يعلمنا صاحب القصة يقول : في يوم كنت طالع أنا والعيال كشتة في أطراف الخرج ، وتأخرت عليهم شوي ، قالوا بما إنك باقي ماوصلت جيب لنا معك فحم وبارد !!
خذيت البارد ونسيت الفحم يقول حركت ومشيت ولقيت قدامي بقالة وأنا أعرف هالطريق ماعمري شفتها بهالمكان من قبل واستغربت !!!!

يقول : يوم شفت البقالة وسبحان الله يطري علي الفحم وأتذكره وإلا لو ماشفتها كان رحت لهم بدون الفحم ورجعت ثانية ، بس الحمدلله ، لفيت ووصلت المحطة ونزلت من سيارتي ومشيت للبقالة ودخلت ..
يقول شفت راعي البقالة البائع وقدامه طفل صغير ويكلمه ولا أدري وش يقول ؟
سلمت وقلت له وين الفحم !؟ قال هناك في الأخير وأنا رايح بديت أسمع الطفل وكأنه يترجى " ويقول تكفى و البائع يقوله : لا لا معليش أنا دائما أعطيك لكن الآن خلاص والولد تكفى تكفى هذه آخر مرة "

أنا حسيت إن الطفل كأنه يتسلف منه وهو مامعه فلوس لكن البائع رافض ، خذيت الفحم وحطيته على الطاولة بحاسب وهنا الولد سكت مستحي يبيني لين أخلص وأطلع ويرجع يترجاه ، التفت على البائع وقلت له وش عنده الولد يبيك تسلفه ؟ قال ايه
قلت وش يبي قال هذه ، والتفت إلا هي علبة بيبسي الكبيرة حجم عائلي ، قلت له بس !! قال ايه بس ، ومايجي سعرها 5 ريال حتى قلت ياولد عطني العلبة وأقول للبائع تفضل احسبها ، الولد تهلل وفرح قال شكرًا الله يجزاك خير ويعطيك العافية وطلع وكان راكب على سيكل وواضح إنه بيته قريب من البقالة، قلت له تبي شيء ثاني قال لا والله أصلا ماجيت إلا عشان البيبسي ومشكور وماقصرت ، أنا على طول جاء ببالي إنه ماخذها للعشاء لأن الوقت هذاك وقت عشاء أصلاً، وطرا ببالي أكيد البيت فاضي وإلا ماكان تسلف هالشيء البسيط ، وممكن أمه مصلحة عشاء بسيط وأخواته طلبوه بيبسي يدفون به اللقمة واستحى يرجع لهم يدينه خالية وكان يترجى صاحب البقالة ..!!!
يقول ركبت سيارتي ودار هالتفكير براسي ..

يعني سبحان الله نسيت الفحم وماتذكرته إلا لما لمحت المحطة وهالبقالة ولاقد جيتها !!
وأنا أصلاً ناسيه تماما ، والغرررررريب إني نسيت المهم وأخذت الأقل أهمية ، نسيت الفحم إلي هو أهم من البارد لأنهم بيشوون ولازم الفحم ضروري وأخذت البارد إلي ممكن نستغني عنه !!
وكل هذا عشان أمر هالبقالة وأحاسب عن هالطفل ..
تخيلت تدبير الله للأمور كيف وحاولت أتصورها بمنظور فيه عمق وتأمل وخمنت حتى أحداث ووضع أهله المادي ..!

يقول وصلت للشباب وجلست معهم وتقهوينا وأنا عقلي يفكر بالطفل وكيف الله دبر هالأمر من عنده ..
اليوم الثاني رجعت لنفس البقالة وكلّمت البائع قلت الولد إلي أمس كان هنا وش وضعه !!
قال عليهم دين وهذا دفتر الدين وأبوهم متوفي وهم أم وبنات وهالوليد ..
قدرني الله أدفع مبلغ الدين ، وأخلي البائع يكلم أمهم وتواصلت معها مباشرة قلت يا أختي سددت دين البقالة خلاص والله يكتب الأجر ، وحطيت مبلغ اضافي رصيد لكم بالبقالة ولو احتجتوا شيء بخلي رقمي عن البائع وخذوه منه ..

الشاهد في القصة والعبر المستفادة منها :
•تأمل تدبير الله في حياتك كلها .
•لو حدتك نفسك على مساعدة من هم في حاجة لاتتردد بادر .
•صنائع المعروف تقي مصارع السوء .
•الناس للناس والكل بالله .
•لاتحقرن من المعروف شيئا.

تنويه:ليس لي أي علاقة بأي حسابات أخرى تقوم بسرقة محتواي واستخدامه لاغلاق حالات مدفوعة أو اعلانات مدفوعة، حساباتي الشخصية موحدة في كل البرامج hindz5544 وليس لي أي حسابات أخرى.. ولا أحلل سارقي القصص ونسبها لهم من قبل هذه الحسابات وتشويه سمعتي!!عليه جرى التنويه🛑🛑
جميع القصص حقيقية

معكم هندز معلقة صوتية وكاتبة محتوى وهذا سنابي أقدم فقرات وسواليف يوميًا ، وألعاب ذكاء فنانة الحقوها يشرفني تتابعوني وتدعموني لأقدم الأفضل أحبكم 🫂 ، تفضلوا الرابط 👇🏼🔥
snapchat.com