وعدتكم بتغطية تاريخية 🔷🔷🔷🔷🔷
ثريد: ملخص الموسم الأول والثاني لمسلسل FROM للي حاب يستذكر كل الأحداث المهمة قبل بداية الثالث

بداية المسلسل وقصته ، هي قرية ملعونة تدخلها ماتقدر تطلع منها وبالليل في كائنات ووحوش تقضي عليك لو فكرت تطلع, ومن هنا تبدأ احداث المسلسل
نصل مع عائلة الماثيوز لهذا المكان اللي انطلقوا برحلة وللأسف اخذهم الطريق لهنا بعد ماشافوا شجرة تقفل الخط عليهم وتاخذهم للقرية الملعونة هذي، وصلوا للجحيم لكنهم يقررون يرجعون للطريق مرة ثانية بعد مااستنكروا كل شي بالقرية ، يصير لهم حادث خطير يجعل من ايثان الطفل "مصاب"الشخصيات "جيم، تابيثا، ايثان ، جولي"
ايضًا وماوقفنا هنا، نشوف سيارة ثانية تمسك نفس الطريق وبداخلها شخصية "جايد"اللي يموت كل اللي كانوا معه بالسيارة للاسف

ونتعرف بعد على شخصية بويد الشريف والمسؤول عن امان القرية وكيف كل شي يبدأ وينتهي من عنده، وبرضوا شفنا من وين جاء وكيف بدأت قصته لما كان برحلة مع زوجته وولده أليس واخذهم الطريق لهذا المكان ايضًا، قابلوا القس وفيكتور لأول مرة ووقتها ماكان فيه "طلاسم" تحميهم من الوحوش كانوا يختبئون في ايّ مكان لما يجي الصباح! لكن بويد قرر يلقى حل وانطلق في رحلة بالغابة ورغم مطاردة الوحوش له الا انه لقى الحل بعد مادخل لكهف وحصل فيه الطلاسم ولاحظ ان الوحوش ماقدرت تدخل! عرف ان هذا هو السر لحمايتهم مؤقتًا على الأقل لكن للأسف الصدمة بعد مارجع من الرحلة وحصل زوجته صابها الجنون وبدأت تقتل الكل، حاول يهديها ماقدر لما جاء ولدها وفي اللحظة اللي قررت تنهي حياة ابنهم قتلها بويد " كانت مؤمنة ان كل هذا حلم وان الحل الوحيد يموتون كلهم عشان يرجعون للحياة الطبيعية"

نتعرف ايضًا على كل الشخصيات الرئيسية في البلدة مع وصولنا لها مع عائلة الماثيوز وجايد ، نشوف بويد زي ماذكرت فوق وقصته، كيني ، سارا ، كريستي، "فيكتور والرهيبة دونا وفاطمة والقس كاثري والأم تيان" والأهم هنا شخصية ڤيكتور! وتعال اقولك ليه، اقدم واحد بالبلدة واللي عاش سنين طويلة لوحده فيها ويعرف خبايا كل شي بعد حادثة مأساوية عاشها لما صحى في يوم ولقى الكل مقتول بطريقة وحشية وأن امّه قررت تتركه مع اخته عشان تساعد الأطفال المحتجزين في مكان معين! لا امه رجعت ولا اخته وعاش لحاله مع الطفل صاحب الملابس البيضاء طول هالوقت ،" طفل غريب يساعد الاشخاص بالبلدة في اي وقت يتعرضون لخطر"

وحوش مرعبين بأشكال مخيفة! لكن الموضوع يصير اكبر من كائنات شريرة تقتل الناس بالظلام ونكتشف ان الموضوع فيه كيان غامض وسحر خطير جدًا واصوات تكلم الناس ويتجسد هذا الشي في شخصية ساره " اللي تسمع صوت يقول لها تقتل الطفل ايثان " عشان تساعد الكل وتقرر فعلاً تقتله لكن خطتها تفشل وبالخطأ تقتل اخوها بعد ماحاول يخلص ايثان الطفل منها! ويتمكن اهل القرية من حبسها والقاء القبض عليها

