تحت هذه التغريدة حاشاركم بعض الاشياء الي ساعدتني في سفرتي الاخيرة وبالنسبالي السفرة دي من اعظم وارهب التجارب الي عشتها في حياتي، كانت ٥٠ يوم في اوروبا بين؛ فرنسا، المانيا واليونان، والي يقول السفر يباله فلوس! كانت بـ٣٠٠٠ ﷼ سعودي شاملة [كل شيء] وحتى التذاكر ?✈️
بداية الاغراض؛ كل ماكنت خفيف في الرحلة استمتعت، كان معايا Backpack وكيري اون في الطيارة لاني ماحب قروشة الشحن واوفر على نفسي وقت وجهد، محانحتاج ملابس كثيرة خاصة اذا غسلناها تاني واريح، كون واعي بالاشياء الي تشيلها اي شيء شفته وقلت (ممكن استعمله) الغيه لانك محاتستعمله ابداً
الطيران اكثر شيء نشيل همه؛ احب اخد ارخص طيران ولو فيه ترانزيت استغله واشوف البلد، شخصياً مايهمني في الطيران اي شيء غير اني اوصل، معايا الاكل الي احتاجه وموية وبكذا وفرت مصاريف الوجبة في حال ماجات مع الرحلة، انام واكتب واتفرج واقرأ، والترانزيت لو كان طويل انزل واستمتع واتمشى
في برامج تساعد كيف تختار الرحلة والوقت، @hopper ساعدني اشوف الاوقات الي الطيران فيها رخيص، @WegoArabia ساعدني احجز الطيران المناسب بالترانزيت، سكاي سكانر برضو مناسب، في الاخير انت بتشوف كل البرامج الممكنة وتقرر، حجوزاتي كلها كانت عن طريق ويقو والرحلة كلفت روحة ورجعة ١٥٠٠﷼
السكن؛ افضل طريقة واوفر طريقة انك تسافر بتجربة عظيمة، انك تسكن مع اشخاص وعوائل وتتنقل في كل مرة تسمحلك الفرصة؛ انت في رحلة فمو رايح تستقر في مكان استمتع بالتنقلات وشوف العجايب، تقدر تسكن عند عوائل، افراد، طلاب، مزارع، واذا متخوف ومو عارف التجربة الهوستيل برضو خيار جيد ولطيف
@Workaway يساعدك تسكن عند عوائل مقابل تتطوع عندهم وتساعدهم، يفرولك سكن واكل وانترنت حسب المزايا والاعمال عادة لها وقت، انصح انك تراسلهم من قبل وعادة يستضيفو اشخاص لاوقات طويلة عادي، المميز انك تكتسب خبرة ومهارات وتتبادل الثقافات، يخلوك تعلمهم اشياء ماكنت تعرف انك مميز فيها
@Couchsurfing يخليك تسكن عند اشخاص مجاناً فكرة البرنامج تبادل ثقافة، عادة انك محاتطول اكثر من اسبوع عند الشخص وحتقله من قبل قد ايش حتجلس، البرنامج دا عظيم لان فيه مزايا كثيرة، تقدر تقابل مقيميم وتعيش معاهم، مسافرين وتكتشف المنطقة معاهم، ناس فاضين وتخرجو تسو شيء مع بعض وتستكشفو
@Airbnb خيار جيد ايضاً، لكن تدفع فيه زي الهوستيل والفندق ولكن المميز فيه ان فيه تجربة تسكن مع ناس وتشارك معاهم، كبداية تجربة لطيفة لو شلت هم او خفت تسكن عند ناس ماتعرفهم لاول مرة وبدون مقابل، احسن طريقة بشكل عام انك تقابل الشخص قبل تروح عنده وتتعرف عليه وتشوف كيف الكيميا بينكم
المواصلات؛ كل ماكنت تخرج وتتمشى برجلك او دراجة كان احسن لان فيها حركة وتشوف الناس وتستمتع بالاجواء، قد ماتقدر لاتستأجر سيارة الا لو كان الشيء دا متعة لك وتقدر، لكن الاوفر اكيد رجلك ومواصلات عامة داخلية، لو انك محاتطول في مكان او مدينة مثلاً تذاكر اسبوع تمشي الحال واوفر من اليومية
معلومة مهمة؛ لو انك حتتنقل بين اوروبا استخدم الطيران لانه ارخص بكثير من القطار، موقع @GoEuro يساعدك تشوف الرحلات الارخص من اي وسيلة، تكتب اسم المدينة في الدولة ١ لمدينة في دولة ٢ ويطلع لك الاسعار وكل ماكان ابدركان افضل واحجز منه دايركت وشوف انسب واسرع وارخص طريقة سفر
الاكل والشرب، عشاننا نحب الاكل قعدت افكر واقول اني فعلاً هنا ماكان ٣ وجبات يومياً، حبكت هناك اكل ٣ وجبات فاخرة كل يوم! فقررت اني اروح السوبر ماركت اشتري موية وحدة كبيرة ولان في اعادة تدوير كل ماتخلص ارجعها واخد وحدة جديدة واوفر على نفسي، الشيء الثاني اني اشتري سناكس ودايماً معايا
