رتبها

𓋹𓂀 سنة مصرية سعيدة 𓋹𓂀
على كل المصريين
النهاردة عيد رأس السنة المصرية..
مرت 6266 سنة على بداية تدوين التقويم المصري القديم
التقويم الأصلى للمصريين القدماء وهو أول يوم في السنة الزراعية الجديدة... ولفظة نيروز من الكلمة القبطية nii`arwou (نى - يارؤو)=الأنهار
١-تابع
#شيرين_هلال

ودا لأن هذا الوقت من السنة هو معاد اكتمال موسم فيضان النيل سبب الحياة مصر.
وهو مناسبة واحتفالية كبيرة اسمها عيد النيروز وما زال التقويم بيستخدم في جميع انحاء مصر.
-٢تابع

ويعتبر شهر توت أول شهور السنة القبطية فهو مشتق من الإله تحوت إله المعرفة وهو حكيم مصرى عاش أيام الملك مينا الأول وهو مخترع الكتابة ومقسم الزمن، وأختار بداية السنة المصرية مع موسم الفيضان لأنه وجد نجمة الشعرى اليمينية تبرق فى السماء بوضوح فى هذا الوقت من العام
-٣تابع

مما يعنى أن السنة القبطية، سنة نجمية وليست شمسية،وبالتالى لم تتأثر بهذا التعديل
ومع عصر دقلديانوس احتفظ المصريين بمواقيت وشهور السنة اللي بيعتمدالفلاح عليها فى الزراعةمع تغيير اعداد السنوات عشان يخلي السنة الأولى لحكم دقلديانوس واللي بتساوى82 ميلادية و1قبطيةو4525 توتية(مصرية)
-٤

ومن هنا ارتبط النيروز بعيد الشهداء، بسبب خروج الأيام المسيحيين فى التوقيت دا لأماكن دفنوا فيها أجساد الشهداء اللي خبوها من بطش الرومان، وأحتفظ الأقباط بالعادة دي حتى أيامنا واللي بيسموها بالطلعة، وكل دا معناه أن عيد النيروز هو أقدم عيد لأقدم أمة.
-٥تابع

واسماء الشهور المصرية:
توت - بابة - هاتور - كيهك - طوبة - أمشير - برمهات - برمودة - بشنس - بوؤنة - أبييب - مسرى،
ومن أبرز الأمثال المرتبطة بالشهور القبطية واللي حفظها الأجداد ونقلوها للأحفاد احد النهاردة:

1- شهر "توت" بدايته من "11/12 سبتمبر" توت رى ولا تموت
-٦تابع

2- شهر "بابة "بدايته من "10/11 أكتوبر" بابه خش واقفل البوابة "اتقاء للبرد"

3- شهر "هاتور" بدايته من 10/11 نوفمبر" يقول للبرد طور طور بمعنى أنه "بداية البرد" أو هاتور أبو الدهب منثور "أى القمح" أو أن فاتك هاتور اصبر لما السنة تدور.
-٧

4-كيهك أو كياك"10/11 ديسمبر" صبحك مساك شيل يدك من غداك، وحطها فى عشاك وهذا يرمز إلى أقصر أيام السنة"

5-طوبة"9/10 يناير" تخلى الشابة كركوبة نسبة ل"البرد الشديد"

6-أمشير"8/9 فبراير" يفصص الجسم نسير نسير "أى من شدة الهواء" أو أمشير أبو الزعابير الكتير ياخد العجوزة ويطير.
-٨👇

7- برمهات "10/11 مارس" روح الغيط وهات "هو موعد نضج المحاصيل الشتوية"

8- برمودة "9 أبريل" برمودة دق العامودة "أى دق سنابل القمح بعد نضجها"

9- بشنس"9 مايو" بشنس يكنس الغيط كنس.

10- بؤونة "8 يونيو" تنشف المياه من الماعونة وهذا يرمز إلى شدة الحر
-٩تابع

11- أبيب "8 يوليو" "أبيب أبو اللهاليب" وهذا يرمز إلى "شدة الحر"

12- مسري" 7 أغسطس "مسرة تجرى فيه كل ترعة عسرة وهذا يرمز إلى ازدياد مياه الفيضان فتغمر الأرض

13- النسى أو الشهر الصغير" تزرع أى شيء حتى لو فى غير أوانه".
-١٠تابع

الغريب هو اللي هتشوفه هنا
مرفق
احتفالية النيروز1926
من الصفحة الاولي لمجلة المصور
احياء عيد النيروز المبارك في حفل كبير بمدرسة جمعية التوفيق وحضره عدد كبير من الوزراء والنواب وكبار الموظفين واهل الوجاهة
المجلة بترصد المحاولات اللي كانت قائمة من قرن فات لاحياء الهوية المصرية
-١١

عن طريق الاحتفال بالنيروز عيد وطني يحتفل به الجميع مش المسيحيين لوحدهم
في محاولة من نخبة مصر (الحقيقية) ايامها وادراكهم لضرورة تدعيم التيار القومي المصري، مش زي (نكبتنا) الحالية، اللي اغلبها رافضة حتى مظاهر الاحتفال او الاعتراف بمكونات الانتماء للحضارة المصرية القديمة
-١٢تابع

للاسف في عز ما بتتسابق دول قريبة وبعيدة لسرقة مكونات تراثنا و منهم اللي بينسبوا الحضارة المصرية بأكملها لنفسهم بالزور!
احب اقولك ان اثيوبيا من فرط السرقة والوقاحة بتحتفل بعيد رأس السنة التوتية على انه حبشي!!
لكي الله والمخلصين من ابناءك يا مصر.
فوقوا يا مصريين🇪🇬
#شيرين_هلال

المزيد من هذا الكاتب

مواضيع ذات صلة

الأكثر اعجابا

المزيد من هذا الكاتب

مواضيع ذات صلة

الأكثر اعجابا

فك الثريد