عشان نوصل لعائلة الماثيوز" جيم وتابيثا" اللي يقررون يلقون حل لكل شي يعيشونه! جيم يقرر بناء برج لطلب المساعدة وتابيثا تقرر اكتشاف سر الأنوار الغامضة في القرية من وين توصل لها وتحفر حفرة كبيرة داخل البيت عشان تكتشف المكان الرئيسي، والصدمة هي ان الاسلاك بلا فايدة وانها معلقة كذا وكأن مصدر الطاقة بالسحر!
ينجح جيم ايضًا بصناعة برج ويتصل بالراديو عشان يرد عليه صوت يقول له بالحرف " زوجتك في خطر الحق عليها" واللي بعد كذا تنهار الحفرة على تابيثا وتوصل للكهف الغريب تحت الارض وفجأة تقابل فيه ڤيكتور ونكتشف ان مخلوقات الليل المرعبة تعيش في هذي الكهوف وتنام هنا!

حادثة مأساوية ايضًا هي فقدان الأب كاتري بعد هجوم مخلوقات الليل على الناس بالقرية وايضًا مجزرة كولوني هاوس بعد مايتمكن الوحوش من الدخول في المنزل للأسف .. احد الشخصيات الرهيبة

ومع قرارات عائلة الماثيوز قرر بويد ايضًا يكتشف سر الغابة وينطلق في رحلة لها مع ساره اللي تم القبض عليها بعد محاولة قتل ايثان واللي قلنا انها تسمع اصوات غريبة ايضًا! تحاول تكفر عن ذنوبها وتبين ندمها بهذي الرحلة وتحاول تساعد بويد. لكن نشوف العجب في هذي الرحلة " ضوء ابيض غريب يعمي البصر، عناكب ضخمة ، أشباح ومخلوقات كثيرة غير الوحوش في الغابة والأهم نشوف "المنارة" بعد كذا يُصاب بويد في الرحلة ومن هنا يطلع لهم الولد بالملابس البيضاء ويساعدهم ويقول لساره " بويد لازم يدخل داخل واحدة من أشجار الغابة" وفعلاً هذا اللي يصير يدخل بويد ويلقى نفسه داخل كهف صغير!
والصدمة الأكبر اللي ينتهي عليها الموسم الأول وصول باص جديد وناس جدد للقرية وهذا الشي اللي ممكن يكون سيء جدًا!

ملخص الموسم الثاني لمسلسل FROM 🔷
نبدأ من وقفنا: مع بويد اللي كان حبيس في الشجرة بعد ماقال له الولد ادخل فيها عشان تنجو، يسمع صوت يناديه من فوق ويعطيه حبل يساعده يطلع والصدمة ان المكان ياخذه لغرفة فيها رجل عجوز سجين من ألآف السنين فيه دود يمشي في جسمه! وايضًا فيه صندوق موسيقي يُعزف بالغرفة وكان يقول لبويد لو وقفت الموسيقى راح يجون ويقتلونك، خلّص حياتي من هذا العذاب لكن بويد يرفض ويساعده بعد كذا يقرر السجين يسبب جرح في يد بويد عشان ينقل لهّ الدود اللي يمشي بجسمه وكأنها لعنة معينة انتقلت لبويد بعدها! وللقرية كلها

الرعب في الموسم الثاني ينتقل لمستوى مختلف والناس يتم مهاجمتها في أحلامها! تخيل اذا نمت ممكن تموت عشان تحلم؟ وفعلاً يقتلونك بالحلم وبطريقة وحشية! الموضوع يتحول لكونه اكبر بكثير من وحوش مرعبة! ايضًا لعنة الدود تهاجم القرية .. المكان اصبح كالجحيم فعلاً

