مكنتش عاوز اكتب عن الموضوع دا بس الحوار مستفز كل ما افكر فيه
يوم 3 نوفمبر اخويا ركب مع توكتوك وصاحب التوكتوك سرق موبايل اخويا المهم فضلت اتابع مع الموبايل لحد ما جبت اللوكيشن بتاعه وفي نفس الوقت كنا فرغنا كل الكاميرات اللي التوكتوك مشي فيها لحد ما جبنا صور واخويا كان راكب معاه...

بعدها اخويا عمل محضر سرقة وفيه الصور دي واللوكيشن بتاع الموبايل وبعدها بيومين قرر يروح لمكان اللوكيشن يشوف ايه الدنيا هناك وطلع ان اللوكيشن دا بيت صاحب التوكتوك ولما وصل لبيته كل الناس اللي في المنطقة اتلمت هناك عشان تشوف ايه اللي بيحصل والواد نزل هو وابوه...

وفضل ينكر انه ميعرفش اخويا ولا عمره شافه ولا يعرف حاجة عن الموبايل لحد ما اخويا قاله عن المحضر وهدده بيه وكدة ف الواد اعترف انه فعلا شاف اخويا بس ميعرفش حاجة عن الموبايل وقاله ان اخوه بينزل وردية على التوكتوك برضو ف يمكن هو اللي خد الموبايل وقالنا كلموني بكرة وهقولكم وصلنا لايه..

المهم تاني يوم ف تالت يوم والواد عمال يأجل ويقول ميعرفش حاجة وكل يوم ببص على اللوكيشن بتاع الموبايل وهو لسه عند بيت الواد
والمفروض امبارح اللي هو 12 نوفمبر اخويا كان في النيابة بيتابع المحضر وقالوله ان المحضر اتحفظ عليه

ف انا بجد معرفش ايه اللي المفروض يتم ومعرفش يعني ايه الحكومة عندها كل معلومات وتفاصيل السرقة من اثبات بصور ومكان الجاني ومش راضية تتحرك؟ لو حد يعرف المفروض اتصرف ازاي عشان حقنا يرجع وخصوصا ان الموبايل دا عليه داتا شغل اخويا لمدة سنتين