من 4 أيام، حصل حدث تاريخي وإنجاز بشري عظيم. عداء ماراثون كيني شهير اسمه "إيليود كيبشوجي" جري ماراثون في أقل من ساعتين زمن. 42.2 كيلومتر في ساعة و 59 دقيقة و 40 ثانية. ايه الحكاية؟ ثريد.
نحط الموضوع في سياق؛ عشان إنسان يجري ماراثون في أقل من ساعتين فهو محتاج يجري بسرعة لا تقل عن دقيقتين و 50 ثانية فقط للكيلو الواحد. دا معناه إنه ياخد لفة تراك كاملة في 68 ثانية بس.
الإنسان العادي المهتم بصحته وبيجري بشكل دوري يقدر يوصل لسرعة تقرب من 3 دقايق للكيلو لو بيجري مسافة 5 كيلو وطبعا كل ما يزود المسافة كل ما متوسط سرعته هيقل.
أنا مثلا كهاوي أسرع كيلو عملته في حياتي كان في 4 دقايق و 12 ثانية. الراجل دا قعد يجري بالسرعة الجنونية دي (أيوة دقيقتين و 50 ثانية للكيلو) ل42.2 كيلومتر.
كيبشوجي كان عداء مسافات طويلة تحديدا 3000 متر و 5000 متر وأخد فيهم ميداليات في بطولة العالم والأولمبياد. لحد ما جت سنة 2012 في أولمبياد لندن استبعدوه من منتخب كينيا في البطولة. من وقتها قرر إنه يتجه لجري الماراثون.
من وقت ما بدأ لحد دلوقتي كسب 8 ماراثونات، ومن أبريل 2014 لحد دلوقتي مخسرش ولا ماراثون اشترك فيه. وهو صاحب الرقم العالمي للماراثون اللي عمله في ماراثون برلين 2018 وكان ساعتين ودقيقة و 39 ثانية.
سنة 2017، شركة نايكي عملت مشروع اسمه Breaking2 جمعت فيه 3 من أحسن عدائين الماراثون في العالم اللي كان منهم كيبشوجي وقعدوا يشتغلوا على محاولة كسر الساعتين من خلال تقنيات الأحذية الخفيفة جدا والتأهيل البدني الكثيف وعوامل تانية.
في خلال المشروع دا، كيبشوجي قدر يجري ماراثون في ساعتين و 20 ثانية. دا كان معناه إنه محتاج ينزل زمنه ثانية واحدة بس في الميل وهيكسر الساعتين وهنا بدأ الإيمان بالفكرة إن الموضوع ممكن.
الراجل قعد يتمرن بشدة في نمط حياة صارم. بيجري في الأسبوع فوق ال120 كيلو وتأهيل بدني عنيف. وفي مواسم الماراثونات حتى كان بيقعد 6 أيام في معسكر التدريب ومبيشوفش مراته وولاده غير يوم في الأسبوع.
يوم السبت اللي فات 12 أكتوبر 2019، كان يوم محاولة كسر الساعتين. الاختيار وقع على فيينا في النمسا. كيبشوجي عمل ماراثون أسطوري كأنه روبوت صنع للجري فقط. أبطأ ميل عمله في الماراثون دا كان off the pace ب3 ثواني بس.
من مزارع بيمشي ميلين يوميا عشان يروح المدرسة ويركب عجلة توصله لأقرب مدينة عشان يروح السوق يبيع لبن لأعظم عداء ماراثون في التاريخ. القصة ملهمة وإيليود صاحب ال34 سنة بيقول: "إذا لم تكن منضبطا، ستكون عبدا لأهوائك". دا فيديو فيه تفاصيل أكتر وشرح مستفيض. انتهى.
youtu.be
youtu.be
جاري تحميل الاقتراحات...