الدود يبدأ يهاجم الكل زي ماذكرت وبطريقة غريبة ايضًا ، كيني ، بويد ، ماري الجديدة. لكن الأهم وبعد حادثة طعن لأليس في كولوني هاوس وهجوم الوحوش ليلًا على المستشفى يقرر بويد يطلع يتصدى لهم عن طريق الدم بالضبط نفس ماسوى فيه الرجل العجوز! " اجرح والمس" وبالفعل يقتل واحد فيهم بأستخدام دمه وهنا كانت الصدمة وكأن الدم الملوث اداءه لقتل الوحوش فعلاً؟ لكن لعنة الدود ماوقفت، قرر بويد يحاول ينهي حادثة الدود اللي تمكن من الكل بالقرية وينطلق في مهمة عشان يرجع للمكان اللي قابل فيه الشخص المحبوس ويكسر صندوق الموسيقي عشان هذا هو الحل بعد مافك شفرة الأغنية

برضوا بالموسم الثاني نشوف شخصيات جديدة وصلت زي ماقلنا في نهاية الموسم الأول، اهمها إلجين وماري وراندل والعجوز تيلي وسائقة الباص باكتا. ونكتشف ان بعضهم يعرفون الشخصيات القديمة؟ وكأن المكان يجمع الكل لسبب معين!

الجين صاحب رؤية غريبة، ويشوف حلم يحذره قبل الوصول للمكان انهم يرجعون، باكيتا السائقة تساعد في كشف لغز الأغنية اللي اعطاها الرجل العجوز لبويد، وماري صديقة كريستي وراندل يتحول لشخصية مهمة في سير الأحداث وتيلي صاحبة اكبر نظرية مرعبة بالمسلسل كله وهي: انها ام ڤيكتور اللي راحت وتركته .. غموض مرعب!

جايد يكتشف سر غامض لرمز غريب يحاول يفكه وينطلق في رحلة للكهف اللي دخلته تابيثا وڤيكتور بعد ماصار الإنهيار بالموسم الأول تتذكرون؟
وبعد مشهد حواري حزين جدًا مع ڤيكتور اللي كشف فيه سر شخصيات البلدة القديمة ورجل اسمه كريستوفر معتقدين انه سبب كل شي وكيف كانوا كلهم ، وكأن مهمة جايد هي فك لغز هذا الرمز بأي طريقة ومعرفة مين الرجل اللي اسمه كريستوفر

تابيثا تشوف رؤية لأطفال صغار يطلبون منها المساعدة ، اطفال مشوهين مرعبين ينادوها أنغكوي وهذا معنى " الحياة" في لغة اساطير معينة قديمة! وتشوف ايضًا رؤية لمكان معين وهو المنارة اللي شفناها لأول مرة في رحلة بويد وساره للغابة. وبعد مشهد حواري مع فيكتور نكتشف سر المنارة وقصتها مع امه واخته ، السر هو ان المنارة هي نفسها المكان اللي راحت له ام ڤيكتور عشان تنقذ الأطفال لأنهم كانوا ايضًا يطلبون منها المساعدة لكن للأسف اختفت فيه. واخته اللي قررت تلحق امه واختفت هي ايضًا. هذي القصة الحزينة جدًا لهذي الشخصية، يقرر ڤيكتور يساعدها ويعطيها صندوقه الخاص اللي ممكن يكون اداءة حل كبيرة لتابيثا بعدين" تلقى احد بالعالم الحقيقي يعرف صندوق ڤيكتور" وياخذها للمكان عن طريق الاشجار وتنطلق في مهمتها عشان تنقذ الأطفال بعد ماستخدمت الشجر بالغابة للأنتقال للمنارة ، والصدمة الكبيرة بعد ماتوصل للمنارة يطلع لها الطفل صاحب الملابس البيضاء اللي كان يساعد الناس ويقول لها @ اسف هذي هي الطريقة الوحيدة" ثم يدفعها من فوق عشان تصحى وتلقى نفسها بالعالم الحقيقي!
وهنا ينتهي الموسم الثاني لمسلسل FROM