رتبها

تعرف إيه عن الإكتئاب ... ؟
شوف الـ Thread ..
——
إعداد : @lolotaalab

- كلنا بتعدي علينا ايام بنبقى زعلانين فيها ، ايام بتبقى مش كويسة و بنحس فيها اننا مش عايزين ومش عارفين نعمل حاجه ، بس لو الايام دي استمرت وقلبت لاسابيع وشهور ده معناه انه ممكن يبقى عندنا اكتئاب

- طب ايه هو الإكتئاب ؟
----
الاكتئاب بيبقى عبارة عن شعور دائم بالحزن وفقدان للمتعة في حاجات كنا بنستمتع و بنفرح لما بنعملها زمان ، اللي بيبقى عنده اكتئاب بيحس بأنه فقد اهتمامه في كل حاجه في الحياة خاصة احلامه اللي نفسه يحققها

- مش شرط ان الشخص ده يبقى قاعد طول اليوم في سريره ، ممكن يبقى بيروح المدرسة او الجامعه او الشغل عادي ، بس مجرد ما بتجيله الفرصة و الوقت الفاضي بدل ما يعمل حاجه بيحبها ما بيعملش حاجه وبيقعد في سريره

- الاكتئاب بيخلي الواحد يحس انه مذنب او بلا قيمه او ممكن ينتج من انه الانسان بيحس انه بدون قيمه او مذنب ، الاكتئاب كمان من أعراضه الشعور بالتعب وفقدان الطاقة الدائم و عدم القدرة علي التركيز و انجاز المهام اللي زمان كنا بننجزها في وقت اسرع وبطريقة احسن

- الاكتئاب بيعيق قدرتنا على اتخاذ القرارات والحكم الجيد في الامور ، بس من اهم واخطر اعراض الاكتئاب هو [ الافكاااااااار الانتحااااااارية ] اللي ممكن توصل فعلاً لأذية النفس او محاولة الانتحار

- الاكتئاب حقيقي و علمي و مش بس بيبقى في عقول المصابين بيه ، الاكتئاب احيانا ممكن يبقى وراه سبب عضوي او بسبب دواء الشخص بياخده ، وفي اغلب الاحيان الاكتئاب بيبقى بسبب احداث حصلت في حياة الشخص او تراكمات وضغوط نفسية

- الاكتئاب ممكن ينتج عن فقدان شخص مقرب أو بعد حالات الإنفصال ، خسارة العمل او عدم ايجاد فرص عمل او اذا كان الشخص ضحية اعتداء وغيره كتير من الاحداث اللي ممكن تحصل في حياة اي شخص تخليه مكتئب ..

- الاكتئاب ممكن يكون بسبب خلل في الهرمونات ، و ده بيحصل نتيجة تغيرات في مستويات الناقلات العصبية للمسؤولة في الدماغ عن السعادة زي [ السيروتونين والادرينالين ] واحيانا كمان بيبقى بسبب جيني يعني متوارث في العائلات .. بيكون في عائلات مكتئبة بطبعها

- دي أهم اعراض الاكتئاب و بيصاحبها اعراض تانية زي تغيرات في الشهيه سواء زيادة لدرجة السمنه او نقصان لدرجة خسارة وزن بشكل كبير
- الاكتئاب كمان يا اما بيخلي الواحد ينام كتير اكتر من المعتاد بتاعه او بيخليه يصاب بالارق ومش بيبقى عارف ينام

- الاكتئاب ممكن يؤدي لامراض عضوية لو اتساب بدون علاج و ممكن يؤدي بالشخص الى الادمان او الانتحار

- ايه الفرق بين الإكتئاب و الحزن العادي ؟
---
- الحزن إنك تزعل زعلك الطبيعي علي حاجة حصلت و تاخد وقتها و تمشي ، ممكن حاجة تحصلك في فترة الحزن تفرحك
- الاكتئاب ان الحزن ده يطول اكتر من فترته الطبيعية ، و إنك متفرحش مهما عملت حاجات تفرحك

- أنواع الإكتئاب :
--
- الاكتئاب الحاد او الشديد
- اضطراب الاكتئاب المستمر
-الاكتئاب الناتج عن اضطرابات عاطفية موسمية
- الاكتئاب الذهاني و الفصام
- اكتئاب ما بعد الولادة
- اكتئاب المواقف

١- الاكتئاب الحاد : هو لما شخص يبقى عنده ٥ أعراض او اكتر من الأعراض اللي قولناها فوق لمدة اسبوعين و اكتر بشكل متواصل طول المدة

٢- الاكتئاب المستمر : و ده بيكون لما اغلب الأعراض اللي فوق دي تستمر لمدة طويلة متوسط المدة دي هو سنتين و أكتر

٣- الاكتئاب العاطفي الموسمي : بيبقى ناتج عن اكتئاب في فترة الشتاء بسبب قصر ساعات النهار و قلة الطاقة والنشاط

٤- الاكتئاب الذهاني او الفصام : بيكون لما شخص عنده اكتئاب حاد او شديد مع اعراض اخرى زي الهلاوس والاوهام والشكوك فيمن حوله ، و أحيانا بيحصل خلاله عدم القدرة علي الكلام

٥- اكتئاب ما بعد الولادة : هو اكتئاب بتعاني منه الامهات بعد الولادة ناتج عن تغيرات الهرمونات وقلة النوم و التعب

٦- اكتئاب المواقف : و ده بينتج عن لما موقف في حياة الشخص بيؤدي الى حزنه المستمر زي ما قلنا وفاة شخص او خسارة عمل او حتى الطلاق

- عشان تعرف انت عندك اكتئاب ولا لا اكيد زور دكتور نفسي او اطلب المساعدة من حد في مدرستك او جامعتك او حد من اهلك او صحابك
- دور على حد يدعمك وابعد عن اللي يقوللك انت كئيب وحزين ويقعد يقوللك بالغصب اطلع من الحاله اللي انت فيها دي

- اهم حاجه للاكتئاب كعلاج انك تزور دكتور و تشوف هل هتحتاج علاج نفسي ولا هتحتاج ادوية
- بس كمان فيه حاجات انت ممكن تعملها بنفسك عشان تساعدك وهي : شجع نفسك علي الرياضة بإنك تروح الجيم او تجري لانه الرياضة بتساعد على افراز هرمونات السعادة

- ممكن تعمل نشاطات زي التأمل واليوجا ، اتعرف على ناس جديدة وزور اماكن جديدة ، جدد اهدافك واحلامك وحاول تعمل نشاطات بتحبها وخلي ناس حواليك يشجعوك عشان ما تكسلش

- بغض النظر ان في انواع من الاكتئاب ملهاش علاقة بعلاقتك بربنا لانه مرض ، الا ان الصلاة مهمة في علاج بعض الانواع ، بسبب انها بتغير نشاط العقل و بتسبب راحة نفسية

ثريد ممكن ينفعك

ليه لازم نهتم بالصحة النفسية

ليه بنكتئب بعد الساعه ١٢

أسباب الانتحار و ازاي تتعامل مع إفكارك الانتحارية

- متنساش تعمل لايك لـ بيدج الفيسبوك : facebook.com
- لو عندك أي Feedback إبعته هنا : curiouscat.me
- - - -
⭕️ تقييمك للـ Thread ؟ ⭕️

curiouscat.me/Bluurr11

facebook.com/bluurr11/

أعاني الأن من إكتئاب حاد