الوجبات؛ اشتري مقاضي واطبخ في البيت واشارك الي ساكنة معاهم؛ اوفر، الطف وبعدها هم يشاركوني وهكذا، غير ان في وجبات تنباع فرش كل يوم ممكن تاخدها وماتتعدى ٢€ ومرة في الويكند اروح مطعم واشتري وجبة ب٨€ وماحولها وتكون كثيرة ومشبعة، واذا مرة اشتري كل يومين الوجبة دي، اكل خفيف صحة افضل
في برامج برضو تساعدك تاكل مع ناس او في بيوتهم زي @OpenTable وغيرهم، وهذا الشيء يساعدك تتعرف على ناس وتوفر وتستمتع بالتجربة، استغل كل المصادر عشان تنبسط واشكر الله على الاشياء الصغيرة الي عندك ولا تتحلطم وعيش يومك بانبساط واستغل الرحلة دي عشان تتعلم وتجرب وتكسر حواجز فيك
المعارض والمتاحف؛ شخصياً ماحب المعارض والمتاحف لان رحلتي في ٢٠١٧ كانت سياحية بحتة وروحت معارض كثير وبرضو ماكلفتني لان بعضها كنت ادخلها ببطاقة السائح الي عندي وبعضها احجزها اون لاين، مدونتي كتبت عن رحلتي السابقة ممكن تفيدكم shobeilia.blogspot.com
اشياء تسويها؛ لان هناك المجال مفتوح تسوي كل شيء، المواقع السابقة الي ذكرتها تساعدك تعيش تجربة، خاصة ان اغلب الاشياء هناك مجانية، حضرت كلاس طبخ، يوغا، جيتار، تذّوق قهوة، تصوير، تبادل ثقافات وغيرها وكلها مجاناً، وبالمقابل كان في اشياء ثانية زي الخزف والرسم ووو في برامج بمبالغ رمزية
التسوق؛ "اشتري تجربة لاتقتني اشياء" اتسوق باشياء ماتلاقيها في بلدك، اشتري مربى، تذكار رهيب مرة، اشياء مستعملة نظيفة سعرها ماتلاقيه فاي مكان تاني، كل ويكند بعض الاماكن تعمل Garage sale وتبيع اغراض مستعملة نظيفة بسعر رمزي وكويس ويمكن ماتلاقيها فاي مكان تاني، شخصياً استمتعت بالتجربة
اعرف قوانين البلد كسائح ومقيم وايش لك وايش عليك، ممكن عشان نسيت تدفع تذكرة حتدفع غرامة، كون واعي بايش يصير حولك والاخبار وحاول تسأل اهل البلد، لاتخاف تسأل حتى لو شخص طنشك ومارد عليك شوف الي بعده، لاتخاف تتواصل مع الناس، ولو اتعلمت بس كلمتين اساسية فلغة جديدة انت اكتسبت معرفة وناس
في برامج ممكن تعطيك اساسيات في اللغة، لو رايح ٥ دول اتعلم ١٠ كلمات اساسية لكل لغة، وفي الطيارة تحفظها او في طريقك محاتكلفك شيء، وحاول تتواصل مع الناس بلغتهم او اسألهم لغة البلد او قلهم بلغتهم اذا يتكلمو انجليزي، في اسوأ الحالات تقدر تكتب ورقة انك سائح وتحتاج مساعدة بلغتهم وتوريهم
الانترنت والاتصال؛ رحلتي الاولى اخذت عرض @Mobily لمدة شهر بس جلست ١٠ ايام، الرحلة التانية طلعت شريحة المانية واستعملتها في كل الرحلة بس كنت اواجه صعوبة في الشحن لان ماعندي اقامة ممكن تلاقي شركات تانية افضل، بس اصلاً اغلب الاماكن فيها انترنت مفتوح فماكنت احتاج اشحن الا لاتصال
نصائح عامة: خد معاك جزمة مريحة لانك حتمشي كثير، ابتعد عن المظاهرات والتجمعات، كملّ صحنك قد ماتقدر واطلب اكل على قدك، خلي معاك كيس قماش عشان لمن تتسوق توفر عليك، شوف الاشياء الي يعاد تدويرها ووفر عليك واعيد تدويرها لانك انت الكسبان، اخرج بباك باك ولاتعبيها عشان ماتثقل عليك وتتعبك
لو انت دقيق في الاكل وتتحسس روح اماكن العرب او اسواقهم واشتري منهم، اكلهم نظيف وآمن، او خد خيارات نباتية او بحرية تزيل شويا من الشكّ والوسوسة، ومن جديد اطبخ اوفر فلوس ووقت وانظف واحسن
١٨ دقيقة تلخص التغريدة وفيه نصائح كثيرة جميلة للسفر الاقتصادي وتعيش تجربة مختلفة ?
youtu.be
youtu.be
جاري تحميل الاقتراحات...