#ثريد 🧵 :
طريقة فتح حساب بنكي اون لاين - nline في بنك الخرطوم بالخطوات وعشان يكون الموضوع مؤكد ومُجرب قبل اكتب الثريد وبالخطوات جربت أفتح لأمي حساب وسجلت ليكم الطريقة بالخطوات , تابعوا خلال التغريدات التالية:

المطلوب منكم قبل فتح الحساب تجهزوا الآتي :
- ايميل
- رقمك الوطني كرقم وليس كمستند (مكتوب في الجواز برضو)
- رقم تلفون سواء في السودان او برة السودان
- صورة شخصية محفوظة في جهازك
- صورة من الجواز او الهوية الوطنية
- ورقة فيها 3 توقيعات وبرضو تكون محفوظة في جهازك

الخطوة التالية الدخول الى الرابط التالي :
eaccount.bankofkhartoum.com
حتفتح معاك الشاشة دي
- كتابة الايميل واختيار (مستخدم جديد)

بعدين التحقق العادي من الكاباتشا

حتجي بعدها صفحة البيانات وكلها بيانات واضحة في حالة انت جهزت المستندات المكتوبة في التغريدة 2

- بعد تضغط على التالي حتجيك الصفحة دي وفيها تحمل صورتك الشخصية المحفوظة في جهازك وانا زبطت معاي صيغة JPG.

- الضغط على التالي حتجيك رسالة OTP في الايميل الانت سجلته وأنا لقيت الرسالة في البريد غير المرغوب فيه فلو تأخرت الرسالة أكتر من دقيقة حتلقوها هناك وما تنسوا تطلعوا الرسالة للبريد الوارد عشان اخر رسالة تلقوها في الوارد .

- بعد تدخل الكود الجاك في الايميل حتمشي للصفحة دي وتملأ البيانات وتحمل صورة جواز السفر او الهوية وتحت في خيار كتابة رقم الوثيقة اما الجواز او الهوية .
وبرضو زبطت معاي بصيغة JPG

- الصفحات التالية كلها بيانات واسئلة شخصية زي الاسم عربي وانجليزي والعنوان وكدة وفي بعضها ما أوردتها بتشوفوها لما تعملوا الاجراء.

- الخيار البعده انك تجيب ورقة وتوقع فيها 3 توقيعات بيدك علما انو التوقيع دا مهم فتوقيعك يكون بتاعك وتقدر تكتبه في أي وقت, وتحفظها في الجهاز بتاعك وترفقها وبرضو زبطت معاي بصيغة JPG .

وبكدة تكون وصلنا لنهاية الطلب وتجيك الصفحة دي

وبمراجعة ايميلك حتجيك رسالة مع رقم الطلب بتاعك يبلغوك انو حنراجع طلبك وننتظر المراجعة .

لو تمت المراجعة وادوني اي تحديث في الطلب انا حأحدث الثريد هنا , اتمنى انو يكون الثريد دا مفيد ليكم 😇😇.
شكرا

تواصلت مع بنك الخرطوم خدمة العملاء عبر واتسابهم الرسمي بتا ع البنك وسألتهم عن الاجراء الاخير :
انو ننتظر الرسالة في الايميل بمراجعة الفرع ، وبعد كدة لو انت خارج السودان تتواصل معاهم بالواتساب حق خدمة العملاء الرسمي وهم حيعالجوا الموضوع .
رقم خدمة العملاء الرسمي :
وضعته ليكم في الصورة المرفقة ، عشان في ناس بيشكوا من الاحتيال في موضوع فتح الحسابات فانت عشان تتأكد ادخل موقعهم الرسمي بنفسك وشيل الرقم من هناك وانا حأضعه هنا برضو .
برضو عايزة انصحكم بعدم دخول الروابط الغريبة كتير منها في فيسبوك والاشخاص البيطلبوا منكم قروش ومعلوماتكم الخاصة لأن الاجراء دا بيتم فقط عبر موقهم الالكتروني .
لو ما بتعرف تتأكد من الرابط من خلال الدومين تواصل مع خدمة العملاء وتأكد من الرابط اولا ما تدي معلوماتك لزول .