم الناس تمشي عليها ولاقوا فيها نتايج جباره بجد وانا منهم
قوة الصيام المتقطع اختصرها في إنك لو آخر وجبه لك أكلتها مثلاً الساعه 8 المساء و مرت 8 ساعات او 10 ساعات من آخر وجبه ، يعني تقريبا في ساعات الصباح الاولى راح يبدأ جسمك يدور عن أكل يستقوي منه،يقوم الجسم يدور في المخزون راح يلاقيه فاضي لأن آخر وجبه كانت من مده طويله ...
ف ماراح يلاقي غير مخزون الدهون ياخذ منه طاقه عشان يخليك تقدر تأدي نشاطاتك ?? وغالباً هذا الوقت هو أفضل وقت عشان تمارس فيه الرياضه وتحديداً "رياضة الكارديو" أبسطها وأحسنها مشي سريع لمدة 30او45 دقيقه ك حد أقصى، بهالوقت جسمك بيحتاج طاقه عاليه جداً ومابيكون قدامه غير الدهون المخزنه
وهااااتك حررررق ???،هذا غير السوائل الزايده اللي بتخرج من جسمك وبتبدا تحس بالخفه والراحه والنشاط ??،وبالنسبه لتمارين الحديد او المقاومه اكيد افضل انك تسويها بساعات الاكل عشان العضل وقتها يكون مرتاح ومستقوي بسبب الوجبه اللي اكلتها،لكن خلال ساعات الصيام افضل لجسمك الكارديو فقط
طيب ايش ممكن نشرب بساعات الصيام؟ اول شيء وعشان يكون ابسط عليك دخل ساعات نومك بساعات الصيام،مثلا نمت 6 او 7 ساعات راح يبقى لك تقريبا 10 ساعات تقضيها وإنت صايم،وبما انه صيام ف اكيد ممنوع الاكل،والشرب راح يكون محدود ع اشياء قليله وبسيطه جداً وأهمها "الماء" بدون إضافة ولا شيء عليه
البعض يقولوا ممكن يشربوا قهوه سودا ساااده بدون سكر ولا حليب حتى لو كان منزوع الدسم،وبعضهم يقولوا شرب الشاي الاخضر ماراح يضر وأساساً مافيه سعرات حراريه وسكريات،لكن لا ننسى إن فيهم كافيين وخاصه القهوه فيها اكثر من الشاي ?? ف تقريباً راح تأثر حتى لو شوي ...
ضروري مانشرب شيء فيه سكر لأن الهدف من الصيام هو إن الانسولين في الجسم ينخفض تماماً ويبدأ يفتح باب للجسم إنه ياخذ طاقه من الدهون المخزنه ?? "يعني بالمختصر إحنا بلوتنا كلها بالانسولين" ??♀️? عموماً يضل افضل مشروب وأضمنهم هو "الماء"،لتر ونص او لترين قسمها خلال يومك بتنفعك كثير ??..
النتايج اللي لقيتها حرفياً خرافيه،كنت اصوم من الساعه 8 المساء وأبدأ آكل الساعه 12 الظهر،يمكن البعض يشوفها طويله بس كان النوم بالليل يساعدني اتجاوز الوقت ???،اصحى الصباح اجهز مويتي لتر ونص او لترين ع حسب قدرتي يومتها و ع الساعه 8ونص او اي وقت مناسب اعمل رياضه ...
كنت اعمل مشي نص ساعه وكم دقيقه نط الحبل ع حسب قدرتي ??،الحلو ان العضل مايترهل وهالنظام يحافظ ع الكتله العضليه بجد ?? نجي للاكل جداً راح يكون حلو لو أكلت شيء نظيف وبعيداً عن الدهون العاليه والسكريات الزايده،بكذا راح تضرب عصفورين بحجر اكل نظيف وخفيف ومافيه سعرات عاليه وحرق دهون?
في ناس تصوم ساعات طويله وتحرق خلالها سعرات بس بعدين ياكلوا اشياء دسمه وسكريات عاليه ويقولوا اهم شيء اننا صمنا ساعات طويله ، طيب ايش استفدت انت؟ خاصه وإنك تبغى تخسر وزن وتصير صاحب جسم صحي ومرتاح قبل مايكون جميل ومتناسق،وزي ماقلت الصيام اسلوب حياه تعود نفسك فيه ع الحياه الصحيه ..
وطبعاً زي اي نظام غذائي متوازن نقدر ناكل اي شيء بس بكميات محدوده ويكون مطبوخ بطريقه صحيه او مقاربه للصحيه،اكل مشوي او مسلوق متبهر تمام ومملح بشكل كويس،استبدل الزيوت الغير صحيه بزيت الزيتون والسكر الابيض استبدله بسكر صحي زي سكر ستيفيانا او اي نوع متوفر ويمدحونه الناس
+ خضروات وخبز أسمر ويفضل يكون "خبز النخاله" وكمية رز مناسبه 150 غرام مع سلطه ومصدر بروتين بتكون وجبه حلوه جداً وكافيه للجسم ?? وما يمنع ناخذ قطعة حلا صُغننه وقهوه بسكر صحي او مكسرات وشاي ونروق ???
واكيد لابد من وجود يوم ناكل فيه وجبه مفتوحه وندلع نفسنا شوي ? ماراح يضر بالعكس كمان بيساعد ?? "وجبه وحده ويفضل تكون الغدا ?" وطبعاً ننام ع معده خفيفه بسبات ونبات .. ?? .. وغالباً آخر وجبه تكون جداً خفيفه وبعضهم ولقصر مدة ساعات الاكل يكتفون بوجبتين رئيسيتين ووجبه "سناك"
آخر شيء والجميل بهالنظام إن بالويكند او اي يوم تكون في مناسبه تقدر تغير في ساعات الصيام ع حسب يومك،لو غالبا تصوم من الساعه 8 المساء وبالويكند مع الجمعات والطلعات ماقدرت تصوم من بدري زي العاده تقدر تأجلها لأي ساعه ثانيه مناسبه لك تبدأ فيها الصيام وتحسب 16 ساعه من آخر وجبه وهكذا
خلصت .. ويارب في اشخاص يستفيدوا من اللي كتبته وشاركته بكُل حب . ♥️
جاري تحميل الاقتراحات...